E Nunaa Haere Hiero
Na te aamu utuafare, te faahoaraa, e te mau bapetizoraa no te feia i pohe, i faauru i te mau melo paari ia haere e rave i to ratou iho oro‘a no te hiero.
Ua moemoeahia o Gary e o Jennifer Tucker. Ua hinaaro raua toopiti i te hoê utuafare mure ore. Tera râ, ua fatata roa aita o Jennifer i ti‘aturi faahou. I te mea e, te e‘a no te faatupuraa i taua moemoea ra, e haere ïa na roto i te hiero, e o te hoê ïa ohipa aita roa o Gary i ineine.
E ua faauruhia to ratou episekopo ia faaohipa i te hoê mana‘o o te tauturu i te utuafare Tuckers – e i te tahi atu mau melo i roto i te Paroita no Three Forks, te tĭtĭ no Bozeman Montana – ia faatupu i te moemoea o te hoê utuafare mure ore. Tau matahiti i ma‘iri a‘e nei, tei roto te Episekopo Aaron Baczuk i te hoê putuputuraa na te mau episekopo e te mau taata faafariu-apî-hia i roto i te tĭtĭ. Ua ui atura te Hitu Ahuru mana Area e peresideni ra i te hoê melo apî, « Ua haere anei oe i te hiero no te rave i te bapetizoraa no te feia i pohe ? » Oia.
Aita te Episekopo Baczuk i feruri a‘e nei e afa‘i i te hiero i te feia paari aita i rave a‘e nei i to ratou oro‘a hiero. I te hepetoma i muri iho, ua farerei oia i te hiero no Billings Montana ia haere te mau taata paari o to’na paroita e rave i te bapetizoraa no te feia i pohe. Ua manuïa roa te tere i te hiero, e i roto i te mau ava‘e i muri mai, ua apee atu te mau peresibutero e te mau tahu‘a rahi o te paroita i te tahi atu mau taata paari i te hiero aitâ i rave i to ratou oro‘a hiero. « Ua itehia e, ua riro te reira ei iteraa varua no ratou, ua haapuai atua â i to ratou hinaaro e ta ratou fafauraa ia farii i to ratou oro‘a hiero », te na reira ra te Episekopo Baczuk.
Faaineineraa
No te faaineineraa, ua haa te mau melo paari e te episekopo ia ti‘amâ ratou no te haere i te hiero. E ua haere ratou i roto i te piha haapiiraa no te faaineine no te haere i te hiero. I muri a‘e i to ratou raveraa i te bapetizoraa no te feia i pohe, ua tupu te anaanatae rahi i roto ia ratou ia haere i taua haapiiraa ra. Ua ite a‘era ratou e, e mea taa ê te paraparauraa no ni‘a i te hiero i roto i taua piha haapiiraa ra, e e mea taa ê te fariiraa i te Varua o te Fatu i roto i te hiero.
Te parau ra te Episekopo Baczuk e, « Te afa‘iraa i te hoê taata i te hiero ma te ore e faaineinehia ia farii i te mau fafauraa hau atu, area râ, e e farii oia i te hoê iteraa na roto i te raveraa i te mau oro‘a, ua riro ïa ei ohipa faahiahia mau ». « Te mana‘o nei au e, ua tano ïa i ni‘a i te mana‘o o ta te Ekalesia e tamata nei i te horo‘a i roto i te buka faaineineraa hiero ra: ‘Haere mai i te hiero!‘ »1
Te parau ra o David Boyd, peresideni no te pŭpŭ Peresibutero o te Paroita Three Forks e, te haereraa i te hiero no te rave i te bapetizoraa, e tauturu te reira i te faatupuraa i te hoê opuaraa: « E haamata ratou ia hi‘o i te rave‘a e ti‘a ai ia ratou ia farii i to ratou iho oro‘a hiero. E rave rahi o ratou aitâ i taahi a‘e nei i te avae i roto i te aua o te hiero na mua a‘e nei, e na teie mau tere o te taata paari no te haere i te bapetizoraa i horo‘a ia ratou i te reira fana‘oraa ».
