Te hoê faaroo ohie e te faaroo hinaaro mau no te ti‘aturi
Ua afa‘i mai te oraraa i te evanelia i te mau mahana atoa i te aau mârû e titauhia no te farii i te ohie e i te hinaaro mau i te ti‘aturi i te parau a te Atua.
I te mau ava‘e e rave rahi i ma‘iri nei, ua pinepine to‘u feruriraa i te hutihia’tu e te hoê irava tei papa‘ihia i roto i te Helamana, pene 6. « E te ite nei tatou e, te ninii ra te Atua i to’na Varua i ni‘a i te ati Lamana, no to ratou faaroo ohie e to ratou faaroo hinaaro mau i ta’na ra mau parau » (irava 36).
A tai‘o ai au i teie irava i roto i ta‘u taime tuatapaparaa ua putapu roa to‘u aau e o tei haaferuri ia‘u e rave rahi mau hebedoma. Ua haamata vau i te uiui e ua ite anei au e e mea ohie i te ti‘aturi i te parau a te Atua. E no teaha i ohie ai no teie mau Ati Lamana i faafariuhia i te ti‘aturi ? Eaha te tumu i noaa ai i te hoê nunaa tei î i te au ore e te haapa‘o ore te hoê faaroo ohie e te hinaaro mau i te ti‘aturi i te parau a te Atua ? (a hi‘o 4 Nephi 1:39)
Ua haapii mai tatou i te tumu no teie tauiraa i roto i te hoê matahiti faahiahia. I te 62raa o te matahiti i te tavanaraa te mau haava, ua faafariuhia e 8.000 Ati Lamana i Zarahemela a haapii ai o Nephi e o Lehi ma te mana rahi e te toro‘a e i te mea i ti‘a ia raua i te haapii atu (a hi‘o Helamana 5:18-19). Ua faafariuhia e toru hanere atu mau taata na roto i te hoê semeio i reira ho‘i to ratou faarooraa i te hoê reo tei haaputapu roa ia ratou (a hi‘o Helamana 5:30). Ua haere atu teie nei na 300 taata e taparahi ia Nephi e ia Lehi te parahi ra i roto i te fare tape‘araa, tera ra ua itehia’tu e te pii ra raua i te Atua a haamana‘o e a ite ai o Aminadaba, te hoê ati Nephi tahito tei taiva i te Ekalesia, e mea ti‘a ia ratou ia pure e tae noa’tu ua roaa to ratou faaroo i te Mesia (a hi‘o Helamana 5:35-41). E rave rahi atu â mau Ati Lamana tei faafariuhia na roto i te iteraa papû a teie nei e 300 taata a haapii ai ratou i te nunaa ma te parau i te mea ta ratou i ite mata e i faaroo (a hi‘o Helamana 5:49-50).
Ua hope te 62raa o te matahiti na roto i teie nei parau : « E tupu a‘e ra teie nei mau mea, e ua riro te rahi o te Ati Lamana ei feia parau-ti‘a » (Helamana 6:1).
Na te maitai o to ratou faafariuraa i arata‘i i teie nei mau Ati Lamana i te haapae i to ratou inoino i te Ati Nephi e ta ratou mau mauhaa tama‘i (a hi‘o Helamana 5:51) ; ua mau maite ratou i to ratou faaroo ma te aueue ore (a hi‘o Helamana 6:1) ; ua haapa‘o maitai ratou i te mau faaueraa e ua haere ratou i te parau mau e te parau-ti‘a (a hi‘o Helamana 6:34) ; e ua tupu rahi to ratou ite i te Atua (a hi‘o Helamana 6:34).
E te mea maere roa na‘u o to ratou ïa faaroo ohie e te faaroo hinaaro mau i te ti‘aturi i te parau a te Atua. Na teie nei faaroo ohie e te faaroo hinaaro mau i te ti‘aturi i afa‘i rahi mai te Varua ia ratou e tei tauturu ia ratou i te tape‘a-noa-raa ma te faaroo e tae noa’tu i te hopea (a hi‘o Helamana 15:5-9).
