Netwaye jaden tanp yo

Pa Jozye J. Perkey

Church Magazines

Nan Kentucky, Sid Etazi, li fè cho ak imid pandan ete a. Yon jou moun yo te remake ke limon vèt t ap pouse sou kloti ki antoure tanp Louisville la nan Kentcky. Epi se pa t yon ti kras—te gen anpil!

Konsa timoun primè yo nan Dezyèm Pawas Crestwood la nan Pye Luisville Kentucky te deside pou fè yon bagay konsènan sa. Yon bèl jou nan mwa Jen an yo te fè yon aktivite. Sara M., laj 10 an, di, “Nou te pran twal ak bokit ak savon pou n netwaye kloti a epi ede kenbe kay Pè Selès la pwòp.” Tout kò l te mouye men “sa te enteressan paske tout zanmi nou yo te la.”

Josh H., laj 9 an, di li te yon tijan fatige nan netwaye pati anlè nan kloti a. Men li te jwenn anpil èd. Anfèt, preske tout timoun primè yo te vini, apeprè 75 an tou. Anpil te mennen frè ak sè yo ak manman yo ak papa yo pou ede.

Timoun yo te konnen yo te nan lakou tanp lan, konsa yo te eseye rete reveran. Epi yo youn pa t plenyen pou travay di. Megan H., laj 6 an, di, “Nou te oblije fwote vrèman anpil paske tach yo te la depi yon bon tan. M te konnen nou t ap pran swen kay Papa nou ki nan syèl la.”

Sara te santi l menm jan an. Li di, “M te vrèman santi Lespri a paske m te konnen Pè Selès la te kontan nou t ap fè sa.”

Apre travay la te fini, gwoup la te rasanble nan bilding legliz la akote a pou manje sosis epi pale sou sa yo te aprann.

Timoun yo nan primè a pa ka tann pou yo ka ale nan tanp la pou tèt pa yo pou fè batèm pou mò yo. Men pou kounyeya, yo kontan konnen yo te ede deyò tanp lan parèt bèl—egzakteman jan kay Pè Selès la ta dwe ye.