E rave rahi mau melo faaitoitohia i roto i te paroita tei rave i te mau bapetizoraa no te feia i pohe hou a farii ai ratou i to ratou iho oro‘a hiero. « E ere ïa i te parau no te ti‘amâraa », te na reira te Episekopo Baczuk. « E uiraa no te faaineineraa. Te vai ra ua ti‘amâ e ua ineine no te rave i te mau bapetizoraa aita râ i ineine te aau e aora râ te varua no te rave i te mau fafauraa o te oro‘a hiero ». No ratou, e taime atoa ïa no te faaineine ia farii i te Autahu‘araa a Melehizedeka.
E tura‘i atoa te aamu utuafare i te ohipa o te hiero. Ua rave te mau melo o te paroita, mai ia Larry e o Carolyn Isom, i te ohipa i roto i te pû aamu utuafare a te paroita no te horoa e rave rahi hanere i‘oa utuafare. E haere apipiti noa teie na ohipa e toru – te haapiiraa faaineineraa hiero, te aamu utuafare, e te haereraa i te hiero – . Te feia e rave i te aamu utuafare, e oaoa ratou ia horo‘a i te mau i‘oa no te feia e haere i te hiero. Te feia e haere i te hiero e oaoa ratou ia rave i te mau ohipa hiero no to ratou iho mau tupuna e no to to ratou mau hoa melo o te paroita. E na roto i te taeraa i te hiero, ua riro te reira ei faaitoitoraa i te mau melo ia faaineine ia ho‘i faahou i te hiero.
I roto i te mau matahiti i ma‘iri a‘e nei, e 22 melo o te Paroita Three Forks tei haere i roto i te haapiiraa faaineineraa hiero, e 14 o ratou tei haamata i te haere tamau i te hiero no te rave i te mau bapetizoraa no te feia tei pohe. E i te hoperaa te haapiiraa, 13 i ni‘a i te 14 tei farii i to ratou iho oro‘a hiero. Te tahi pae o ratou e mau taata otahi ïa e aora râ, e ivi, area te tahi pae ra, mai ia Gary e o Jennifer Tucker, ua taatihia ïa ei utuafare.
Faahoaraa
Ua tomo mai o Gary i roto i te Ekalesia i te matahiti 1992, tau ava‘e na mua a‘e a faaipoipohia ai raua o Jennifer. E melo a‘e na o Jennifer. Tera râ, no te mea ua amui tamau o Gary i rotopu i te mau hoa ti‘a ore, ua riro ïa te reira ei mea fifi no’na ia vai itoito noa i roto i te Ekalesia, noa’tu te patururaa a ta’na vahine. Te parau ra oia e, ua pau e rave rahi matahiti ia’na i te « amuraa i te avaava e te parau-ino-noa-raa ».
Ia fanauhia mai ta raua tamahine, o Cody, ua tamata te tuahine Tucker ia te haapii ia’na i te parau no te evanelia na roto i te arata‘iraa ia’na i te pureraa, noa’tu e, aita te taea‘e Tucker e hinaaro i te hoê noa a‘e mau mea no te Ekalesia i roto i te fare. Noa’tu e ua faaitoito oia i to’na utuafare ia haere i te pureraa, area oia ra, aita ïa oia e haere. I te va‘uraa te matahiti o Cody, na te hoê misionare oia i bapetizo, eiaha râ na to’na metua tane. Ua parau te taea‘e Tucker e, « Ua oaoa vau i te taeraa i reira, tera râ, e tatarahapa rahi to‘u – i te hi‘o-noa-raa, ma te rave ore ».
I te mau matahiti i muri mai, na te ohipa faahoaraa i tauturu ia Gary ia ho‘i faahou mai i roto i te Ekalesia. Ua ani o Jennifer i te mau melo o te paroita e aora râ, i te mau misionare ia haere mai e taamaa i te pô, ma te ite e, e riro ratou i te paraparau ia Gary. Ua mauruuru oia i taua mau meoo e te mau misionare tei riro ei hi‘oraa maitai no’na.
