To‘u Haamaitairaa ia Tavini
Hou a matara ai te mau uputa o te Hiero no Recife Brazil no te tahi â mahana raveraa i te mau oro‘a faaoraraa, ua ti‘a o María José de Araújo i ni‘a, e 70 matahiti te paari, no te faaineine ia’na no te tahi â mahana taviniraa ma te titau ore i ta’na.
No te haere i te hiero, ua titauhia ia Maria ia ratere hoê hora e te afa te maoro i ni‘a e maha pereoo uta taata taa ê mai to’na fare i Cabo de Santo Agostinho, i te pae apatoa o Recife, i te pae apatoerau hitia o te râ no Brazil. Tera râ, na mua a‘e a reva ai oia, e faaineine oia i te maa e i te tahi atu mau mea e hinaarohia no te hoê tamarii matapô ta’na e haapa‘o.
« Ua riro o Maria ei hi‘oraa maitai roa no te parau no te taviniraa ia vetahi ê », te parau ïa a Cleto P. Oliveira, te papa‘i parau rahi o te hiero. « Mai te taime a haamo‘ahia ai te hiero i te ava‘e titema 2000, ua haere tamau noa mai oia i te mau mahana atoa a matara ai te hiero. E haere atoa mai oia i te mau mahana faafaaearaa ».
Pauroa te mahana piti e tae atu i te mahana maa, mai te hora 7H00 e tae atu i te hora 3H00, e rave o Maria i te ohipa i roto i te piha tamaaraa, no te tamâ i te au‘a e no te faaineine i te ‘salade’. Ua hinaaro oia e rave noa’tu â, ta’na ïa parau, tera râ, no te ho‘iraa i te fare na ni‘a i te pereoo utaraa taata e mea ti‘a ia’na ia faaoti oioi, ia tae oia i te fare na mua a‘e i te pô.
Ua parau te Taea‘e Olivera ia Maria e, aita i titauhia ia’na ia haere mai i te hiero i te mau mahana atoa, tera râ, ua ite atoa oia e, e titauhia e piti taata no te mono ia Maria. « Ua ataata noa oia e ua parau maira e, ua haamo‘a oia i to’na oraraa i te Fatu », te parau ïa a Olivera.
No Maria, ua riro te taviniraa i roto i te hiero i te mau mahana atoa ei haamaitairaa rahi roa.
« Ua horo‘a mai to‘u Metua i te Ao ra i te tino maitai ia‘u, e ta‘u titauraa maori râ, ia tamau noa i te haere mai i te mau mahana atoa vaivai noa a‘e to‘u tino maitai », te na reira ra oia. « Ua fafau vau ia horo‘a i to‘u mau tareni atoa e to‘u ite no te tavini i te Fatu. Ia tae au i te fare i muri a‘e i te raveraa i te ohipa i roto i te hiero, aita vau e rohirohi. Na te Fatu tera haamaitairaa ia‘u ».
Na mua’tu, a tavini ai oia e ono matahiti i roto i te pû aamu utuafare o ta’na paroita, ua tuatapapa o Maria i to’na mau tupuna. I muri iho, e rave rahi mau po‘ipo‘i mahana maa, hou a haere oia e rave i te ohipa i roto i te piha tamaaraa o te hiero, ua haere oia e rave i te mau oro‘a hiero ei mono no te mau tupuna vahine no na u‘i e maha. Ua ani atoa oia ia ravehia te mau oro‘a o te mau tupuna tane no na u‘i e maha.
I to’na haamataraa e maimi i to’na aamu utuafare, ua feruri o Maria e – eita e oti, te tumu, no te mea aita e itehia ia’na te i‘oa o na metua ruau e piti no’na ra. Tera râ, i te hoê po, ua heheuhia mai ia’na to raua i‘oa taatoa i roto i to’na moemoea. I te haamataraa, ua uiui oia e, ua tano anei taua nau i‘oa ra, i to’na râ imiraa i roto i te mau parau a to’na mama, ua itehia a‘era ia’na te mau i‘oa e ua ti‘a ia’na ia faatuati i te mau utuafare tei vai noa na ma te taamuraa ore. Ua ti‘aturi oia e, ua riro taua moemoea ra ei haamaitairaa no to’na taviniraa i te Fatu e i Ta’na mau tamarii.
Te parau ra o Maria e, « Te hiero, to‘u ïa ora », « Te feia aita e haere mai i te hiero, te ere ra ïa ratou i te hoê rave‘a rahi e te haamaitairaa. Na roto i te taviniraa i roto i te hiero, e roaa ia tatou te ite i te auraa mau e te mana o te hiero ».
« Te feia aita e haere mai i te hiero, te ere ra ïa ratou i te hoê rave‘a rahi e te haamaitairaa », te parau ïa a María José de Araújo.
Ua horo‘a o María José de Araújo, i to’na taime i te mau mahana atoa i roto i te Hiero no Recife Brazil, e « ua riro ei hi‘oraa maitai no te parau no te taviniraa ia vetahi ê », te na reira ra te papa‘i parau rahi o te hiero o Cleto P. Oliveira, teie te hoho‘a i te pae atau i piha‘i iho ia María.
Te mau hoho‘a na Michael R. Morris, eiaha râ mai tei papa‘ihia; photograph of Recife Brazil Temple by R. Val Johnson