Mirak tòtiya a
“Vini, an nou monte nou mòn Senyè a, nan kay …Bondye a” 2 Nefi 12:3.
De jèn gason abiye ak chemiz blan ak kravat te vini lakay nou nan Ondiras. yo te di, “Nou se manm Legliz Jezikri pou Sen Dènye Jou yo.”
Manmi te envite yo antre. Misyonè yo te anseye fanmi nou levanjil Jezikri a. Malgre m te gen nevan sèlman, m te santi verite pawòl sa yo nan kè mwen.
Papi te mande, “Kisa nou dwe fè pou vin manm legliz Kris la?”
Youn nan èldè yo te reponn, “Vin batize.”
Manmi, papi avèk mwen te batize yon mwa apre. Frè m nan, Tomas, ki te gen sizan, t ap gen pou batize nan dezan apre.
Pandan yo t ap anseye nou plis sou levanjil la, èldè yo te eksplike kijan fanmi te ka sele ansanm nan tanp.
Tanp ki te pi pre a sete nan Gwatemala, sou plizyè kilomèt distans. Nou t ap gen pou peye pou yon vwayaj de jou nan bis ak de nuit nan otèl nan vil la. Nou pa t gen okenn lajan pou kalite vwayaj sa a, men manmi ak papi te refize kite sa anpeche nou ale nan tanp.
Chak ane fanmi nou te konn plante mayi. Nou te itilize l pou fè tòtiya pou vann vwayajè ki pase nan vilaj nou an.
Manmi te rale papye ak kreyon li. Li te adisyone chif yo epi li te di, “Nou dwe vann 2, 500 tòtiya pou peye vwayaj nou an.”
Je m te ouvè tou gran. Tout kantite tòtiya sa yo! M te di, “Nou pa t janm vann tout kantite tòtiya sa a.”
Manmi pa t sanble enkyete. Li te di, “Senyè a ap banou mwayen yo.” Manmi te di m, “Raoul, ou menm ak Tomas dwe ede papi rekòlte mayi a.”
Tomas avèk mwen te ede Papi rekòlte mayi a. Chak jou, manmi te moulen li, fè pat la, epi seche l. Tomas avèk mwen te pote tòtiya yo nan vilaj la.
Lè nou te retounen lakay nan premye jou a, m te di manmi, “yon bis touris te vini jodia. Nou vann anpil tòtiya.”
Manmi te di, “Sa se yon mirak.”
Chak jou nou te vann plis tòtiya. Nan espas kèk mwa nou te ekonomize lajan nou te bezwen pou fè vwayaj la ale Gwatemala a. Men m te toujou enkyè. M te konn tande istwa sou vòlè ki te konn rete bis yo pandan y ap travèse jeng lan. Yo te konn pran tout sa pasaje yo te genyen.
M te mande, “E konsènan vòlè yo?”
Manmi te di, “Senyè a ap pwoteje nou.” Apre sa li te mande, “Raoul eske ou kwè nan levanjil la?”
“Wi.”
“Enben ou konnen ke nou dwe fè tout sa ki nan pouvwa nou pou n suiv Senyè a ak pwofèt li yo.”
Yon ane apre nou te fin batize, fanmi m te pare pou fè vwayaj tanp lan. Nou te vwayaje nan yon bis pou ale Gwatemala. M pa p janm bliye Lespri m te santi lè fanmi m te sele ansanm pou letan ak letènite a.
Jou swa sa a, lè m te ajenou pou fè priyè mwen, m te remèsye Pè Selès la pou benediksyon tanp yo.
Ilistrasyon pa Jim Madsen