Mai ia Dale Price, ua hahaere oia i te metua vahine o Jennifer e ua matau mai ia Gary raua o Jennifer. I te haereraa mai te taea‘e Price e farerei i te Taea‘e Tucker, aita raua i paraparau evanelia na mua. Ua paraparau râ raua no te ni‘a i te hoê mea au roa na raua: haereraa e aua‘u i te animala. Ua parahi atoa te utuafare Price i pihaiiho i te Utuafare Tucker i roto i te mau faaoaoaraa a te paroita, ua hopoi mai i te maa na ratou no roto mai i ta ratou haaputuraa maa i te taime aita ta te taea‘e Tucker e ohipa faahou, e ua horo‘a i te meli no roto mai i ta ratou iho afata manu patia. E mea au na te utuafare Tucker ia parai i te meli i ni‘a i te faraoa. Ua riro taua horo‘a iti ra, ia au i te faaiteraa a te taea‘e Price, « ei tamaruraa i te auraa ».
Te Raveraa i te mau Ohipa Riirii e te Ohie
Ua riro atoa te a‘oraa no roto mai i to ratou peresideni tĭtĭ ei tautururaa i te utuafare Tuckers. Ua titau te Peresideni David Heap i te mau melo o te tĭtĭ ia rave « e hitu ohipa riirii e te ohie » (1)Tai‘o te taata tata‘itahi i te mau papa‘iraa mo‘a i te mau mahana atoa; (2)tai‘o amui te utuafare i te papa‘iraa mo‘a e pae a‘e mahana i te hepetoma; (3)e pure te taata tata‘itahi i to’na pure i te mau po‘ipo‘i e te ahiahi atoa: (4)e pure amui te utuafare i te pure i te mau po‘ipo‘i e te mau ahiahi atoa; (5)e haere te utuafare i te pureraa i te mau sabati atoa; (6) e faatere i te po utuafare i te mau po monire atoa; e (7) e haere i te hiero i te mau ava‘e atoa.
Ua ite o Gary e, e nehenehe teie mau mea e tauturu i to’na utuafare ia haafatata ia ratou – te hoê mea ta’na i hinaaro roa – no reira ua haamata te utuafare Tucker i te faatupu i to ratou pureraa utuafare, tai‘o i te papa‘iraa mo‘a, e faatupu i te po utuafare. Na teie mau tautooraa i tauturu ia Gary ia farii i te titauraa a to’na episekopo ia faaineine ia’na no te haere i te hiero.
I te ava‘e tenuare 2006 ua haere te utuafare Tucker i te hoê pureraa pae auahi i te fare o te episekopo. Ua arata‘i te episekopo Baczuk ia Gary i te hoê vahi e ua paraparau ia’na no ni‘a i te hiero. I reiraraa ra, ua horo‘a’tura o Gary i te episekopo ra i ta’na farii avaava amuamu, ia ore te reira ia riro faahou ei faahemaraa tamau no’na. E rave rahi ta’na uiraa i ui i te episekopo i taua taime ra e i roto i te tahi atu mau aparauraa. Ua haapapû maitai te episekopo ia’na i te parau no te haapa‘oraa i te mau fafauraa ta Gary i rave i roto i te bapetizoraa ia ti‘a ho‘i ia’na ia farii i te Varua.
Ua hamata a‘era te utuafare Tucker i te haere i roto i te haapiiraa faaineineraa hiero, e ua haamata o Jennifer i te haere i te hiero e ta’na paroita i te mau ava‘e atoa no te rave i te mau bapetizoraa no te feia tei pohe. Ua faaitoito noa o Gary ia ti‘amâ oia no te haere atoa i te hiero. E ta raua tamahine o Cody, 11 matahiti to’na i taua taime ra, ua oaoa oia i te tia‘iraa ia ti‘a ia’na ia haere i te hiero no te rave i te mau bapetizoraa. Ia tae‘ahia to’na matahiti i te 12, ua ti‘a atoa ia Gary ia haere i te hiero na muri iho ia’na. O te taime matamua teie a haere ai raua i te hiero.
Te parau ra o Cody e, « e mea nehenehe mau. E mea hau i reira. Ua tae to‘u papa, no reira, ua riro ïa ei ohipa rahi mau ». Te parau ra o Gary e, ua ite oia « i te hau e te oaoa maere i taua taime matamua ra ».
