Haamata na roto i te Pure
Te imiraa i te mau pahonoraa ? Te parau nei teie mau tamarii apî no Ottawa, Canada e, te pure, o te vahi ïa e haamata ai.
A faati‘a o Jenni, 15 matahiti, no ni‘a i te pahono-raa-hia te hoê pure, ua haamata oia ma te tatarahapa. Te tatarahapa nei oia i te mea e, aita oia i pure tamau noa fatata hoê matahiti te maoro. I roto i to’na oraraa, aita te mau ohipa i maitai – te haapiiraa, to’na mau hoa, e te Ekalesia.
I te hoê pô, te parau ïa a Jenni, ua hinaaro oia e mataitai i te hoê hoho‘a. Ua pi‘o a‘era oia i raro no te hi‘o i te mau hoho‘a i ni‘a i te paepae buka i raro roa, e ua haru a‘era to’na mata i ni‘a i te hoê hoho‘a o to’na tonton tei pohe aita i maoro a‘e nei, i te hoê pohe ri‘ari‘a. I taua taime ra, ua ta‘i a‘era oia, no te teimaha o te mau mea atoa ta’na e haape‘ape‘a ra. « Ua ite ihora vau i taua taime ra e, e mea ti‘a ia‘u ia pure », te parau ïa a Jenni. Ua tuturi a‘era oia i te vaiiho iho tei reira oia, e ua pure a‘era.
Te faaite nei o Jenni no ni‘a i te fariiraa oia i ta’na pahonoraa: « I te otiraa ta‘u pure, ua tae atoa mai te pahonoraa i ta‘u mau uiraa. Ua ite a‘era vau e, ua afaro faahou te mau mea atoa. E maitai te mau mea atoa. E mea maitai te mau mea atoa no to‘u tonton. Ua ite a‘era vau e, ua here au i te haapiiraa e i to‘u mau hoa. Ia oti ihora to‘u pure, ua ite au e, e titauhia ia‘u ia haere i te pureraa no te mea no‘u ïa te reira. Ua putapû roa vau, e ua tupu te au maitai e te mahanaha i roto ia‘u. Ua ite au e, ua here to‘u Metua i te Ao ra ia‘u e e tauturu Oia ia‘u i roto i te mau ohipa ».
No Jenni, ua riro teie pure ei hoê o te mau pure ta’na i hinaaro ia parau tera râ aita i ti‘a ia na reira. I teie nei, noa’tu e e feruri noa i roto i te mana‘o, ua farii faahou oia i taua mahanahana ra, e te haapapûraa e, ta’na pahonoraa no ô mai ïa i te Fatu ra.
No Ottawa o Jenni Holts, te oire pu haviti no Canada, tei patuhia i ni‘a i te hiti raau o te Anavai pape no Ottawa. Ua paraparau oia e to’na mau hoa no te tĭtĭ no Ottawa Ontario e te ve‘a o te Ekalesia no ni‘a i te iteraa e, e mea nahea te pure i te faaora i to ratou oraraa.
Nohea mai te mau Pahonoraa ?
Te hoê o te mau mea au roa a‘e ta te mau tamarii Ottawa i aparau oia ho‘i, e mea nahea ta ratou mau pure i pahonohia ai. A tahi, ua parau maira o Susan BrooK, « Mai te mea e, e hinaaro outou i te hoê pahonoraa, ua titauhia ïa ia outou ia faaroo i te reira ».
Ua parau o Susan e, i te tahi taime ta’na pahonoraa no roto mai ïa i te tai‘oraa i te mau papa‘iraa mo‘a. Ua farii oia i te hoê hi‘oraa maitai: « I te hoê mahana, ua rohirohi roa vau, e e mea faufaa ho‘i au no te taata tata‘itahi. Aita vau i hinaaro ia paraparau. Te haamana‘o nei au ua tai‘o vau i te mau papa‘iraa mo‘a, aita vau e haamana‘o faahou ra e, i hea râ, e te na ô ra e, ‘Ia haehaaa. ‘ Ua puta roa te reira i roto ia‘u. Tera ta‘u pahonoraa ». (A hi‘o PH&PF 112:10.)
E mea faaroo maitai o Ariana Keith i te pureraa. « Te mana‘o nei au e, e rave rahi o ta tatou mau pure e pahonohia e te feia a‘o i roto i te pureraa », te na reira ra oia. « I te hoê taime ua hinaaro vau e farii i to‘u haamaitairaa patereareha. E i te hepetoma na mua a‘e i te taime i faataahia no‘u, ua haere mai te patereareha o to matou tĭtĭ i roto i ta matou paroita e ua paraparau. Ua pure au no te reira ma te tuutuu ore, e ua riro te faaroo ia’na ei ohipa faahiahia mau ».
