Te tape‘araa i te tauiraa puai o te aau
No te tape‘a noa e tae noa’tu i te hopea, e ti‘a ia tatou ia hinaaro mau i te haapopou i te Atua e i te haamori Ia’na ma te puai e te here rahi.
I te ava‘e titema 1967, ua manuïa te tauiraa mafatu matamua o tei ravehia i Cape Town, i Afirita Apatoa. Ua iritihia te mafatu ma‘i o te taata i fatata i te pohe e ua monohia’tu i te hoê mafatu ora maitai o te hoê taata pohe. Mai te reira mai â taime, ua hau atu i te 75 tauasini tauiraa mafatu tei ravehia i roto i te ao taatoa nei.
I roto i te tauiraa mafatu tata‘itahi, e taa ihoa i te tino o te taata ma‘i e e mafatu ê teie e e haamata oia i te aro atu i te reira. Ia ore ana‘e e hi‘opo‘a-maite-hia, e pato‘i te huru natura o te tino i te mafatu apî e e pohe ïa taua taata ra. E nehenehe ta te raau e arai i teie huru natura, e ti‘a râ ia rave-maitai-hia te mau raau i te mau mahana tata‘itahi atoa. Hau atu i te reira, e ti‘a ia hi‘opo‘a-maite-hia te huru o te mafatu apî, e i te tahi mau taime, e faahaerehia te hoê uaua hi‘opo‘a i roto i te mafatu e e ravehia mai te tahi tuhaa iti o te i‘o o te mafatu no te hi‘opo‘a i raro a‘e i te hi‘o faarahi. Ia ite-ana‘e-hia te mau tapa‘o pato‘i, e faatiti‘aifarohia ïa te mau raau. Mai te mea e ite-oioi-hia te ohipa pato‘iraa, e nehenehe ia te pohe e araihia.
Te mea maere, te tau‘a ore nei te tahi mau taata ma‘i i to ratou mafatu apî. Aita ratou e rave tamau nei i ta ratou mau raau e aita ho‘i e haere tamau nei i ta ratou mau hi‘opo‘araa e titauhia. Te mana‘o nei ratou e no te mea te ora maitai nei ratou, e mea maitai ïa te mau mea atoa. Te rahiraa o te taime, na teie huru tau‘a-ore-raa e tuu nei i te mau taata ma‘i i roto i te fifi e te haapoto nei i to ratou mau oraraa.
E nehenehe ta te hoê tauiraa mafatu e faaroa â e rave rahi mau matahiti i te oraraa o te mau taata e pohe ra no te hoê fifi mafatu. Tera râ e ere ia teie te « tauiraa rahi roa‘e », mai ta te ve‘a Time i pii i te matahiti 1967 ra.1 Te tauiraa tei tupu e ere ïa i te hoê « faahuru-ê-raa o te aau » i te pae tino, i te pae varua râ.2
Na roto i te taraehara a te Mesia e te haapa‘oraa i te mau ture e te mau oro‘a no te evanelia, te farii nei tatou i teie tauiraa rahi roa‘e, teie faahuru-ê-raa pae varua o te aau. Ei hopearaa no ta tatou mau raveraa hara, ua ma‘ihia e ua etaeta to tatou mau aau varua, o te hopoi mai ia tatou te pohe pae varua e te faataa-ê-raa ia tatou i to tatou Metua i te Ao ra. Ua haamaramarama mai te Fatu no ni‘a i te ohipa ta tatou e hinaaro paatoa nei : « E horo‘a atoa vau ia outou te hoê aau apî, e e tuu atu vau i te hoê varua apî i roto ia outou : E e iriti ê atu vau i te aau etaeta mai roto atu i to outou i‘o, e e horo‘a atu vau ia outou te hoê aau i‘o ».3
Mai te mau taata tei tauihia te mafatu, teie tauiraa o to tatou mau aau varua o te haamataraa noa. E mea titauhia te tatarahaparaa, te bapetizoraa, e te haamauraa, aita râ i nava‘i. Oia mau, ia aifaito, aore râ ia rahi atu â, e ti‘a ïa ia ravehia te atuaturaa na roto i te hoê faahuru-ê-raa o te aau i te pae varua eiaha râ na roto i te hoê tauiraa i te mafatu i te pae tino, mai te mea e hinaaro tatou ia mau papû e tae noa’tu i te hopea. Na roto ana‘e i teie raveraa e nehenehe ai tatou ia ore ia faahapahia i te taime no te haavaraa.4
E riro te tape‘a-maite-raa e tae noa’tu i te hopea ei mea fifi no te mea te huru o te taata tino nei o te pato‘iraa ïa i te tauiraa pae varua e te haapaariraa atoa i te aau. Eiaha e maere i te faaararaa a te Fatu no te hara e, « … Oia ïa, e ia ara atoa ho‘i te feia i haamo‘ahia ra… ».5
Ua ite paatoa tatou i te mau taata tei taui puai i to ratou ra aau e tei topa atu i muri iho i roto i te huru o te taata tino. Aita ratou i haapa‘o maitai i ta ratou haamoriraa e to ratou here i te Atua, ua etaeta to ratou mau aau, e no reira ua haafifi ratou i to ratou ora mure ore.
