Te buka apî no te mau hoho‘a no te evanelia
Te vai nei i teie nei te hoê buka natihia i te niuniu taviriviri, tei roto i reira 137 hoho‘a peni ta te Feia Mo‘a i te mau Mahana Hopea nei e nehenehe e faaohipa no te haapii atu e no te haapii mai i te evanelia.
Te vai ra i roto i te piha toro‘a o te Peresideni Thomas S. Monson te hoê hoho‘a peni o te Faaora tei papa‘ihia e te taata papa‘i hoho‘a o Heinrich Hofmann. Te parau ra te peropheta e, te faahaamana‘o mai nei teie hoho‘a peni ia’na ia rave i te ohipa ta te Faaora e hinaaro ia rave oia. E nehenehe ta te hoho‘a e faatupu i te hoê haaputapûraa puai i ni‘a ia tatou tata‘itahi, mai ta teie hoho‘a peni i na reira i ni‘a i te Peresideni Monson.
Ia au i te mana‘o ia horo‘a i te mau melo i te mau hoho‘a no te faaohipa i roto i te mau piha haapiiraa a te Ekalesia e i roto i to tatou mau utuafare, ua hamani te Ekalesia i teie Buka no te mau hoho‘a no te evanelia 137 hoho‘a peni e te tahi mau hoho‘a patahia. E nehenehe teie mau hoho‘a ia riro ei tautururaa i te mau haapiiraa e haapiihia i te mau huru vahi atoa mai te Haapiiraa a te Feia Paari haere roa’tu i te taime horo‘araa a te Paraimere. E nehenehe atoa te reira e faaohipahia i roto i te po utuafare, te tai‘oraa papa‘iraa mo‘a a te hoê taata, te ohipa misionare, e te ohipa hahaereraa utuafare.
Ua riro te hoho‘a tata‘itahi i roto i teie buka ei taime haapiiraa —ei rave‘a no te faati‘a i te hoê aamu no roto i te papa‘iraa mo‘a e no te haapii i te hoê parau tumu. No te tauturu ia tatou, tei roto i te Buka no te mau hoho‘a no te evanelia te hoê tapura faatuatiraa i te mau hoho‘a i ni‘a i to ratou aamu i roto i te papa‘iraa mo‘a. Na roto i te imiraa i te reira mau papa‘iraa mo‘a, e faahohonu te reira i to tatou iteraa i te mau ohipa e i te mau parau tumu i faahoho‘ahia i roto i te hoho‘a tata‘itahi.
Teie i raro nei e toru rave‘a no te faaohiparaa i te Buka no te mau hoho‘a no te evanelia no te haapii i te hoê haapiiraa:
-
A ani te taata ia imi i te mau irava i taatihia i ni‘a i te hoê hoho‘a. A ani ia ratou ia tai‘o haapuai i te irava e aora râ, ia haapoto i te reira a paraparau amui ai outou i ni‘a i te reira hoho‘a.
-
A ani i te taata ia faaite mai i te mea ta ratou e ite ra i roto i te hoê hoho‘a. Eaha te mau parau tumu o te evanelia ta te reira hoho‘a e haapii ra ? E nahea tatou ia faaohipa i te reira mau parau tumu i roto i to tatou oraraa i teie mahana ?
-
I muri a‘e i te haapiiraa i te hoê parau tumu o te evanelia, a ani ia vetahi ê ia imi i roto i te Buka no te mau hoho‘a no te evanelia, i te mau hoho‘a e faahoho‘a i te reira parau tumu. A ui i te taata eaha to ratou mana‘o ia hi‘o ana‘e ratou i te hoho‘a i te mea e, ua aparau outou i ni‘a i to’na auraa.
I roto i ta tatou mau haapiiraa’tu e te haapiiraa mai i te evanelia, a titau i te faaururaa na roto i te pure (a hi‘o PH&PF 42:14–17). Ia na reira ana‘e tatou, e horo‘a mai te Varua Maitai i te tahi atu mau mana‘o i roto i to tatou feruriraa no te pahono i te hinaaro o te mau taata ta tatou e haapii nei. Ua riro te Buka no te mau hoho‘a no te evanelia apî ei mauhaa faufaa roa o te nehenehe e tauturu ia tatou ia tauturu te tahi e te tahi ia haere mai i te Mesia ra e ia farii i te mau haamaitairaa o te ora mure ore.
Mai te aui: Hoho‘a o te Mesia, na Heinrich Hofmann, horo‘araa a C. Harrison Conroy Co.; hoho‘a faahoho‘araa na Matthew Reier, Hyun-Gyu Lee, e o Christina Smith