Savali a Faiaoga Asiasi

Saili Aoaoga ma le Aoaoina i le Olaga Atoa

Ia aoao atu ma le agaga tatalo mau ma upusii nei po o, pe afai e manaomia, se isi mataupu faavae o le a faapea ona faamanuiaina ai uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

Aisea E Tatau Ai Ona Faaauau Pea Ona Ou Saili i Aoaoga Faaleagaga ma le Faalelalolagi?

MFF 93:36–37: “O le mamalu o le Atua o le malamalama lea, o lona uiga, o le malamalama ma le upu moni. O le malamalama ma le upu moni e lafoaiina le leaga.”

Julie B. Beck, peresitene aoao o le Aualofa: “Ua ta’u mai e le Alii e ao ona “tuuina atu o outou aso i le aoaoina o tuistuiga paia’ (MFF 26:1) ma ‘o le Tusi a Mamona ma tusitusiga paia ua tuuina [mai] … e taitai ai [i tatou]’ (MFF 33:16). E mafai ona avea tamaitai uma ma se faiaoga o aoaoga faavae o le talalelei i lona aiga, ma e manaomia e uso uma i le Ekalesia le malamalama o le talalelei e avea ai ma se taitai ma se faiaoga. Afai e te lei amatalia le mausa o le suesue i tusitusiga paia i aso taitasi, ia amata nei loa ma suesue ai pea ina ia mafai ai ona e saunia mo ou tiute o lenei olaga, ma le faavavau” (“E Fiafia Lo’u Agaga i Tusi Paia,” Liahona, Me 2004, 107–8).

Peresitene Thomas S. Monson: “E le gata i lo tatou suesueina o mataupu faaleagaga, e taua foi le aoao i le poto salalau. … Ou te fautuaina oe ina ia faaauau au aoga—pe afai e lei faia lava—ina ia e saunia e tuuina atu mea e manaomia pe a tulai mai ni tulaga faapena.

“O le a faalauteleina au taleni a o e suesue ma aoao. O le a mafai ona sili atu lau fesoasoani i ou aiga i a latou aoaoga, ma o le a toafilemu lou mafaufau i lou iloa ua e saunia oe lava mo tulaga e tatau ai atonu o le a oulua fetaiai i le olaga” (“O Sini e Tolu e Taialaina Ai Oe,” Liahona, Nov. 2007, 119).

E Faapefea Ona Avea A’u ma se Tagata Aoaoina i le Olaga Atoa

Peresitene Henry B. Eyring, Fesoasoani Muamua i le Au Peresitene Sili: “O le a tatau ona tatou faia ni filifiliga faigata i le auala e faaaoga ai o tatou taimi. … Ae ia manatua, e te naunau i aoaoga, e le gata i le olaga faaletino ae mo le olaga e faavavau. A oo ina manino lau vaai i lena tulaga moni i se vaaiga faaleagaga, o le a e faamuamua le aoaoga faaleagaga, ae o le a e le faaitiitia foi le taua o le aoaoga faalelalolagi. …

“… Ma talu ai o le a faigata ona tatou iloa tonu po o le a le mea e manaomia ona tatou iloa, tatou te manaomia le fesoasoani a le lagi e iloa ai po o le fea o le tele o mea e mafai ona tatou suesueina o le a sili ona tatou aoaoina ma le atamai. O lona uiga foi e le mafai ona tatou faamaumauina le taimi e faafiafia ai i tatou lava pe a i ai le avanoa e faitau ai pe faalogo ai i soo se mea lava o le a fesoasoani ia i tatou e aoao mea moni ma aoga. O le le faamalieina o lo tatou fia suesue o le a avea ma a tatou tautinoga” (“Education for Real Life,” Ensign, Oke. 2002, 18, 19).

Elder Robert D. Hales o le Korama a le Au Aposetolo e Toasefululua: “O nisi o uiga faavae e manaomia e avea ai o se tagata aoao i le olaga atoa o le lototoa, naunau faamaoni, lotomaualalo, onosai, fia suesue, ma se faanaunauga e fesootai ma fefaasoaai i le malamalama tatou te maua. …

“O’u tuafafine pele e, aua le faaitiitia lo outou taua o se tamaitai po o se tina. … Aua nei faatagaina le lalolagi e faamatala, faaitiitia, pe taofia ou lagona e uiga i le aoaoina mo le olaga atoa faapea tulaga faatonuina faaletina i le aiga—e le gata iinei i le olaga faaletino ae faapea i aoaoga ma faamanuiaga e te tuuina atu i lau fanau ma lau soa.

“O le aoaoina i le olaga atoa e taua mo le ola o le mafaufau, tino, ma le agaga o le tagata. E faaleleia atili ai le taua o le tagata lava ia ma le uunaiina e le tagata o ia lava e faatino mea ua ia aoaoina. O le aoaoina i le olaga atoa e fafagaina ai le mafaufau ma o se puipuiga sili e tetee ai le vave ona fai ifo o le olaga, atuatuvale, ma le le talitonu o le tagata ia te ia lava” (“The Journey of Lifelong Learning,” i le Brigham Young University 2008–2009 Speeches [2009], 2, 8–9).

Ata na saunia e Matthew Reier