Te mea oto roa i roto i te reira ihoa area taime e rave rahi o te Ati Nephi tei riro mai ei feia etaeta, te tatarahapa ore e te parau-ino (Helamana 6:2 ; a hi‘o atoa te mau irava 31-34). Te mea ta te Ati Lamana i ore i faaruru na e te tupu ra ïa i rotopu i te Ati Nephi. No te etaeta o to ratou aau ua faataa-ê-hia te Varua Maitai i te Ati Nephi (a hi‘o Helamana 6:35), e no te mârû o te aau o te Ati Lamana i niniihia ai te Varua.
A feruri ai au i te tumu no teie nei tauiraa rahi i roto i te aau o teie nei mau Ati Lamana, ua ite vau e teie nei faaroo ohie e te faaroo hinaaro mau i te ti‘aturi i te parau a te Atua no roto mai ïa i te aau mârû. No roto mai ïa i te hoê aau au i te Varua Maitai. No roto mai ïa i te hoê aau o te nehenehe e here. No roto mai ïa i te hoê aau o te rave e o te haapa‘o i te mau fafauraa mo‘a. No roto mai ïa i te hoê aau mârû o te nehenehe e ite i te mana no te taraehara a te Mesia.
Teie nei faaroo ohie i te ti‘aturi no roto mai ïa i te hi‘oraa maitai o te feia e aau mârû e te hoho‘a no teie faaroo ohie no te ti‘aturi, mai ia Nephi e ia Lehi te huru. Ua topa to raua metua tane Helamana i to raua i‘oa o Nephi e o Lehi no te faahaamana‘o ia raua te faaroo o to raua mau tupuna (a hi‘o Helamana 5:6). No reira, e rave rahi o tatou tei roto i to tatou mau i‘oa te hoê faufaa ai‘a no te faaroo o te mau tupuna tei mârû te aau e tei ite e mea ohie i te ti‘aturi i te parau a te Atua. Ua riro te tahi o ratou mai to‘u metua tupuna o Ephraim K. Hanks, i to’na iteraa e ua « amui atu to’na teina i te mau momoni », ua rave oia i te faaotiraa ia faaho‘i mai ia’na i te fare. E ere roa ra i te mea maere, ua haere atu o Ephraim i Nauvoo e ua bapetizohia oia i muri noa‘e i to’na faarooraa i to’na taea‘e i te faaiteraa i to’na iteraa papû no ni‘a ia Iosepha Semita e te evanelia tei faaho‘ihia mai (a hi Richard K. Hanks, « Eph Hanks, Pioneer Scout master’s thesis Brigham Young University, 1973, 18-21).
Ua haamata‘ihia tatou e te tahi atu mau taata i roto i te mau papa‘iraa mo‘a tei haapii mai ia tatou nahea e nehenehe ai ia tatou ia noaa te hoê faaroo ohie e te faaroo hinaaro mau i te ti‘aturi. Ua riro o Nephi, te tamaiti a Lehi, ei hoê hi‘oraa maitai. Te ohipa matamua ta’na i rave i to’na faarooraa i to’na metua tane i te haapiiraa no ni‘a i te haamouraa o Ierusalema o te pii-hua-raa ïa i te Fatu e tae noa’tu ua mârû to’na aau e ua ti‘aturi oia i te mau parau atoa tei parauhia e to’na ra metua tane (a hi‘o 1 Nephi 2:16). Ua parau ti‘a’tu te Fatu ia Nephi i te na ôraa e, « e ao to oe, e Nephi, no to oe na faaroo, ua imi maite ho‘i oe ia‘u nei ma te aau haehaa » (1 Nephi 2:19). Ua haapii Nephi i te faufaa rahi no te hinaaro e te itoito i te haapa‘oraa i te mau faaueraa e te pii-hua-raa i te Atua ia noaa ia’na te aravihi i te parau ohie e, « e haere au e rave » (1 Nephi 3:7).
