Privilèj mwen pou sèvi
Anvan pòt Tanp Recife a nan Brezil te louvri pou yon lòt jounen ap administre òdonans Sali yo, María José de Araújo ki gen 70 an, leve pou prepare l pou yon lòt jou sèvis dezenterese.
Pou ale nan tanp lan, María oblije vwayaje inèdtan edmi nan kat bis separe soti lakay li nan Cabo de Santo Agostinho, nan sid Recife, sou kot Nòdès Brezil la. Men anvan li ale, li prepare manje ak lòt nesesite pou yon kouzen avèg l ap okipe lakay li.
Cleto P. Oliveira, grefye tanp lan, di: “María se yon bon egzanp sou sèvi lòt moun. Depi tanp lan te konsakre a an Desanm 2000 la, li pòte l volontè pou sèvi isit la chak jou tanp lan louvri. Li vini menm lè vakans.”
Soti 7:00 a.m. rive 3:00 p.m. chak Madi rive Samdi, María travay nan kafeterya tanp lan, ap lave asyèt ak fè salad. Li di li ta ka travay pi plis tan, men avèk wout long nan bis la pou ale lakay li a, li oblije kite bonè pou l ka retounen lakay anvan l fènwa.
Frè Oliveira di María li pa bezwen vini nan tanp lan chak jou, men li admèt ke l ap oblije chèche de moun pou ranplase li. Li di: “Li senpleman souri epi l di li dedikase lavi li bay Senyè a.”
Pou María, sèvi nan tanp lan chak jou se yon gwo privilèj.
Li di: “Papa mwen ki nan Syèl la beni m avèk bon sante, epi objektif mwen se pou kontinye vini chak jou osi lontan sante m pèmèt mwen. Mwen te fè yon alyans pou dedye tout talan mwen ak kapasite mwen pou sèvi Senyè a. Lè m rive lakay mwen apre m fin sèvi nan tanp lan, mwen pa santi m fatige. Senyè a beni mwen nan fason sa a.”
Anvan sa, pandan l t ap sèvi pandan sizan nan sant istwa familyal pawas li, María te fè rechèch linyaj fanmi li. Epi, nan plizyè Samdi maten anvan l kòmanse travay nan kafeterya nan tanp lan, li te fè travay tanp pa pwokirasyon pou kat jenerasyon zansèt fi li. Li te fè travay pou kat jenerasyon zansèt gason tou.
Lè l te kòmanse rechèch istwa familyal li, María te santi ke tach la te enposib—espesyalman lè l pa t kapab detèmine non de gran gran paran. Men yon jou swa, yo te revele l non konplè yo nan yon rèv. Toudabò li te mande tèt li si non yo te kòrèk, men pandan l t ap chèche pami rejis manman l yo, li te jwenn non yo e l te kapab fè koneksyon familyal yo ki te chape l yo. Li kwè ke rèv la te vini kòm benediksyon pou efò li pou sèvi Senyè a ak pitit li yo.
María di: “Tanp lan se lavi mwen. Moun ki pa vin nan tanp yo rate yon gwo opòtinite ak benediksyon. Nan sèvi nan tanp, nou vin konprann bi reyèl ak pouvwa tanp lan.”
María José de Araújo di: “Moun ki pa vin nan tanp yo rate yon gwo opòtinite ak benediksyon.”
Grefye tanp lan, Cleto P. Oliveira, ki adwat nan foto a avèk María a, di ke María José de Araújo, ki volontè chak jou nan Tanp Recife a nan Brezil “se yon bon egzanp sou sèvi lòt moun.”
Foto pa Michael R. Morris, eksepte si note; foto Tanp Recife a nan Brezil pa R. Val Johnson