Mesaj Premye Prezidans
Jwenn fòs atravè obeyisans
Nan mond nou an jodi a, aksan an se sou jèn. Tout moun anvi parèt jèn, santi yo jèn, epi rete jèn. Anfèt, gwo montan lajan depanse chak ane pou pwodui ke moun yo espere k pral retabli aparans yo pou fè yo rajeni. Konsa nou ta ka poze tèt nou kesyon: “Èske rechèch rajenisman sa a se yon bagay nouvo pou epòk nou an, pou jenerasyon nou an?” Nou senpleman bezwen gade atravè paj listwa yo pou jwenn repons nou.
Sa gen dè syèk, nan gwo epòk eksplorasyon an, ekspedisyon te òganize epi bato ki te gen ekipaj konfyan ak entrepid te konn fè vwal sou lanmè enkoni alarechèch yon vrè fontèn jenès. Yon lejann nan epòk la te pwomèt ke yon kote nan “peyi lwenten” yo te gen yon fontèn majik ki te gen dlo ki te pi pi k egziste, e tout sa yon moun te gen pou fè pou rejwenn vigè jenès yo ak pou kenbe vigè sa a sete bwè pwofondeman nan dlo ki t ap koule soti nan fontèn sa a.
Ponce de León, ki te navige avèk Kolon, te fè anpil vwayaj eksplorasyon apresa, ap chèche nan zòn Bahamas ak lòt zòn nan Karayib yo pandan l te totalman kwè nan lejann ki di yo kapab jwenn siwo jenès sa a. Efò li, menmjan ak pa anpil lòt moun, pa t mennen nan yon dekouvèt konsa, paske nan plan diven Bondye nou an, nou antre nan egzistans mòtèl la pou nou goute lajenès yon sèl fwa.
Fontèn verite a
Malgre ke gen okenn fontèn lajenès nou ta ka an tout sajès al chèche, gen yon lòt fontèn ki gen dlo ki pi presye toujou, ki se dlo lavi etènèl yo. Sa se fontèn verite a.
Yon powèt te kaptire sans reyèl rechèch verite a lè l te ekri pawòl imòtèl sa yo:
Wi, di mwen, kisa ki verite? Se pi bon rekonpans lan
Ke moun mòtèl yo oswa Bondye yo kapab aspire.
Al chèche nan pwofondè kote l briye yo,
Oubyen monte al chèche nan syèl ki pi wo yo:
’se yon aspirasyon pou dezi ki pi nòb la. …
Epi di, kisa verite ye? ‘Se dènye a ak premye a,
Paske verite pa chanje avèk letan.
Menmsi syèl yo disparèt epi fontèn yo sou tè a eklate,
Verite, sòm egzistans lan, ap simonte kalamite k pi mal yo,
Etènèl, enchanjab, ajamè.1
Nan yon revelasyon Pwofèt Joseph Smith te resevwa nan Kirtland, Ohio, an Me 1833, Senyè a te deklare:
“Verite se konesans bagay jan yo ye, epi jan yo te ye, ak jan yo pral vin ye ; …
“Lespri verite a se pou Bondye. … Li [Jezi] te resevwa plenitid verite a; …
“Epi pèsonn pa resevwa plenitid la san li pa respekte kòmandman l yo.
“Yon moun ki respekte kòmandman l yo resevwa verite ak limyè, jistan l glorifye nan verite epi l konnen tout bagay.”2
Pa gen okenn rezon pou ou menm avèk mwen nan epòk eklere sa a, kote plenitid levanjil la retabli a, navige sou lanmè enkoni oubyen vwayaje sou wout enkoni alarechèch fontèn verite a. Paske yon Papa eman ki nan Syèl la deja trase wout nou epi li ba nou yon kat enfayib—obeyisans!
