Taimi o Fetufaaiga

O Le Malumalu—Ou Te Alu i Ai i Se Aso

Saunia e Cheryl Esplin

“Ou te avatu foi ia te oe ki o le malo o le lagi: o se mea foi e te fusifusia i le lalolagi, e fusifusia foi lea i le lagi: o se mea foi e te tālā i le lalolagi, e tatalaina foi lea i le lagi” (Mataio 16:19).

I se tasi Aso Sa i se lotu molimau, sa ta’u atu ai e Angie e iva ona tausaga i le au paia o lana pese e sili ona fiafia i ai o le “E Mafai Na Faavavau Aiga.” Fai mai Angie oka se maoae o le i ai o se fuafuaga matagofie a le Tama Faalelagi mo i tatou ia tatou mafuta faatasi ai e faavavau.

E lei faamauina matua o Angie i le malumalu i le taimi lena. E lei leva ona mavae lena aso, ae tuu loa e le uso o Angie o Katie se tusi i luga o aluga o o la matua, ma uunaia i laua e o i le malumalu.

Sa matua mananao lava Angie ma Katie ina ia faamauina faatasi lo latou aiga. Sa tatalo o laua matua e uiga i le o atu i le malumalu. Sa galulue malosi lo latou aiga ina ia saunia. Ina ua talafeagai loa le taimi, sa mafai loa ona o atu lo latou aiga i le malumalu ina ia faamauina faatasi e faavavau.

E tusa lava pe lei faamauina lou aiga, e i ai lava se aso o le a mafai ai ona o atu lou aiga i le malumalu. A atoa loa le 12 o ou tausaga, ua mafai loa ona e faia papatisoga i le malumalu mo e ua maliliu. E mafai ona amata nei ona e saunia e ala i le tausia o poloaiga ma le ola i Ou Tulaga Faatalalelei.

Gaoioiga

Ooti ese fasi pepa o upu o loo i le itulau U8, ma tuu i totonu o se ipu, ato, po o se fagu. Faaaoga ni tamai maa po o ni faamau mo maa o le taaloga. Ia faasolosolo ona filifili se fasi pepa o upu, ma faitau leotele. Ona faitau lea pe fia upu o i ai, ona faamei lea o lau maa taalo i le aofai o avanoa ia tutusa le aofai ma le aofai o upu. Faaauau pea seia taunuu maa taalo a tagata uma i le malumalu.

Ia papatisoina ma faamauina

Auai i le lotu

Ai i le faamanatuga

Salamo

Mulimuli i le perofeta

Ia usiusitai

Ia agalelei

Ia mafaufau i mafaufauga lelei

Totogi le sefuluai

Suesue i tusitusiga paia

Tatalo

Usitai i le Upu o le Poto

Ia faamaoni

Faamagalo atu i isi

Ia ava i ou matua

Ia faatuatua ia Iesu Keriso

Faaali atu le alofa i lou aiga

Alofa i le Alii

Auauna atu i isi

Tausi le Aso Sapati ia paia

Manatu mo Taimi o Fetufaaiga

E mafai ona faatasi lo’u aiga e faavavau e ala i sauniga o le malumalu. Ao e faitauina le Mataupu Faavae ma Feagaiga 138:48, ia faalogo tamaiti po o a galuega e faia i malumalu o le a mafai ai ona faatasia aiga e faavavau (“faamauina o fanau i o latou matua”). Faaali atu le Taga Ata o le Talalelei 417 (Ua Toe Fuatai Mai e Elia le Mana e Faamau ai Aiga mo le Faavavau). Aoao atu e uiga i le faaali mai o le perofeta o Elia i le Malumalu i Katelani e toefuatai mai le mana o le faamauga (tagai MFF 110:13–15). Ina ia fesoasoani i tamaiti e malamalama i le “mana o le faamauga,” faaali atu se ata o le malumalu i lo outou eria ma faamalamalama atu afai e faaipoipoina ulugalii i le malumalu ma latou tausia folafolaga latou te faia iina, o le a tumau pea la latou faaipoipoga pe a latou oti. Faamatala atu le tala o le faamauga o le aiga o Angie ma Katie i le malumalu (i le tauagavale). Ia tusi e tamaiti taitoatasi se ata lapoa o le malumalu. Ona liliu lea o a latou pepa ma tusi ai se ata laitiiti o lo latou aiga po o lo latou aiga i le lumanai. A uma loa ona tusi a latou ata, ona uu lea o a latou ata agai i le moli ina ia latou iloa atu ai o latou aiga i totonu o le malumalu. Ia faasoa atu lau molimau e mafai ona faatasia aiga e faavavau.
O talafaasolopito o aiga ma galuega i le malumalu ua faamanuiaina ai tupulaga uma o lo’u aiga. Ia o mai ni tamaiti se toafitu i luma o le potu. Faapipii le faailoga A’u i luga o le tamaitiiti o loo i le ogatotonu. Faailoga tamaiti o loo i lona itu tauagavale Matua, Matua o Matua, Matua o Matua o Matua. Faailoga tamaiti o loo i lona itu taumatau Atalii, Atalii o le Atalii, Atalii o le Atalii o le Atalii. Ia faamalamalama atu o tagata taitoatasi ua faatusaina i ai se augatupulaga o se aiga. Faamatala atu i tamaiti ina ua faavaeina e le Tama Faalelagi ia aiga, sa Ia fuafuaina mo i tatou e fesoasoani le tasi i le isi e toe foi atu e ola faatasi ma Ia e faavavau. Faitau le Malaki 4:6. Ia faamalamalama atu o le liliu “o loto o matua i fanau, ma loto o fanau i o latou matua” o lona uiga ia faamauina faatasi tupulaga uma o o tatou aiga. O lena fuaiupu e faatatau foi i le alofa tatou te lagonaina mo o tatou tuaa pe a tatou iloa i latou. Faatasi ai ma le faatagaga a le epikopo po o le peresitene o le paranesi, ia valaaulia se tamamatua po o se tinamatua o se tasi o tamaiti e sau i le Peraimeri. Ao lei faia le gaoioiga, tusi ni fesili i luga o ni fasi pepa, ona faasolosolo lea o tamaiti e filifili ma fai atu se fesili i le tamamatua po o le tinamatua e tali mai i ai. Amata fesili taitasi i le “Ao e laitiiti pei o a’u …” (Faataitaiga o fesili: O le a se aganuu faaleaiga e sili ona e fiafia i ai? O a ni mea malie sa outou faia ma au uo?) Faamalosiau i tamaiti e fesili i o latou matua ma matuamatutua ni fesili e faateleina ai lo latou iloa o i latou.

Ata na tusia e Thomas S. Child