Yon pèp ki al nan tanp
Istwa familyal, fratènizasyon, ak batèm pou mò yo enspire manm adilt yo pou yo resevwa dotasyon tanp yo.
Gary ak Jennifer Tucker te fè yon rèv. You toulède te anvi gen yon fanmi etènèl. Men Jennifer te prèske pèdi espwa. Chemen pou reyalize rèv sa a pase atravè tanp, yon bagay Gari pa t ko pare pou li.
Epi, evèk yo te enspire pa yon ide ki t ap ede Tuckers yo—osi byen ke anpil lòt moun nan Pawas Three Forks yo, nan Pye Bozeman an nan Montana—reyalize rèv vin yon fanmi etènèl la. Kèk ane anvan sa, Evèk Aaron Baczuk te nan yon reyinyon pou evèk ak nouvo konvèti nan pye a. Swasanndis Otorite Zòn ki t ap prezide a te mande yon nouvo manm: “Èske ou deja al nan tanp pou akonpli batèm pou mò yo?” Li te deja ale.
Evèk Baczuk pa t janm konsidere mennen adilt ki pa dote yo nan tanp. Nan semèn apre a li te pran randevou avèk Tanp Billings la nan Montana pou adilt nan pawas li yo te ka al fè batèm pou mò yo. Ale nan tanp lan sete yon siksè, epi nan mwa ki te suiv yo, ansyen yo ak gran prèt yo nan pawas la te akonpaye plis adilt ki pa dote nan tanp lan. Evèk Baczuk di: “Sa te vin yon eksperyans trè espirityèl pou yo, ki te pouse dezi yo ak angajman yo pou resevwa dotasyon pa yo.”
Prepare
Pou prepare yo, manm adilt yo travay avèk evèk la pou yo vin diy pou ale nan tanp. Apresa yo ale nan klas preparasyon pou tanp lan. Enterè yo nan klas la reyèlman anpil apre yo fin akonpli batèm pou mò yo. Yo twouve ke pale sou tanp nan klas se yon bagay, men santi Lespri Senyè a nan tanp lan se yon lòt bagay.
Evèk Baczuk.di: “Jwenn opsyon pou mennen yon moun ki poko prepare pou pi plis alyans men ki ka viv yon eksperyans nan patisipe nan òdonans yo gran anpil. Mwen panse li byen tonbe avèk santiman Legliz la ap eseye transmèt nan bwochi preparasyon pou tanp: ‘Ale nan tanp lan!’”1
Prezidan Kowòm Ansyen nan pawas Three Forks la, David Boyd, di ke ale nan tanp pou akonpli batèm fè yon bi reyèl. “Yo kòmanse wè posiblite pou yo ka resevwa pwòp dotasyon pa yo. Anpil nan yo pa t janm te mete pye nan lakou yon tanp anvan sa, konsa vwayaj pou batèm pou adilt sa yo bay manm yo opòtinite sa a.”
Anpil manm ki fèk sot aktive nan pawas la akonpli batèm pou mò yo anvan yo resevwa dotasyon pa yo. Evèk Baczuk di: “Se pa t janm yon kesyon diyite. Sete yon kesyon preparasyon. Kèk nan yo te diy epi yo te prepare pou fè batèm men yo pa t prepare mantalman oswa espirityèlman pou fè alyans dotasyon yo.” Pou mesye yo, se yon tan tou pou prepare yo pou resevwa Prètriz Mèlkisedèk la.
Istwa familyal pouse travay tanp lan tou. Manm pawas tankou Larry ak Carolyn Isom, travay nan sant istwa familyal la pou bay dè santèn non fanmi. Twa efò sa yo—klas preparasyon pou tanp lan, istwa familyal, ak adorasyon nan tanp lan—travay ansanm. Moun k ap fè istwa familyal yo eksite anpil pou fè travay tanp pou zansèt yo ak pou pa manm zanmi yo nan pawas la. Epi ale nan tanp lan motive manm yo pou yo prepare yo pou retounen nan tanp lan.
