Taime Faaanaanataeraa

Te Ti‘aturi nei Tatou e na te Atua i Haamau i te Utuafare

« Ua riro te utuafare ei pû no te faanahonahoraa a tei Hamani no te haere mure ore o Ta’na mau tamarii » (« Te Utuafare: E Poro‘i i to te ao nei »).

E taata ino o Amalikia. Ua fafau oia i to te Ati Nephi i te mau mea e rave rahi mai te mea e faariro ratou ia’na ei arii. E rave rahi taata tei ti‘aturi ia’na e fariu ê ratou i te parau ti‘a.

E raatira o Moroni no te nuu Ati Nephi. E taata parau ti‘a oia e ua ti‘aturi ia Iesu Mesia. Ia faaroo a‘era o Moroni e, e rave rahi taata tei ruri-ê-hia e Amalikia, ua riri o Moroni ia’na. Ua ite oia e, e ere te taata i to ratou ti‘amâ.

Ua hahae a‘era o Moroni i te hoê tuhaa o to’na pereue e ua papa‘i i ni‘a iho, « Ei haamana‘oraa i to tatou ra Atua, e ta tatou haapa‘oraa, e to tatou ti‘amâ, e to tatou hau, e ta tatou mau vahine, e ta tatou mau tamarii » (Alama 46:12). Ua taamu ihora oia i te ahu i ni‘a i te hoê raau e ua parau i te reira te te tapa‘o no te ti‘amâ. I muri iho, ua pure oia no te mau taata e ua haere e farerei ia ratou, mai te tahirihiri i te reva o te ti‘amâraa ma te tiaoro i te Ati Nephi ia pee mai ia’na no te paruru i to ratou ti‘amâraa. (A hi‘o Alama 46:1–21.)

Te ora nei outou i te hoê anotau te vai te taata mai ia Amalikia o te hinaaro e ruri ê ia tatou i te faanahonahoraa a te Metua i te Ao ra. Te hoê o te mau tuhaa faufaa roa o taua faanahonahoraa ra o te utuafare ïa.

Te hinaaro nei te Metua i te Ao ra ia ite te mau melo o te Ekalesia i Ta’na faanahonaoraa no te mau utuafare. Ua papa‘i te Peresideniraa Matamua e te Pŭpŭ Tino Ahuru Ma Piti Aposetolo « Te Utuafare: E Poro‘i i to te ao nei » no te faaite i to tatou ti‘aturiraa no ni‘a i te utuafare. Mai te upoo parau o te ti‘amâraa, e nehenehe te faaararaa e faaitoito ia tatou ia haamana‘o e ia faataa i te mea ta tatou e ti‘aturi nei.

Faaoaoaraa

Iriti i te api H4, e a tapiri i ni‘a i te hoê api parau paari a‘e. A faatere i te faaararaa i te hoê vahi e itehia e to outou utuafare e ia haamana‘o i te faufaa i te haapuairaa i te tahi e te tahi.

Mau mana‘o no te Taime Faaanaanataeraa

« Te Utuafare: E Poro‘i i to te ao nei » e heheuraa ïa no teie tau apî. A ani i te mau tamarii ia faaroo ehia rahiraa taime to ratou faarooraa i te mau parau ra « heheu » e aora râ, « heheuhia » a faahiti ai ratou i te hiroa faaroo numera iva. A haapii e, te tamau noa nei te Atua i te heheu mai i To’na hinaaro i Ta’na mau tamarii. E parauhia teie aparauraa no ô mai i te Atua ra e, te heheuraa. A horo‘a i te hoê hoho‘a o « Te Utuafare: E Poro‘i i to te ao nei » i te tamarii tata‘itahi, e a faataa e, te faaararaa, e heheuraa ïa tei horo‘ahia mai i to tatou nei anotau na roto i te mau tavini ma‘itihia o te Atua. A horo‘a i te hoê parau i te piha tata‘itahi e aora râ, no roto mai i te faaararaa ma te faaore i te tahi mau ta‘o. A ani ia ratou ia amui i te raveraa no te faaî i te mau vahi apoo i te parau. Ei hi‘oraa: « Te o te no tei hamani no te haerea mure ore o Ta’na mau tamarii ». A ani i te piha tata‘itahi ia ti‘a mai i ni‘a e ia tai‘o mai i ta ratou marau taatoa. A himene i te irava matamua o « Na te Atua te Utuafare » (Liahona, Atopa 2008, H12–H13). A haapapû e, te faaararaa i ni‘a i te utuafare, e heheuraa ïa no ô mai i te Atua ra e e mea ti‘a ia tatou ia haroaroa e ia haapa‘o i ta’na mau haapiiraa. A ohi i te mau buka faaararaa; e faaohipa faahou outou i te reira i te hepetoma toru.
Te haapii nei « Te Utuafare: E Poro‘i i to te ao nei » i te faufaa o te faaipoiporaa. A ani i te tahi mau melo o te paroita e aora râ, o te amaa faati‘ahia e te episekopo e aora râ, te peresideni amaa ia amui i roto i te hoê tomite aparauraa no ni‘a i te faufaa o te faaipoiporaa (a hi‘o « Tomite Aparauraa », Te Haapiiraa, Aita e Piiraa hau A‘e [1999], 175–76). A horo‘a atea ia ratou i te mau uiraa ta outou e ui. Hi‘oraa: E mea nahea to te Metua i te Ao ra haamaitairaa ia oe e to oe hoa faaipoipo ? E ti‘a anei ia oe ia faaite mai i te hoê aamu no ni‘a i te hoê haapiiraa o te evanelia tei tauturu ia oe ia riro ei vahine maitai (e aora râ, ei tane) ? Eaha te ti‘a i te mau tamarii ia rave i teie nei no te faaineine ia faaipoipohia ratou i te hoê mahana ? E nehenehe oe e ani ia ratou ia hi‘o i « Te Utuafare: E Poro‘i i to te ao nei. A vaiiho i te mau tamarii ia ma‘iti e ia tai‘o i te hoê uiraa. A vaiiho i te mau melo ia horo‘a mai i ta ratou mau pahonoraa. A faaite i te iteraa papû no ni‘a i te faufaa o te faaipoiporaa i roto i te faanahonahoraa a te Metua i te Ao ra.

Faahoho‘araa na Matthew Reier