O Afea E Tatau Ai Ona Faia Lo’u Faamanuiaga Faapeteriaka?
O Ianeta sa 17 i le taimi na sau ai o ia i lo’u fale e faia lona faamanuiaga faapeteriaka. Ao ma talanoa ao lei faia lona faamanuiaga, na ou iloa ai sana maua le pepa faataga mai le epikopo i ni nai masina ao lei telefoni mai ia te a’u e faatulaga le taimi o lona faamanuiaga. Sa faatalitali o ia aua sa fefe ina nei ta’u mai e lona faamanuiaga ia te ia ni mea e fai o le a faigata tele ia te ia ona ausia. Sa popole foi o ia ina nei le saunia o ia.
“O se folafolaga mai le Tama Faalelagi e le o se poloaiga,” na ou fai atu ai ia te ia. “O folafolaga i lou faamanuiaga o le a faatoa faataunuuina lava pe afai e te manao ai ma e galue ina ia faataunuuina. Sa ou tautino atu foi ia te ia i le avea ai o a’u o se peteriaka, ou te le faamasinoina pe otegia o ia. O le a ou tuuina atu ia te ia se faamanuiaga.
O Le a Le Peteriaka?
Sa faamalamalama mai e le Perofeta o Iosefa Samita, “Soo se nofoaga lava i luga o le fogaeleele e faavaeina ai le Ekalesia a Keriso, e tatau lava ona i ai se Peteriaka mo le manuia o fanau a le Au Paia, e pei ona i ai ia Iakopo i le tuuina atu o ana faamanuiaga faapeteriaka i ona atalii.”1
O lou peteriaka faalesiteki o se auauna tuuto a le Tama Faalelagi. Ua faauuina o ia i le tofi o le peteriaka ma o le a ia umia lena tofi mo lona soifuaga atoa. E masani lava o le peteriaka o se tamalii matua o le na te silafia le tele o mea o le a faafeagai ma oe ao e tuputupu a’e.
O lona valaauga o le tuuina atu lea o faamanuiaga. E le o ia o se faufautua, o le mea lea na te le tuuina atu ai ni fautuaga. E le o ia o se epikopo, o le mea lea na te le faia ai ni faamasinoga. A tuuina ona aao i luga o lou ulu e tuuina atu ia te oe se faamanuiaga, o le a tuuina mai e le Tama Faalelagi, e ala i musumusuga a le Agaga Paia, i le peteriaka ni manatu, lagona, ma o nisi taimi o ni upu patino lava mo oe. Ona faaaofia lea e le peteriaka o na lagona ma manatu i lou faamanuiaga.
O Le a le Faamanuiaga Faapeteriaka?
Sa faamatala mai e Peresitene Harold B. Lee (1899–1973) o se faamanuiaga faapeteriaka o se “[parakalafa] mai le tusi o ou agavaa.”2 Ao tuu aao o lou peteriaka i luga o lou ulu, o le a e iloa o lou faamanuiaga o le a aofia ai mea masani e pei:
O se faamatalaga o le pule o le peteriaka. O faamanuiaga e tuuina mai e ala i le pule o le Perisitua Mekisateko ma e ala mai i le musumusuga a le Agaga Paia.
O se folafolaga o le tupuaga. E maua e tagata taitoatasi o le Ekalesia faamanuiaga ma tiutetauave faaleagaga e ala mai i se tasi o ituaiga e sefululua o Isaraelu. E ala i musumusuga mai le Agaga, e folafola mai ai e le peteriaka le ituaiga [o Isaraelu] o le a ala mai ai lou mauaina o ia faamanuiaga. O lenei gafa e le fuafuaina mai i lou lanu po o lou atunuu. O tagata o le auaiga e tasi e mafai ona o mai mai ituaiga eseese o Isaraelu. O lenei gafa e masani ona faatatau i ou tiutetauave i totonu o le malo o le Alii. O le toatele o tagata o le Ekalesia e o mai mai le gafa o Efaraima, Manase, po o Iuta, o ituaiga aupito taatele ia o ituaiga o Isaraelu i le taimi lenei, i la tatou galuega o le talaiina atu o le talalelei i nuu uma, ituaiga, gagana, ma tagata.3
O se faamanuiaga faaletagata lava ia. I le vaega lea o lou faamanuiaga, o le a e maua ai faamatalaga musuia ma valoia e uiga i lou olaga. E mafai foi ona aafia i lou faamanuiaga le faataunuuina o mea eseese e tatau ona e iloa, folafolaga a le Alii mo oe, ma apoapoaiga ma lapataiga e fesoasoani e puipui ai oe mai faalavelave po o faigata. O le a le aofia ai i lou faamanuiaga mea uma lava o le a tutupu ia te oe, ae o le a aofia ai mea e manaomia faapitoa lou mataala i ai. Afai e le o ta’u mai ai se misiona, o lona uiga e le faapea e le mafai ona e faataunuuina se misiona. Atonu o le a na o le faailoa mai ai o le faataunuuina o se misiona o se mea ua silafia e le Atua e mafai ona e faia e aunoa ma se tuuina mai faapitoa o se faamamafa i lou faamanuiaga faapeteriaka.