Pawòl revele li dekri byen klè benediksyon obeyisans pote ak chagren ak dezespwa ki akonpaye vwayajè ki detounen al nan wout entèdi peche ak erè yo. Pou yon jenerasyon ki te plonje nan tradisyon sakrifis bèt, Samyèl te deklare klèman: “Pito yon moun obeyi pase l touye bèt, pito l soumèt devan Bondye pase l ofri grès belye yo.”3
Pwofèt yo, ansyen ak modèn, toujou konnen fòs ki vini atravè obeyisans. Panse ak Nefi: “M prale e m ap fè bagay Senyè a te kòmande yo.”4 Oswa bèl deskripsyon fòs pitit gason Mozya yo te posede:
“Yo te grandi nan konesans verite a, paske se te dèzòm entèlijan, e yo te fouye ekriti yo avèk dilijans pou yo kapab konnen pawòl Bondye.
“Men, se pa tout la sa; yo te lage kò yo nan anpil priyè ak jèn; se poutèt sa, yo te gen lespri pwofesi ak lespri revelasyon, e lè yo te preche, yo te preche avèk pouvwa ak otorite Bondye.”5
Respekte kòmandman yo
Nan youn nan mesaj li te bay manm Legliz yo nan ouvèti yon konferans jeneral, Prezidan David O. McKay (1873–1970) te banou direksyon pou epòk nou an trè senpleman men avèk anpil puisans: “Respekte kòmandman Bondye yo.”6
Sete esansyèl mesaj Sovè a tou lè l te deklare: “Paske tout moun ki resevwa yon benediksyon nan men m dwe obeyi lalwa ki gen rapò avèk benediksyon sa a, ak kondisyon yo jan sa te tabli anvan fondasyon mond lan.”7
Aksyon menm Mèt la te fè yo demontre pawòl li yo. Li te demontre amou sensè pou Bondye nan viv yon lavi pafè, nan onore misyon sakre li te genyen an. Li pa t janm te awongan. Li pa t janm te gonfle ak lògèy. Li pa t janm te dezonèt. Li te toujou enb. Li te toujou sensè. Li te toujou vrè.
Malgre ke li te tante pa mèt twonpri a, ki se dyab la; malgre li te febli fizikman paske l te jene pandan 40 jou ak 40 nuit epi “apresa li te vin grangou”; lè dyab la te ofri Jezi pwopozisyon trè atiran ak tantan yo, li te banou yon egzanp obeyisans divin kote l te refize devye soti nan sa li te konnen ki te dwat.8
Lè l t ap fè fas ak agoni Jetsemane a, kote li te andire kalite lapenn ki te fè syè nan kò li te vide tankou gwo degout san ap tonbe atè, li te montre egzanp yon Pitit obeyisan kote l te di: “Papa, si ou vle, tanpri, wete gode soufrans sa a devan je mwen. Men, se pa volonte pa m ki pou fèt, se volonte pa ou.”9
A Pyè nan Galile, Jezi te di: “Suiv mwen.” A Filip te vin menm enstriksyon an: “Suiv mwen.” Epi pou Levi, pibliken an, ki te chita nan biwo kontribisyon an, te vini menm apèl atiran an: “Suiv mwen.” Epi menm pou youn ki te kouri dèyè li, youn ki te gen anpil byen, pawòl sa yo te vini: “Suiv mwen.”10 Epi pou nou menm avèk mwen, menm vwa sa a, menm Jezi sa a, di: “Suiv mwen.” Èske nou dispoze pou n obeyi?
Obeyisans se karakteristik pwofèt yo, men nou dwe reyalize ke sous fòs sa a disponib pou nou jodi a.
Yon egzanp modèn
Yon moun ki te byen aprann leson obeyisans lan, ki te jwenn fontèn verite a, sete yon mesye janti epi sensè ki te nan kondisyon enb anpil. Li te antre Legliz la an Ewòp epi, pa ekonomi ak sakrifis dilijan, li te imigre vin Amerik dinò—nan yon nouvo peyi, yon lang etranj, koutim diferan, men menm Legliz la sou direksyon menm Senyè a, ke li te kwè ak obeyi a. Li te vin prezidan branch yon ti gwoup Sen ki t ap lite nan yon vil ki te yon ti jan ostil. Li te suiv pwogram Legliz la, malgre manm yo pa t anpil epi tach yo te anpil. Li te tabli yon egzanp pou manm branch li yo ki te vrèman kretyen, epi yo te reponn avèk yon lanmou moun wè raman.
