Manava i te amuiraa
Te hinaaro nei matou ia tae te mau melo e rave rahi i te hiero ma te ore e ratere atea.
E au mau taea‘e e au mau tuahine here, te faatae atu nei au i te tapa‘o no to‘u aroha ia outou i te omuaraa o teie amuiraa, te 179raa o te amuiraa rahi afa matahiti a te Ekalesia a Iesu Mesia i te Feia Mo‘a i te Mau Mahana Hopea nei.
E oaoa rahi to‘u i teie pu‘e tau ta tatou e ora nei – e pu‘e tau no te mau rave‘a aravihi i ti‘a ai ia matou ia paraparau atu ia outou ati a‘e te ao nei. Teie te mau hui mana faatere e te feia faatere rahi no te mau pŭpŭ tauturu e parahi nei i roto i te Pû Amuiraa i Roto Miti nei, e o outou ra, te faaroo mai nei ïa i to matou reo na roto i te mau rave‘a rau, mai te ratio, te afata teata, te haapurororaa pee‘utari e te Itenati. Noa’tu e te paraparau atu nei matou ia outou na roto i te reo peretane, te faaroo mai nei râ outou ia matou i roto i na rahiraa reo e 92.
Mai te ava‘e eperera ra o teie matahiti a farerei ai tatou, ua haamo‘a matou i te hiero nehenehe no Oquirrh Mountain Utah i Jordan apatoa, i Utaha nei. I ropu i te haamo‘araa o te hiero no Draper Utah i te ava‘e mati ra, e teie haamo‘araa o te hiero no Oquirrh Mountain Utah i te ava‘e atete nei, ua faatupuhia e piti aru‘i faaiteraa hiro‘a tumu na te feia apî no teie na mataeinaa o te hiero. Te faaite ra te mau ha‘utiraa i te faturaa ai‘a faufaa rahi no Utaha na roto i te himene e te ori. E nehenehe e parau e, tei te area 14.000 feia apî tei amui i roto i teie na aru‘i tauruaraa.
Te tamau noa nei tatou i te patu i te hiero. Te hinaaro nei matou ia tae te mau melo e rave rahi i te hiero ma te ore e ratere atea. I te ao atoa nei, e 83 i ni‘a i te hanere o to tatou mau melo e ora nei i roto i te area e 320 kilometera i te hiero. E haere noa taua faito ra i rahiraa na roto i te paturaa tatou i te mau hiero apî ati a‘e te ao nei. I teie taime, te vai ra 130 hiero e ohipa nei, e e 6 tei faaitehia e aore ra, te hamanihia nei. I teie po‘ipo‘i, te hinaaro nei au e faaara’tu e 5 faahou hiero e te ravehia nei te hooraa mai i te mau fenua, e i roto i te mau ava‘e e te mau matahiti i mua nei e patuhia ai te reira i te mau vahi i muri nei : Brigham City, Utaha ; Concepción, Chile; Fortaleza, Paratira; Fort Lauderdale, Florida; e Sapporo, Tapone.
E rave rahi milioni oro‘a e ravehia nei i roto i te hiero i te mau matahiti atoa no te feia pohe tei herehia e tatou. E mata na tatou i te tamau noa i te rave papû i te reira mau oro‘a no te feia aita e ti‘a ia ratou ia rave no ratou iho. E mea au roa na‘u te mau parau a te peresideni Joseph F. Smith a paraparau ai oia no te ohipa hiero e no te ao varua i ô mai i te tahuti nei. Na ô maira oia : « Na roto i ta tatou ohipa e rave no ratou, e marua ê to ratou mau fifi taamu ia ratou, e e pee ê te po‘iri e haati ra ia ratou, ia ti‘a i te maramarama ia hiti i ni‘a ia ratou, e e faaroo ratou i roto i te ao varua i te ohipa i ravehia no ratou na to ratou mau taata iônei, e e oaoa ratou e o outou i to outou raveraa i teie mau ohipa ».1
E te mau taea‘e e te mau tuahine, te tamau noa nei te Ekalesia i te tupu i te rahi, mai te tau a faati‘ahia ai, oia hau atu i te 179 matahiti i teie nei. Te taui nei te reira i te oraraa o te taata i te mau matahiti atoa e te parare nei na te ao atoa nei na roto i to tatou mau misionare o te imi nei i te feia e imi nei i te parau mau e vai ra i roto i te evanelia a Iesu Mesia. Te pii nei matou i te mau melo atoa o te Ekalesia ia faahoa i te feia faafariu-apî-hia, ia haere ia ratou ra, ia haaati ia ratou i te here e ia tauturu ia ratou ia hau i rotopu ia tatou nei.
Te ani nei au ia tamau noa to outou faaroo e ta outou pure no te mau fenua e ere tatou i te mea puai roa, e i te mau fenua aita tatou e fariihia ia faaite i te evanelia ma te ti‘amâ i teie taime. E nehenehe te semeio e tupu mai te mea e, e na reira tatou.
I teie nei, e au mau taea‘e e au mau tuahine, e hinaaro rahi to tatou ia faaroo i te mau parau poro‘i e vauvauhia mai i mua ia tatou i na mahana e piti e haere mai nei. Te feia e paraparau mai ia tatou, ua titau ratou i te tauturu e te arata‘iraa no te ra‘i ra a faaineine ai ratou i ta ratou mau parau poro‘i. Te pure nei au ia î tatou i te Varua o te Fatu a faaroo ai tatou e a apo ai tatou o ta‘u pure, na roto i te i‘oa o Iesu Mesia ra, amene.