Na roto mai ia Enosa ua haapii mai tatou i te faufaa rahi no te faati‘araa i te mau parau a te Atua ia tomo hohonu roa i roto i to tatou aau e tae roa’tu ua hiaai tatou i te parau mau (a hi‘o Enosa 1:3-4). E tae mai te faaroo ohie i te ti‘aturi ia papa‘i-ana‘e-hia te parau a te Atua i roto i to tatou aau (a hi‘o Ieremia 31:33 ; 2 Korinetia 3:3).
I roto i te hi‘oraa o te metua tane o Lamoni, te haapii mai nei tatou i te faufaa rahi no te hoê aau mârû tei hinaaro mau i te taui. Ua ineine te metua tane o Lamoni i te horo‘a i te afaraa o to’na basileia no Amona no te faaora i to’na ora (Alama 20:21-23). I muri a‘e ua ani o Amona ia faati‘ahia i te arii Lamoni ia haamori mai te au i to’na hinaaro i roto i to’na iho basileia, ua faaturorirori te maitai e te hanahana o te mau parau a Amona i te feruriraa e te aau o te arii (a hi‘o Alama 20:24 ; 22:3). A tae ai o Aarona no te haapii i te arii, ua taui to’na aau e ua roaa ia’na te faaroo ohie i te ti‘aturi a parau ai oia ia Aarona, « inaha, e faaroo ïa vau » (Alama 22:7). I reira ua faaite oia i to’na hinaaro e faarue i ta’na mau faufaa atoa, e tae noa’tu i te faarueraa i to’na basileia, ia roaa ia’na te oaoa o te Fatu (a hi‘o Alama 22:15). I to’na pure-matamua-raa ua pûpû oia i te mea ta te Metua i te Ao ra i hinaaro a parau ai oia, « e haapae atu vau i ta‘u atoa ra hara ia ite au ia oe na » (Alama 22:18). E tae mai te hoê faaroo ohie e te faaroo hinaaro mau i te ti‘aturi i te parau a te Atua na roto i te tarahaparaa e te haapa‘oraa.
E faaite mai te hi‘opo‘araa i to tatou mau oraraa i te mau taime i ite ai tatou i te ohie i te ti‘aturi i te parau a te Atua. Te mau tau no te tauiraa rahi, mai te faaipoiporaa aore râ te fanauraa no te hoê aiû, te mau tau taviniraa u‘ana no te hoê piiraa apî aore râ te hoê misioni, te mau tau i piha‘iho i te hoê episekopo faahiahia i to tatou apîraa, te feia faatere no te feia apî e te mau orometua no te haapiiraa evanelia, te mau taime tamataraa, te mau taime hoturaa a haapiihia ai no te taime matamua i te evanelia e mau tau ana‘e ïa no te ohie i te ti‘aturi. Peneia‘e te tau hau atu i te faufaa rahi o te tamarii-rii-raa ïa. Ei tamarii ua ite au i te ohie i te ti‘aturi i te parau a te Atua tei haapiihia ia‘u e te mau metua e te mau tupuna itoito. Eiaha e maere e ua a‘ohia tatou ia riro mai te mau tamarii rii no te farii i te ora mure ore (a hi‘o 3 Nephi 11:38). Eiaha e maere e ua haapiihia tatou ia haapii i ta tatou mau tamarii i roto i te maramarama e te parau mau (PH&PF 93:40).
Mai te mea ua riro outou mai ia‘u te huru, e ite ïa outou e te mea o tei afa‘i mai i te faaroo ohie e te faaroo hinaaro mau i te ti‘aturi e ere ïa o te huru o te oraraa, o te faaotiraa râ ia ora i te evanelia i roto i teie nei mau tau no te oraraa. Ua ite-pinepine-hia outou i ni‘a i to outou mau turi avae e te tai‘o hohonu ra i te mau papa‘iraa mo‘a i roto i te reira mau tau. Ua ite outou e e mea ohie i te haaputuputu no te pureraa pô utuafare e no te pure utuafare. Ua ite outou e e mea ohie ia tae i roto i te fare pureraa e ia haamori i roto i te hiero. Ua ite outou e e mea ohie i te aufau i te tuhaa ahuru e te mau ô. Oia mau, ua afa‘i mai te oraraa i te evanelia i te mau mahana atoa i te aau mârû e titauhia no te farii i te ohie e i te hinaaro mau i te ti‘aturi i te parau a te Atua.