Te parau ra o Mackenzie Loftus e, e mea pinepine ta’na mau pure i te pahonohia na roto i to’na utuafare. Ua pure oia no ni‘a i te hoê faaotiraa a te utuafare, e « ua ite au i te Varua i tera iho taime, ma te ite e, te faaotiraa ta matou e rave ra ua ti‘a ïa te reira ».
I te tahi taime e tae oioi mai te pahonoraa. Ia faanuu a‘era o Thomas Francis e to’na utuafare i Ottawa, ua titauhia ia’na ia haamatau i te hoa apî i roto i te fare haapiiraa apî. Ua pure oia no te farerei i te mau hoa maitai. « I te hoê mahana », te na reira o Thomas, « ua haere maira teie taata no ta‘u piha haapiiraa i mua ia‘u e ua parau maira, ‘E hinaaro anei oe e haere mai e farerei i to‘u mau hoa ?’ E mai taua taime ra, ua riro matou ei mau hoa. Ua riro te reira ei tautururaa rahi no‘u ».
Te vai ra te tahi ohipa faufaa ta Dawson Lybbert e hinaaro e parau no ni‘a i te mau pahonoraa i te mau pure. Te parau ra oia e, « I te tahi taime aita outou e farii i te pahonoraa ta outou e tia‘i ra, tera râ, e farii outou i te pahonoraa tei au ia outou ». Ua parau oia e i te tahi taime eita outou e ite i taua taime ra, e nehenehe râ outou e ite mai te mea e hi‘o outou i muri.
Hoê Taata no te Paraparau atu
E rave rahi mau tamarii o tei parau e, e mea au mau ia pure amui te hoê utuafare. E mea au na Kyffin de Souza ia ite e, te pure amui nei to’na utuafare pauroa te pô. « Te vai ra ta matou tapura no te faaohuraa i te taata pure. Ua farii au i te Varua, e ua ite au e, mai te mea e, aita vau to te fare, te pure ra ïa ratou no‘u ia paruru noa vau ».
E mea au roa na Bénédicte Bélizaire ia pure i piha‘i iho i to’na na metua i te mau poipoi atoa. « E haere au i roto i to raua piha, e e pure matou », ta’na ïa parau. « E iteraa papû to‘u e, tei piha‘i iho te Varua Maitai ia‘u, e mai te mea e, e hinaaro vau i Ta’na tauturu, e ani ïa vau i te Metua i te Ao ra no te reira ».
Te parau ra to’na hoa o Ruth Decady, « E mea faufaa roa ia pure ana‘e tatou i to tatou pure, ia ite tatou e, te faaroo mai nei te Metua i te Ao ra. Te vai ra hoê taata i reira no outou ».
E mea au na Katie Cameron ia ite i te faaururaa a te pure. « I paraparau ana‘e au i te Fatu, mai te mea ra e, te vai ra hoê taata e hinaaro nei e paraparau ia‘u. Ua ite au e, e nehenehe ta‘u e parau Ia’na i te mau mea atoa ».
Te mau Pure no Vetahi ê
Ua paraparau te feia apî tamaroa – te mau tahu‘a ihoa râ mai ia Ronan Filamont, Fred King, e o Dawson e o Davin Lybbert – no ni‘a i te auraa e te ohipa mo‘a o te horo‘araa i te pure o te oro‘a mo‘a no te mau melo o ta ratou paroita e te amaa.
Te parau ra o Dawson e, « Te pureraa i ni‘a i te oro‘a mo‘a na te reira e faahaamana‘o maramarama’tu â no ni‘a i to’na auraa. Te mau nei au i te reira mana autahu‘araa, e te feruri nei au e, eita e ti‘a ia‘u ia hamani ino i te reira ».
Te haamana‘o nei o Fred i to’na pureraa i te pure oro‘a i muri noa iho i to’na faatoro‘a-raa-hia ei tahu‘a: »E mea teimaha roa i te haamataraa, e ua tamau noa vau i te rave i te hape. I te hoê taime ua titauhia ia‘u ia haamata faahou na ni‘a iho. Tera râ, ua muhumuhu maira te Varua ia‘u e, aita e hi‘oraa ehia taime i titauhia ia tamata; i te pae hopea e afaro te reira. E mea au mau te no te feruriraa ».