Te horo‘a mai nei te oraraa o te mau taata tei faafariuhia na roto i te pororaa evanelia a te mau tamaiti a Mosia i te tahi mau hi‘oraa e nahea i te ape i te pato‘iraa i te aau varua tei faahuru-ê-puai-hia. Te tai‘o nei tatou no ni‘a i teie mau taata « … tei faafariuhia mai i te ite i te parau mau ra, na roto i te a‘oraa a Amona e to’na ra mau taea‘e… e i te Fatu ra, aita i taiva ».6
Nahea ra ïa ratou i manuïa ai i te tape‘a-maite-raa e tae noa’tu i te hopea ? ua ite râ tatou e ua « … itea-atoa-hia ratou no to ratou itoito i ta te Atua, e i ta te taata ho‘i ; e feia parau-mau e te haapa‘o maitai ho‘i ratou i te mau mea atoa ra ; e ua tamau maite ratou i te faaroo ia Iesu ra e tae noa’tu i te hopea ».7
E au ra ua riro to ratou itoito i te Atua ei faaiteraa i te hoê anaanataeraa no te haapopou i te Atua e no te haamori Ia’na ma te itoito e te hiaai rahi. Te ratou itoito i te taata nei ei faaiteraa i te hoê anaanataeraa u’ana i te tautururaa e i te taviniraa ia vetahi ê. Te faaite mai ra to ratou huru parau-ti‘a e te haapa‘o maitai i te mau mea atoa e te tape‘a papû maitai nei ratou i ta ratou mau fafauraa e aita ratou i marô i ta ratou mau fafauraa i te Atua aore râ i te taata nei. Ua ite atoa tatou e ua haapii ratou i ta ratou mau tamarii i te evanelia i roto i to ratou mau utuafare. Ua ite tatou e ua tanu ratou i ta ratou mau mauhaa tama‘i, ei faatea-ê-raa ia ratou i te mau faahemaraa.
E mea papû roa e ua hi‘opo‘a pinepine ratou i te huru o to ratou aau varua tei tauihia. Aita ratou i parau noa e e mea maitai te mau mea atoa. Na roto i te hi‘opo‘araa i to ratou mau aau tei tauihia, ua nehenehe ia ratou ia ite oioi noa i te tahi haapaariraa aore râ pato‘iraa o to ratou aau e ia rapaau i te reira.
Ua ui o Alama tamaiti i te tahi mau uiraa i te mau taata no te nunaa a Amona tei taui i to ratou aau varua. Ua ui o Alama, « … i faahuru-ê-hia to outou aau, e ua tupu te hinaaro i te himene i te reo haamaitai o te aroha faaora, te ui atu nei au ia outou, e ua ti‘a anei ia outou i te hinaaro i te reira i teie nei ? »8 Ua ui faahou oia mai te mea e ua nava‘i to ratou haehaa, e ua tatarahia anei ratou i te te‘ote‘o e i te feii, e ua hamani maitai anei ratou i to ratou taata tupu.9 Na roto i te pahono-maitai-raa i te mau uiraa mai teie te huru, e nehenehe ïa ia tatou ia faatiti‘aifaro oioi i te mau hahi-ê-raa i te e‘a afaro e te piriha‘o e ia haapa‘o i ta tatou mau fafauraa ma te afaro.
I te matahiti 1980, ua haere atu to matou utuafare e ora i tera’tu pae o te fare ma‘i i reira vau e haapiihia’i e e rave ai i te ohipa. E ohipa vau i te mau mahana atoa, e tae noa’tu i te mau sabati. Mai te mea e faaoti ta‘u ohipa i te sabati i te hora 2 i te avatea, e nehenehe ta‘u e haere-amui atu e ta‘u vahine faaipoipo e ta‘u tamahine i te fare pureraa no te mau pureraa o te haamata i te hora 2:30.
I te hoê sabati, i roto i te matahiti matamua no ta‘u haapiipiiraa, ua ite au e e faaoti au i te hora 2 ti‘a. Ua ite râ vau e mai te mea e faaea maoro rii au i te fare ma‘i eita ïa vau e haere-amui atu e ta‘u vahine faaipoipo e ta‘u tamahine i te pureraa. Ua nehenehe ïa ia‘u ia ho‘i avae noa i te fare e ia taoto rii. Te tatarahapa nei ia parau e ua na reira ihoa vau. Ua tia‘i vau e tae noa’tu i te hora 2:15 minuti, ua ho‘i maru noa vau i te fare, e ua tarava vau i ni‘a i te parahiraa roa ma te ti‘aturi e e taoto rii. Aita râ vau i vare‘a i te taoto. Ua maere roa e ua pe‘ape‘a roa vau. Mea au roa na’u i te haere i te fare pureraa. Ua ui au ia‘u iho no teaha râ i teie mahana, ua ore te auahi no te iteraa papû e te itoito ta‘u i ite na mua’tu.