To‘u iteraa papû oia ho‘i te mau haapiiraa a to tatou peropheta e a te mau aposetolo i roto i teie nei amuiraa, mai te mea e ravehia, e arata‘i te reira i te hoê ti‘aturaa ohie e te hinaaro mau i te parau a te Atua. Ua a‘ohia tatou ia haamori i roto i te hiero ; ia haapuai i te mau utuafare na roto ho‘i i te pure utuafare, te tai‘oraa i te mau papa‘iraa mo‘a e te pureraa pô utuafare, ia tavini ma te itoito i roto i te mau piiraa no te autahu‘araa e i roto i te Ekalesia, ia aufau i te tuhaa ahuru e te mau ô, ia faaroo e ia pure ia arata‘ihia, e ia ora ti‘amâ no te hoaraa i te Varua Maitai.
E mea pinepine tatou mai ia Naamana te huru, te taata lepera no Syria tei tonohia e te peropheta i Iseraela ia tamâhia. I to Elisaia tonoraa i te hoê ve‘a ma te faaueraa ia hopu e hitu a‘e taime i roto i te Anavai no Ioridana, ua riri a‘e ra o Naamana. Aua‘e râ e tavini to’na tei parau, « ahiri anei ei parau rahi ta taua peropheta ra i parau mai ia oe, e ore anei oe e rave i te reira ? a tae atu ai i tena na parau, a hopu, a mâ’tu ai ? » (Te mau Arii 2 5:13).
Te faaite papû nei au e e tae mai teie ohieraa e teie hinaaroraa mau i te ti‘aturi na roto i te raveraa i taua mau mea ha‘iha‘i ra tei haapiihia ia tatou mai to tatou apîraa. E afa‘i mai te haapa‘oraa i te aau mârû e te hoê tiaturiraa ohie i te parau a te Atua. Te faaite nei au i to’u iteraa papû e e afa‘i mai te hoê ti‘aturiraa ohie i te hoê niniiraa o te Varua.
E nehenehe te hoê hi‘opo‘araa e ravehia no te faito i to tatou faaroo ohie e te faaroo hinaaro mau i te ti‘aturi i te mau hebedoma atoa a haere ai tatou i te pureraa oro‘a. I te reira pureraa e faaapî tatou i te mau fafauraa na roto i te faaiteraa i to tatou hinaaro mau i te rave i ni‘a iho ia tatou te i‘oa o te Mesia, ia haamana‘o noa Ia’na, e ia haapa‘o i Ta’na ra mau faaue (a hi‘o PH&PF 20:77). A parahi ai tatou i roto i te pureraa oro‘a, e mea ohie ïa na tatou i te rave i teie nei mau fafauraa e i te faaroo e i te haapii-ohie-raa na roto i te Varua Maitai.
Ua hiaai au i te farii i te Varua o te Fatu ia niniihia mai i ni‘a iho ia‘u no to‘u « faaroo ohie e to’u faaroo hinaaro mau i te ti‘aturi i ta’na ra mau parau ». Ua ite au e ua faaara teie nei irava ia‘u e ia ite au i ta‘u « hopoi‘a i te Atua » – e e ti‘a ia‘u ia auraro e ia riro ei taata mârû, ei taata a‘o-ohie-hia, tei î i te faaoroma‘i… te itoito i te haapa‘oraa i te mau faaueraa i te mau mahana atoa ra… i te haamaitairaa i te Atua no te mau mea atoa [ta‘u] i farii ma te faaea ore (a hi‘o Alama 7:22-23).
Ia ite tamau noa outou e mea ohie i te ti‘aturi i Ta’na ra parau. Ia faaite ohie outou, mai ia‘u, e o Iesu te Tamaiti a te Atua. O Oia to tatou Tia‘i Mamoe, e ia ite te feia e faaroo ohie e e faaroo hinaaro mau i te ti‘aturi i To’na ra reo. Na roto i te i‘oa o Iesu Mesia, amene.