I te Sabati i muri iho, i roto i te haapiiraa faaineineraa hiero, ua riro o Gary ei taata ê. « Ua morohi ê te maramarama te parau ïa a te Tuahine Elna Scoffield, e rave rahi matahiti to’na haapiiraa i taua haapiiraa ra. E faaea mai o Gary i muri a‘e i te haapiiraa no te ui i te tahi mau uiraa. Ua farii oia i te Varua i roto i te hiero e ua hinaaro oia e ho‘i faahou – eiaha no te rave noa i te bapetizoraa no te farii atoa râ i to’na iho oro‘a hiero e ia taatihia to’na utuafare i ni‘a ia’na.
I te ava‘e i muri iho ua haere faahou te utuafare Tucker i te hiero e te episekopo e te tahi atu mau melo o te paroita.
Te upooti‘araa i ni‘a i te mau Tamataraa
I te hepetoma hou a farii ai te taea‘e e te tuahine Tucker i to raua iho oro‘a hiero e a taatihia ai raua, ua ite raua i te aroraa a te enemi. Ua maitai roa o Gary, tera râ te vai noa ra te feaa i roto ia’na no ni‘a i to’na ti‘amâ ia haere i roto i te hiero. E mea fatata roa mai i teie nei to raua moemoea no te hoê utuafare mure ore, tera râ mai te huru ra e, eita e tae‘ahia. Ua ite te utuafare Tucker e, ua titauhia ia raua ia pure amui pine atu â, ma te ani i te puai. Te parau ra te tuahine Tucker e, « Ua farii tamau maua i te reira na roto i te hoê hau tamarû e te haapapûraa e, tei roto te mau mea atoa i te rima o te Fatu ». « Tae roa’tu i te taime a tomo ai maua i roto i te hiero, ua tae mai To’na Varua hau i ni‘a i to matou utuafare taatoa ».
I muri a‘e i to Gary e to Jennifer fariiraa i to raua oro‘a hiero, ua tuturi raua i roto i te piha taatiraa e ta raua na tamarii, o Cody e o Garrett, ma te ahuhia i te ahu uouo. Ia ite a‘era o Garrett, e ono matahiti, i to’na mama ia ta‘i, ua ti‘a a‘era oia i ni‘a no te tamaro i te roimata i ni‘a i to’na na paparia. Ua ta‘i atoa o Gary e o Cody no te oaoa. Ua putapû atoa te aau o te taata taati.
Te parau ra te utuafare Tucker e, te farii nei to ratou utuafare i teie nei i te mau auraa puai e te aparauraa maitai a‘e. Te na ô ra o Gary e, « E mea oaoa a‘e matou i teie nei. E mea fatata roa maua o ta‘u vahine, e ua ite ta maua na tamarii i te reira ». Te feruri nei o Gary e, e mea maitai a‘e to’na hi‘oraa i teie nei no te mau melo o to’na utuafare e ere i te melo no te Ekalesia, e te ti‘aturi nei oia e, e hinaaro atoa te tahi atu mau utuafare i roto i ta’na paroita i te reira mau haamaitairaa ta te Fatu i horo‘a i te utuafare Tucker na roto i te hiero.
Aui: hoho‘a o te Hiero o Billings Montana na Steve Bunderson; hoho‘a o piha bapetizoraa o te Hiero o Billings Montana na Norman Childs; atau: hoho‘a na Drake Busath, © Busath Photography
Te oaoa nei o Gary, o Jennifer, o Cody e o Garrett Tucker i te taeraa i roto i te Hiero no Billings Montana i te mahana o to ratou taatiraa.
E tere tamau te mau melo o te paroita no Three Forks e piti hora e te afa no te haere e rave i te ohipa i roto i te Hiero no Billings Montana. E rave rahi te mau taata paari te haere nei i te hiero no te rave i te bapetizoraa no te feia i pohe a faaineine ai ratou e to ratou hoa faaipoipo ia farii atoa i to ratou iho oro‘a hiero e ia taatihia.
Hoho‘a i horo‘ahia mai e te utuafare Tucker