Nan ane k sot pase yo, 22 manm nan Pawas Three Forks la te pran klas preparasyon pou tanp lan, epi 14 nan pami yo te kòmanse ale nan tanp regilyèman pou fè batèm pou mò yo. Epi, apre yo te fini klas la, 13 nan pami 14 sa yo te resevwa dotasyon yo. Kèk nan yo sete selibatè oswa vèv, men gen lòt, tankou Gary ak Jennifer Tucker, ki te sele antanke fanmi.
Fratènizasyon
Gary te antre legliz la an 1992, kèk mwa anvan li menm ak Jennifer te marye. Li te deja yon manm. Men travay anpil èdtan avèk asosye avèk move zanmi te rann ni difisil pou Gary rete aktif nan Legliz la, menm avèk sipò madanm ni. Li di li te pase anpil ane ap ‘fimen’ ak ‘itilize move langaj’.”
Lè pitit fi yo a, Cody, te fèt, Sè Tucker te eseye elve li nan levanjil la kote l te mennen l legliz, malgre Frè Tucker pa t vle okenn bagay konsènan Legliz la nan kay la. Malgre li te ankouraje fanmi li pou yo t al legliz , li pa t konn ale li menm. Lè Cody te vin gen uitan, li te batize pa yon misyonè, non pa pa papa li. Frè Tucker di: “Mwen kontan anpil dèske m te la, men se yon gwo regrè—ap gade olye m patisipe ladan.”
Nan ane apre yo, fratènizasyon te ede Gary retounen nan aktivite Legliz yo. Jennifer te konn envite manm pawas yo oswa misyonè yo vin manje, konesan ke sa t ap bayo yon chans pou pale avèk Gary. Li rekonesan anvè manm sa yo ak misyonè sa yo paske yo te yon bon enfliyans pou li.
Dale Price, pa egzanp, te anseye manman Jennifer epi li te vin aprann konnen Gary ak Jennifer fason sa a. Lè Frè Price te vizite Frè Tucker, yo pa t pale sou levanjil la toudabò. Yo te pale sou yon enterè komen: lachas. Price yo te chita avèk Tucker yo tou nan aktivite pawas yo, yo te pote manje soti nan rezèv yo lè Frè Tucker te pèdi travay li, epi yo te bayo myèl ki te pwodui pa pwòp myèl yo. Myèl se bagay Tuckers yo pi renmen sou pen. Ti kado sa a, jan Frè Price dekri l la, te “adousi relasyon an.”
Fè ti bagay senp yo
Konsèy prezidan pye a te ede fanmi Tuckers tou. Prezidan David Heap te mande manm pye yo pou yo fè “sèt ti bagay senp”: (1) Li ekriti yo pèsonèlman chak jou; (2) li ekriti yo omwen senk jou pa semèn an fanmi; (3) fè priyè pèsonèl chak maten ak chak swa; (4) fè priyè familyal chak maten ak chak swa; (5) ale legliz chak Dimanch an fanmi; (6) fè sware familyal chak Lendi swa; epi (7) ale nan tanp chak mwa.
Gary te ka wè bagay sa yo t ap ede fanmi li vin pi pwòch—yon bagay li te vle anpil—pou Tuckers yo te kòmanse fè priyè familyal, etid ekriti, ak sware familyal. Efò sa yo te ede prepare Gary pou l tande envitasyon evèk li pou prepare pou ale nan tanp lan.
An Janvye 2006, Tuckers yo t ale nan yon kwendfe lakay evèk la. Evèk Baczuk te rele Gary bò kote li epi li te pale avèk li sou tanp. Menm kote a, Gary te bay evèk la pake sigarèt li a pou l pa t kontinye yon tantasyon pou li. Li te gen anpil kesyon pou evèk la lè sa a ak anpil entèvyou. Evèk la te mete aksan sou viv alyans Gary te fè nan batèm yo pou l te ka diy pou Lespri a.