E mafai ona umi pe puupuu lou faamanuiaga. O le umi o lou faamanuiaga e le o se fuafaatatau lea o lou agavaa.
O le faitauina o lou faamanuiaga e tali tutusa lava ma le faitauina o tusitusiga paia. Ao e faitauina, o le a oo mai ia te oe ni manatu fou e uiga i le mea e tatau ona e faia faapea ma lagona lelei e faatatau i lou olaga. O le tele lava o lou faitauina o lou faamanuiaga, o le tele foi lena o lou malamalama i lona uiga mo oe.
O lou faamanuiaga faapeteriaka o se faaaliga ua tuuina mai faapitoa lava ia te oe. E patino ia te oe lava, e paia, ma e le faalauaiteleina. E le tatau ona e faasoaina atu e tau lava ina faamalieina ai le fia iloa o se isi tagata. “Ua tuuina mai i lalo o le musumusuga a le Agaga Paia ma e tatau ona faitauina ma faaliliuina i lalo o le uunaiga a lena lava Agaga e tasi.”4
O Le a le Taimi e Tatau Ai Ona Faia [So’u] Faamanuiaga Faapeteriaka?
I se faaupuga faigofie, o le taimi sili ona lelei mo oe e maua ai se faamanuiaga o le taimi lea ua e saunia ai. O le “saunia” o lona uiga ua e lava tapena i le faalelagona faapea foi i le faaleagaga. O lea taimi atonu o le vaitaimi o lou talavou. O le taimi lea ua amata ona e tutoatasi ma amata ona e manatunatu loloto i le olaga ma mea o le a tutupu ia te oe.
O le a e taunuu atu i le tulaga o le a e matua manao lava e faia sou faamanuiaga—e le ona o loo faia faamanuiaga a au uo ae ona ua e manao i ai mo oe lava. E ono tupu lea tulaga pe a e vaai atu i isi o loo faia mea e te iloa e sese. E ono tupu foi pe a maliu se uo po o se tagata o lou aiga. E ono tupu foi pe a e faalogo i se lauga i le lotu na faagaeetia ai lou loto. E ono tupu foi ao e faitauina tusitusiga paia ma aoao atili e uiga i le Faaola. E ono tupu foi pe a tuua na o oe ma amata ona e lagonaina le alofa o le Atua mo oe. E ono tupu foi pe a e taunuu atu i tausaga e faia ai se misiona, alu atu i le kolisi, ulufale i le militeli, po o le faaipoipo i le malumalu.
E Faapefea Ona Ou Maua Se Faamanuiaga Faapeteriaka?
A e saunia loa e maua se faamanauiaga faapeteriaka, o le a faatalanoaina oe e lou epikopo po o le peresitene o le paranesi. O le a ia fesili atu ia te oe i fesili e uiga i lou agavaa, e pei o lou ola ai i le Upu o le Poto, totogiina atoa o le sefuluai, ola i se olaga mama, ma avea o se tagata toaga o le Ekalesia. Peitai, e le faapea seiiloga e te atoatoa e te agavaa ai. O le naunautai mo se faamanuiaga ma le manao e iloa pe faapefea ona faateleina lou ola latalata atu i lou Tama Faalelagi e tutusa lava le taua ma le ola agavaa. E mafai ona faateleina lou naunautai mo se faamanuiaga e ala i tatalo faaletagata lava ia, suesue i le talalelei, ma le taumaufai malosi e faalogo i le Agaga.
A maea ona faia lou faamanuiaga, o le a tuuina atu e le peteriaka se kopi tusitusia o lou faamanuiaga. Ia teu lelei i se nofoaga malu lenei kopi. Aua lava nei leiloa. Peitai, afai lava e i ai se taimi e te manaomia ai se kopi, e mafai ona e faafesootaia le ofisa o le Ekalesia i le Aai i Sate Leki.
E mafai ona maua e tagata agavaa uma lava o le Ekalesia se faamanuiaga faapeteriaka. O se meaalofa faapitoa mo oe lava ia mai lou Tama Faalelagi agaalofa, o Le e finagalo ina ia faaleleia atili ma taitaia lou olaga ma fesoasoani ia te oe ina ia e toe foi atu e mau faatasi ma Ia.
Ata na tusia e Christina Smith; O Iakopo o loo Faamanuiaina Iosefa, saunia e Harry Anderson; ata pue o Peresitene Faust na pueina e le Busath Photography