Fòtifye lòt moun ak tèt pa mwen

Cathy Whitaker Marshall, Washington, Etazini

Sete fèt Aksyondegras an 1990. M te fèk fini ak yon divòs difisil, epi m te nan premyè ane lekòl pou m etidye avoka nan yon lòt vil. Pitit m yo te pral ale lakay papa yo pou sezon fèt la, epi pou premye fwa nan lavi mwen, m ta pral poukont mwen pou fèt Aksyondegras.

Tou dabò m te anvi santi regrè epi m te fè yon bon kriye. Men apresa m te kòmanse konte benediksyon m yo. M te gen de bèl pitit, yon bèl kay, yon opòtinite pou gen konesans, ak levanjil Jezikri a pou gide lavi mwen. M te vrèman beni nan anpil bagay.

Lè fèt Aksyondegras la t ap apwoche, m te dekouvri ke yon gwoup etidyan dwa te planifye pou ale nan yon misyon lokal pou ede sèvi yon dine pou moun sanzabri yo bonè jou fèt Aksyondegras la. M te deside ke ede nan misyon sa a t ap pi bon pase chita lakay la pou kont mwen nan tristès, konsa m t ale avèk kòlèg etidyan m yo.

Kèk jou apre, m te twouve m ap mete pòmdetè nan asyèt moun ki te grangou, moun lavi yo te tèt anba, ki te rekonesan. Dlo ki te gonfle nan je m yo se pa t poutèt tritès m te santi pou tèt mwen, men, sete dlo lanmou pou tout pitit Bondye yo, kelkeswa sitiyasyon yo.

Fèt Aksyondegras pa ta p fèt Aksyondegras san yon kodenn nan fou a. Men yon kodenn 14-liv (6 kilo) t ap twòp pou mwen, konsa m te envite plizyè etidyan ki te soti nan lòt peyi ak eta byen lwen pou yo te vin lakay mwen. M te vle pataje yon dine Aksyondegras Ameriken tradisyonèl, men m te envite yo pou yo kontribye. M te mande yo chak pou pote yon pla favori peyi pa yo. Dine Aksyondegras nou an te vin tounen yon repa enteresan ak inoubliyab—pen espesyal ak lòt bagay.

Wa Benjamen te deklare, “Gade, m di nou bagay sa yo pou nou kapab aprann lasajès; pou nou kapab aprann lè n ap sèvi pwochen nou yo, se sèlman nan sèvis Bondye nou ye.” Mozya 2:17

M te aprann sajès nan jou fèt Aksyondegras sa a. Nan ofri sèvis lè l te pi fasil pou m rete lakay mwen ap pran pitye pou tèt mwen, m te jwenn lajwa. Sèvis se kle pou bonè non sèlman pandan konje, lè l fasil pou w ap panse ak sa k manke nan lavi nou, men tou pandan nenpòt sezon. Kèlkeswa sitiyasyon nou, nou ka toujou jwenn yon moun pou n ede. Lè nou fòtifye frè nou ak sè nou yo, nou fòtifye tèt nou tou.

M te deside ke ede nan yon misyon t ap pi bon pase chita lakay pou kont mwen ak nan tristès. Kèk jou apre m te twouve m ap mete pòmdetè nan asyèt moun ki grangou.