Li t ap travay avèk tèt li kòm komèsan. Mwayen l te limite anpil, men li te toujou peye yon dim konplè ak epi li te bay plis don. Li te kòmanse yon fon misyonè nan ti branch li a, epi pandan kat mwa, li sete sèl moun ki te kontribye ladan. Lè te gen misyonè nan vil li a, li te nouri yo, epi yo pa t janm kite lakay li san l pa t bay yon bagay pou travay yo ak byennèt yo. Manm Legliz ki te soti byen lwen ki te konn pase pa vil li a epi vizite branch li a te toujou resevwa ospitalite li ak chalè lespri li epi yo te kontinye wout yo konesan ke yo te rankontre yon moun espesyal, yon sèvite obeyisan Senyè a.
Moun ki te prezide sou li yo te resevwa respè pwofon li ak swen ekstra espesyal li. Pou li menm yo sete reprezantan Senyè a; li te pran swen konfò fizik yo epi li te espesyalman sousye pou yo nan priyè li—ki te anpil—pou byennèt yo. Yon jou Saba, kèk dirijan k t ap vizite branch li a te patisipe avèk li nan priyè li ki te plis pase yon douzèn ak nan vizit li te fè manm yo. Dirijan yo te kite li nan fen jounen an avèk yon santiman elevasyon ak edifikasyon espirityèl ki te kenbe yo kontan pandan tout yon vwayaj katrèdtan nan tanperati fredi livè a epi ki, jis kounyeya, apre anpil ane, rechofe lespri yo ak kè yo lè y ap sonje jou sa a.
Moun save, moun eksperyans te chèche wè mesye enb, iletre Bondye sa a epi yo te konte tèt yo kòm moun ki gen chans si yo te ka pase inèdtan avèk li. Aparans li te òdinè; Anglè li pa t twò bon epi li te pafwa difisil pou konprann; lakay li te senp. Li pa t gen machin ni televizyon. Li pa t ekri okenn liv ni fè okenn diskou briyan ni li pa t fè okenn nan bagay mond lan bay atansyon yo. Men moun fidèl te chèche wout kay li. Poukisa? Paske yo te anvi bwè nan fontèn verite l la. Yo te apresye non pa sitèlman sa l te di men sa l te fè, non pa sibstans diskou li te preche yo men fòs lavi li te mennen.
Konnen ke yon pòv mesye toujou bay Senyè a avèk tout kè li omwen defwa yon dizyèm te bay yon moun yon vizyon pi klè sou vrè sans dim nan. Gade li k ap pran swen moun grangou epi resevwa etranje a te fè yon moun konnen ke li te fè sa l t ap fè pou Mèt la. Priye avèk li epi pataje konfyans li sou entèsesyon divin sete fè eksperyans yon nouvèl metòd kominikasyon.
Se konsa nou kapab di ke li te respekte premye ak pi gran kòmandman an ak dezyèm nan ki gen menm enpòtans avèk li,11 ke zantray li te chaje avèk charite pou tout moun, ke vèti te gani panse li san rete epi, pa konsekan, konfyans li te grandi anpil nan prezans Bondye.12
Mesye sa a te gen reyònman bonte a ak ekla lajistis. Fòs li te soti nan obeyisans.
Fòs n ap chèche avèk tout fòs nou an jodi a pou n fè fas ak yon mond konplèks epi chanjan an kapab pa nou lè, avèk fòs ak kouraj rezoli, nou kanpe epi nou deklare tankou Jozye: “Pou mwen man ak tout moun lakay mwen, na pral sèvi Senyè a.”13
Agoch: foto pa Matthew Reier; Imaj Kris la, pa Heinrich Hofmann, koutwazi C. Harrison Conroy Co.; adwat: ilistrasyon pa Jerry Thompson
Detay soti nan Kris aple Pyè ak Andre, pa James Taylor Haywood, koutwazi Mize Istorik Legliz la