Te tape‘araa i te mau Aa Paari

Melsida Hakobyan, Armenia

I te tau e tamahine haere haapiiraa vau i Rusia, ua tai‘o vau i te hoê aamu ri‘ari‘a no ni‘a e piti tamaroa tei farerei i te hoê pea i roto i te uru raau. E rave rahi matahiti i muri a‘e, i to‘u riroraa mai ei orometua haapii, ua ani maira te tahi mau hoa ia‘u ia amui atu ia ratou i roto i te hoê tere no te ohi i te taria iore. E mea ri‘ari‘a na‘u te uru raau, tera râ, ua farii au ia haere na muri iho ia ratou.

Ia tomo a‘era matou i roto i te uru raau, ua rave a‘era vau i te hoê raau ia nehenehe ia‘u ia paruru ia‘u ia farerei au i te pea. Aita i maoro ua ite a‘era to‘u mau hoa i te taria iore ravarava ta ratou e imi ra. Area o vau ra, ua ma‘imi au i te taria iore e mea uteute te ni‘araa, e no reira, ua haere au e ma‘imi na te tahi atu vahi. Hou a ite ai au, o vau ana‘e ïa i taua taime ra.

I to‘u ma‘imi-haere-noa-raa, ua hee au e ua topa i raro. Ua pee ta‘u faarii taria iore, tera râ, ua tape‘a maitai au i ta‘u raau. I to‘u tamataraa e ti‘a i ni‘a, ua ite a‘era vau e, e mea vari vari rii te repo e te piripiri. I to‘u ri‘ari‘a rahi, ua ite a‘era vau e, ua haere au i roto i te vahi repo paruparu! Ua î a‘era to‘u na tiaa poiti i te pape, e ua haamata vau i te tomo i raro. Ua tamata vau i te hauti i to‘u na avae, tera râ, aita te reira i faaora ia‘u, ua rahi atu râ te tomoraa i raro. Ia tae a‘era te repo i to‘u aoao, ua tupu te măta‘u rahi i roto ia‘u.

Ua tuou vau i to‘u mau hoa, tera râ, te pahonoraa ta‘u i faaroo, no roto mai ïa i te teni rere e te ta‘i a te mau rana. I to‘u haamataraa i te ta‘i, ua haamana‘o a‘era vau i to‘u mama ruau. I te mau taime atoa e topa oia i roto i te ati, e pure oia. E mea pinepine oia i te ani ia‘u ia pure, tera râ, ua pato‘i noa vau, ma te parau e, « Aita e Atua ».

Tera râ, i roto i to‘u menema pape, aita e ohipa ê atu te ti‘a ia‘u ia rave maori râ ia pure e ia ti‘aoro i te tauturu a te Atua. « Mai te mea e, te ora nei Oe, a tauturu mai ia‘u! » Ua ta‘i au.

Aita i maoro ua faaroo vau i te hoê reo i te parauraa mai ia‘u e, « A ti‘aturi e eiaha e măta‘u. A haru i te aa paari o te tumu raau ».

I to‘u hi‘oraa ati a‘e ia‘u, ua ite atura vau i te hoê aa raau rahi i muri mai ia‘u. Ma te faaohipa i ta‘u raau, ua nehenehe ia‘u ia tape‘a i ni‘a i te aa. E te vai ra te hoê mea tei horo‘a mai i te puai i roto ia‘u no te huti ia‘u iho i rapae i te vari paruparu.

Ua î roa vau i te vari, ua topa vau i ni‘a i te repo e ua haamaitai au i te Atua no te pahonoraa mai i ta‘u pure. I teie nei te ti‘aturi nei au e, te ora nei oia. Ua ite au i To’na varua, e ua faaroo i To’na reo, e ua horo‘a mai oia ia‘u i te puai no te huti ia‘u iho.

Tau taime i muri mai, i te taime a haapii ai te mau misionare rave tamau ia‘u e, ua farii te Peropheta Iosepha Semita i te hoê pahonoraa i ta’na pure i roto i te Uru Raau Mo‘a, ua ti‘aturi au i ta ratou parau. Ua pahono mai te Atua i ta‘u pure i roto i te hoê uru raau. Ua tape‘a vau i ni‘a i te mau aa paari o te evanelia, e ua bapetizohia i muri iho, e te tavini nei au i teie mahana i roto i te Amaa no Gyumri i Aramenia.

Ua ite au e, te here nei te Metua i te Ao ra i Ta’na mau tamarii paatoa, e te mauruuru nei au ia riro ei melo no te Ekalesia a Iesu Mesia i te Feia Mo‘a i te mau Mahana Hopea nei. Te mauruuru atoa nei au no te rahiraa haamaitairaa ta‘u i farii no ô mai i te Metua i te Ao ra ra, Ta’na hoa râ pahonoraa i te pure a te hoê taata ti‘aturi ore i te Atua i roto i te uru raau e rave rahi matahiti i ma‘iri ra.

Ia tae a‘era te repo i to‘u aoao, ua tupu a‘era te măta‘u rahi i roto ia‘u. Ua tuou vau i to‘u mau hoa, tera râ, te pahonoraa ta‘u i faaroo, no roto mai ïa i te teni rere e te ta‘i a te mau rana.