Te Rao nakon te Rao
Tembora Bon Bwaaintituaraoi mairoun Tamara are i Karawa
Man Eberi 2007 kabwarabwara n te maungatabu ni kabuta.
Ataei ni kabane ake a mate imwain rokoia n te ririki ni bukinaki a bon kamaiuaki i karawa n te abanuea ae tiretio (tara D&C 137:10).
Tabeua ririki n nako, I a karekea te katabeaki n te maungatabu n te titeiki i California. N ara tai ni kiba n okira Utah, te aine ae tikiraoi ae tei -70 n ririki e tekateka irarikiu. Aran neiei bon Patti, ao e tatangiria n taetae.
E tuangai Patti taekaia ni kabane ana utu—taekan buuna ao natina te mwaane ae a tia ni mate. E reitinako ara maroro ni karokoa ae ti nang tiku. I taku, “Patti, ko a tia n taetae n angin te tai ni kiba. Imwain ae ti tiku i Salt Lake City, I kan titirakiniko tabeua titiraki.”
I titirakinna neiei ni koaua, “Patti, ko ataia ae ko na manga noora buum are e a tia ni mate?”
E taku neiei, “O, e bon kona n riki anne?”
Imwina I a titiraki, “Ko ataia ae kona manga noora natim te mwaane are e a tia ni mate, Matt, are e mate ngke te ataei?”
E a mataranran neiei, ao e a ruru bwanaana. E a ringaki n Tamnein te Uea. E a tia n rangi n nanokawaki neiei ibukiia.
Imwina I tataro man titirakina neiei, “Patti, ko ataia ae iai Tamam are i Karawa, ae moan te tangiriko?”
E taku neiei, “Iai Tamau?”
I titirakinna, “Patti, ko ataia ae Tamam are i Karawa iai ana babaire ibukim bwa am utu e na kona n ae akea tokina?”
“Ti kona?” e kaeka neiei.
“Ko a tia n ongo te babaire aei mai mwaina?” I titiraki.
E taku neiei,“I tuai.”
Ma nanou ni koaua I a titirakina neiei, “Ko kan ata taekana?”
“Eng, I bon tangiria,” e kaeka neiei.
E bon ringaki ni koaua n Tamnein te Uea.
A reireina Patti taian mitinare. Teniua te wiiki imwina, ngke e bon tiku i Utah, e a tarebooniai Patti: “Te Tari Kikuchi, aei bon Patti. N nang bwabetitoaki. Ko kona n roko n au taromauri ni bwabetito?”
Ngai ma kainabau ti nako ni kaea bwabetitoan neiei. A mwaiti kaain te aro ake a kaota te iraorao nakon neiei. O, N na bon aki kona ni mwaninga kukurein moamoana ngke e otirake man te ran!
N na bon aki kona ni mwaninga rannimatana ni kukurei n te baonikarea ae tabu n te Salt Lake Tembora teuana te ririki imwina. I uringa aron itiakina ae moan te rau mani mimitong ngke e a kabaeaki ma buuna are e a tia ni mate ao natina te mwaane ao natina te aine ae maiu, ngaia are e a kaman kaaina te Ekaretia.
Raoraou ae Patti e kunea te Uea Iesu Kristo. Ma ibukin te kabaeaki n te tembora, ngkai neiei e a ataia bwa ana utu bon akea tokina inanon te Uea.