Tuckers yo te kòmanse pran klas preparasyon pou tanp, epi Jennifer te kòmanse ale nan tanp avèk pawas li chak mwa pou akonpli batèm pou mò yo. Gary te travay pou l te vin diy pou ale. Pitit fi yo a, Cody, ki te gen 11 an lè sa a, te eksite paske l te pral kapab ale nan tanp byen vit pou fè batèm. Rive nan lè li te gen 12 an, Gary te kapab ale nan tanp avèk li. Sete premye fwa yo t ale nan tanp.
Cody di: “Sa mèveye. Li pezib anpil isit la. Papa m te ale, konsa sa te pi ekstraòdinè pou mwen.” Gary di li te santi “lapè enkwayab ak lajwa pou lapremyè fwa.”
Nan Dimanch apre a nan klas preparasyon pou tanp lan, Gary te yon moun diferan. Sè Elna Scoffield, ki te anseye klas la pandan plizyè ane, di: “Yon limyè te la.” Gary te rete apre klas la pou poze kesyon. Li te santi Lespri a nan tanp lan e li te vle retounen—non pa sèlman pou batèm men pou resevwa dotasyon li tou epi pou sele avèk fanmi li.
Nan mwa apre a Tuckers yo te ale nan tanp ankò avèk evèk la ak lòt manm pawas la.
Simonte eprèv
Nan semèn anvan Frè ak Sè Tucker te resevwa dotasyon yo epi sele a, yo te santi lopozisyon advèsè a. Gary t ap fè pwogrè, men li te toujou gen dout sou diyitie li pou ale nan tanp. Rèv yo pou gen yon fanmi etènèl la te prèske reyalize, men se kòmsi li pa t alapòte yo. Yo te konnen ke yo te dwe priye ansanm pi souvan, pou mande fòs. Sè Tucker di: “Nou te toujou resevwa li sou fòm lapè ak reyasirans ki te kalme nou pou n konnen ke tout bagay te nan men Senyè a. Menm rive nan moman pou nou te mache antre nan tanp lan, Lespri kalman li te avèk tout fanmi an.”
Apre Gary ak Jennifer te fin resevwa dotasyon yo, yo te mete ajenou nan sal sèlman an avèk pitit yo, Cody ak Garrett, abiye an blan. Lè Garrett ki te gen sizan te wè manman l ap kriye, li te lonje men li pou siye dlo nan je li. Gary ak Cody te kriye ak lajwa tou. Menm selè a te plen emosyon.
Tuckers yo di ke fanmi yo gen pi bèl relasyon ak pi bon kominikasyon kounyeya. Gary di: “Nou gen plis kè kontan. Madanm mwen avèk mwen nou pi pwòch, epi pitit nou yo wè sa.” Gary santi l tankou l se yon pi bon egzanp pou manm fanmi l yo ki pa manm Legliz la, epi li espere ke lòt fanmi yo nan pawas li a va vle menm benediksyon Senyè a bay Tuckers yo atravè tanp lan.
Agoch: foto Tanp Billings nan Montana pa Steve Bunderson; foto fon batismo Tanp Billings nan nan Montana pa Norman Childs; adwat: foto pa Drake Busath, © Busath Photography
Gary, Jennifer, Cody, ak Garrett Tucker kontan pou ale nan Tanp Billings la nan Montana nan jou sèlman yo a.
Manm pawas Three Forks yo kondi regilyèman pandan dezèdtan edmi pou al sèvi nan Tanp Billings nan nan Montana. Anpil nan sa ki ale yo se adilt ki akonpli batèm pou mò yo pandan ke yo menm ak konjwen yo ap prepare pou resevwa dotasyon pa yo ak pou yo sele.
Foto koutwazi fanmi Tucker