Paia Tele?
Na suia Ian Caloobanan ina ua ia auai i le Ekalesia. Sa matauina e ana uo.
“Ua e paia tele.”
Sa maofa Ian Caloobanan, e sefulu lua tausaga, i tala a ana uo. Na te lei manatu o ia ua paia.
Sa faaauau faamatalaga a ana uo, “Talu lava ona avea oe o se Mamona, ua avea oe ma faauma fiafia. Ua tatou le toe inu faatasi. Ua tatou le toe fiafia faatasi i Aso Sa. Ua e paia tele.”
E tiga ia upu, ae peitai … o le a se isi mea e mafai ona ia faia? Na papatisoina o ia ma o lea ua ia umia le Perisitua Arona. Ua suia o ia, ma i le mafaufau lava o Ian ia, ua suia o ia mo le lelei. Ae o le paia? Ia, atonu e lei oo i ai.
O Ian, lea e nofo i le Siteki o Las Piñas i Filipaina, na papatisoina ina ua 10 ona tausaga. Ina ua aoaoina o ia e alii faifeautalai i lesona, sa laua talosagaina o ia e tatalo ina ia iloa ai e moni le Ekalesia. Sa ia faia. “Sa ou lagonaina le fiafia ma le māmā [o ou tino],” o lana tala lea. Sa ia iloa mulimuli ane o le Agaga Paia lea sa molimau ane ia te ia e uiga i le upu moni.
Ao lei auai o ia i le Ekalesia, sa masani ona inu lauti Ian ma ana uo. Sa alu foi o ia i aoga lape mo taaloga i Aso Sa, e sauni ai e taitai faigalape mo lana aoga i taimi o taaloga. Ae na ia le toe faia na mea. Nai lo lena, na amata ona alu o ia i le lotu, e ui lava e nao ia lava o lona aiga e lotu. E lagolagoina e lona tama le auai o Ian i le Ekalesia, ma o lona tina fai, e le o se tagata o le Ekalesia, na te momoliina atu ma toe aumai o ia mai le lotu.
Ina ua fesiligia pe aisea e sau ai i le lotu ae faigofie atu le nofo i le fale, na pau lava lana tali, “Ou te sau aua ou te manao e faamalosia lo’u faatuatua.”
“O Ian o se faataitaiga lelei o se tagata ua taua o se soo o Iesu Keriso,” o le tala lea a lona epikopo. “E faamaoni o ia i lona auai i le lotu, ma e le ita lava. E toatele ana uo iinei. Sa fiafia o ia i le mauaina o le perisitua ma sa ia talosaga atu i lona tama e faatau sona ofutino paepae e ofu ai pe a alu e tufa le faamanatuga.”
E faigata tele ona taofiofi le olioli o Ian i lona mauaina o le talalelei. Ua ia tuuina atu i se tasi o ona faiaoga se kopi o le Tusi a Mamona ma valaaulia o ia e feiloai ma faifeautalai. E faaaloalogia o ia e nisi o ana uo aoga ona o ana tulaga faatauaina ma fesili atu ia te ia e uiga i le talalelei. O nisi e tauemu ia te ia.
E faaauau lava ona tausia e Ian poloaiga i le mea sili na te mafaia.
O lona lagonaina o se vaega o le olioli faapea foi ma ni sauga ona o lona auai i le Ekalesia, ua i ai se fautuaga poto a Ian mo i tatou uma lava: “Tausisi i le faatuatua. Suesue i tusitusiga paia. Tatalo. Ia faalagolago ia Iesu Keriso. Ia tautino oe lava ia ola i le talalelei. Fai ni suiga mo le lelei.”
Ma e le o le mea ea lena e tatau ona faia e se tagata ua auai i le Ekalesia? E fesoasoani tatou te suia ai mo le lelei. E fesoasoani ia i tatou e iu atu ai ina avea e pei ona finagalo ai Iesu ia tatou—paia.
Ata na pueina e Edwin Redfrino