E Titau te Pure i te Faaineineraa
E rave rahi mau tamarii apî tei paraparau no ni‘a i te mea faufaa te ti‘a ia ratou ia rave no te faaineine ia pure. Te vai ra ta Matt Larson hoê irava tei tapirihia i ni‘a i te papa‘i o to’na piha taotoraa, Parau Haapiiraa e te Parau Fafau 78:19: « E o oia o te farii mai i te mau mea atoa mai te mauruuru e faahanahanahia ïa; e e amuihia te mau mea no teie nei ao ia’na ra, e ia hanere a‘e te tufaa apî, oia, e ia rahi noa’tu ». Na te reira e faahaamana‘o ia’na ia mauruuru no te mau mea ta te Fatu i horo‘a ia’na. Ua ite oia e, e mea ti‘a ia vai te aau mauruuru i roto i ta’na mau pure.
Te parau ra o Nick Moolenbeck e, « Eita te pure e manuia mai te mea e, e haapa‘o noa vau i te ani ma te feruri papû ore e ma te ore e tuu i to‘u aau e to‘u varua i roto ».
Te Mana Semeio o te Pure
E aamu nehenehe roa ta Sierra Lybbert no ni‘a i te pure. E piti matahiti to’na, a taahihia ai to’na rima e te puaahorofenua. Ua mutu taa ê to’na manimani rima rahi, e e rave rahi manimani rima tei mutu. Ua horo haere noa na metua mai te tahi fare ma‘i i te tahi fare ma‘i no te imi i te hoê taote tapu o te hinaaro e tata‘i i te hoê mea mai te mea ra e, eita e nehenehe e tata‘i. Ua parau oia e, « Ua parau te hoê taote i na metua e, aita te taote tapu i farii i te hoê noa a‘e pure ia manuïa oia. Ua parau atura to‘u mama ia’na e, aita te taote tapu i farii hoê pure – ua farii râ e rave rahi pure. Ua niuniu to‘u metua vahine i te hiero no te ani ia tuuhia to‘u i‘oa i ni‘a i te tapura pureraa ».
I teie nei, i te 13 matahiti, e ha‘uti faahou te rima o Sierra. E ohipa faahou to’na rimarima rahi, e ua afa‘i oia i ni‘a ia ite mai te tahi mau tamahine o te paroita. Aitâ ratou i faaroo a‘e nei i te reira aamu. Ta ratou noa e ite i ni‘a i te rima o Sierra o te hoê ïa tapu na‘ina‘i roa eita e ite-maitai-hia te haati ra i te tumu o te manimani rima rahi. E mea maere mau te ohipa i ravehia.
Te parau ra o Sierra e, « Ua riro ïa ei oaoaraa na‘u ia ite i te ohipa ta te pure e rave no‘u. E ohipa nehenehe mau i roto i to‘u oraraa ».
Mai te mea ra e, ua hoê te mana‘o o te mau taata atoa ia parau o Kale Loftus e, « Te pure o te hoê ïa peu nehenehe o te titauhia ia farii ».
I ni‘a nei: Ua ite o Bridgitte Leger, Jenni Holt, Dawson Lybbert, Dayna Conway, Rebekah Wagoner, e o Alexander Richer-Brule, e te tahi atu feia apî no te Tĭtĭ no Ottawa Ontario (aui) e, te tauturu no ô mai i te Metua i te Ao ra, tei roto noa ïa i te pure.
I ni‘a nei, na ni‘a roa: ua farii o Fred King e o Ronan Filamont e, e mea mo‘a te pure o te oro‘a mo‘a e e mea ti‘a ia faahiti i te reira ma te faatura. Ua oaoa o Kyffin de Souza no te mau pureraa utuafare.
Te pure nei te feia apî no Ottawa no te ani i te tamahanahana i te mau taime fifi, no te tauturu i roto i te mau ohipa no te haapiiraa e no te mau hoa, e no te mau haamaitairaa ta ratou e hinaaro ra. Ua ite ratou e, e pahono te Metua i te Ao ra i ta ratou mau pure. « I te tahi taime eita outou e farii i te pahonoraa ta outou e tia‘i ra », te parau ïa a Dawson Lybbert, « tera râ, e farii outou i te pahonoraa e titauhia no outou ».
I ni‘a nei: Te tai‘o nei o Matt Larson i te hoê irava i piahia i ni‘a i to’na papa‘i hou a pure ai, e te parau nei o Nick Moolenbeck e, e titauhia te itoito no te pure.
I ni‘a nei na te aui: Ua farii o Ruth Decady, Katya Gallant, e o Bénédicte Bélizaire e, e mana‘o maitai roa ia ani i te Metua i te Ao ra ia tono mai i te Varua Maitai. I raro nei: ua here roa o Katie Cameron, Carolyn Albers, e o Sierra Lybbert i te faaururaa tei fariihia e ratou a pure ai ratou.
Te Faarooraa, na Michael Jarvis Nelson
Te mau hoho‘a na Janet Thomas