Aita i titauhia ia‘u ia feruri maoro. No ta‘u hora ohipa, ua pure e ua tai‘o ha‘umani noa vau i te mau papa‘iraa mo‘a. Ia ti‘a mai au i te po‘ipo‘i, e pure au e e haere atu ai i te ohipa. E mea pinepine e ano‘i te ao i te pô e ia ao faahou na mua a‘e vau e ho‘i ai i te fare i taua ahiahi ra. Ua rohirohi roa ïa vau e vare‘a ïa vau i te taoto hou a pure ai aore râ a tai‘o ai i te mau papa‘iraa mo‘a. Ia te po‘ipo‘i a‘e, haamata faahou teie huru oraraa. Te fifi, aita ïa vau e rave ra i te mau mea tumu tei ti‘a ia‘u ia rave no te tape‘a ia ore to‘u aau tei faafariu-puai-hia ia riro ei ofa‘i.
Ia ti‘a mai au i ni‘a, ua tuturi e ua taparu i te Atua ia faaore mai i ta‘u hara. Ua fafau vau i to‘u Metua i te Ao ra e e taui au. I te mahana i muri mai, ua afa‘i au i te hoê Buka a Moromona i te fare ma‘i. I ni‘a i ta‘u tabula no « te mau mea e rave » i taua mahana ra, e i te mau mahana atoa mai te reira mai â taime, te vai nei e piti ohipa : te pureraa i te po‘ipo‘i e i te pô e te tai‘oraa i te mau papa‘iraa mo‘a. I te tahi mau taime e tae mai te tuiraa pô e e imi vitiviti au i te hoê vahi taata ore no te pure. I te tahi mau mahana, e mea poto roa ta‘u tai‘oraa i te mau papa‘iraa mo‘a. Ua fafau atoa’tu vau i te Metua i te Ao ra e e tamata vau i te haere i te pureraa, noa’tu e ere au i te tahi tuhaa pureraa. I roto i te mau hebedoma i muri mai, ua ho‘i faahou mai te itoito e ua ama u‘ana faahou te auahi no te iteraa papû. Ua fafau vau e e ore roa vau e topa faahou i roto i te herepata varua no te haapa‘o-ore-raa i te mau mea ha‘iha‘i e te haafifiraa i te mau mea mure ore, noa’tu eaha te huru o te oraraa.
No te tape‘a noa e tae noa’tu i te hopea, e ti‘a ia tatou ia hinaaro mau i te haapopou i te Atua e i te haamori Ia’na ma te puai e te here rahi. Oia ho‘i ia tape‘a tatou i te faaroo ia Iesu Mesia na roto i te pure, te tuatapaparaa i te mau papa‘iraa mo‘a, te amuraa i te oro‘a i te mau hebedoma atoa, e ia farii i te Varua Maitai ei hoa tamau no tatou. E ti‘a ia tatou ia tauturu e ia tavini ia vetahi ê ma te itoito, e ia faaite ia ratou i te evanelia. E ti‘a ia tatou ia riro ei feia parau-ti‘a mau e te haapa‘o maitai ho‘i i roto i te mau mea atoa ra, ma te ore roa e ofati i ta tatou mau fafauraa e te Atua aore râ ta tatou mau fafauraa i te taata, noa’tu eaha te huru o te oraraa. E ti‘a ia tatou i roto i to tatou mau utuafare ia paraparau, ia oaoa e ia ai ni‘a i te Mesia ia hinaaro ta tatou mau tamarii – e o tatou iho – ia faaohipa i te taraehara i roto i to tatou mau oraraa.10 E mea ti‘a ia tatou ia ite i te mau faahemaraa e faaruruhia nei e tatou e ia faatea ê te reira ia tatou – i te atea roa. E ti‘a ia tatou ia hi‘opo‘a pinepine i to tatou mau aau tei taui-puai-hia e ia arai i te mau tapa‘o matamua atoa no te aau tau‘a ore.
A haapa‘o maitai i te huru o to outou aau tei tauihia. Te ite ra anei outou te tahi pato‘iraa ei hopea no te huru o te taata tino ia haapa‘o ore ? Mai te mea, e imi i te tahi vahi i reira outou atoa e nehenehe ai e tuturi. A haamana‘o, e rave rahi mau matahiti no te oraraa tahuti e toe ra i ni‘a i teie nei fenua. Eiaha e haamarirau i te mau hotu no te tauiraa rahi roa‘e : te ora mure ore e te faateiteiraa.
Te pure nei au e ia faaohipa noa tatou i te faaroo i te Mesia e ia tape‘a â i te oaoa e tae roa i te hopea »,11 na roto i te i‘oa o Iesu Mesia, amene.