Usa ka Buhat sa Pagkamabination
Ang usa ka tawo wala masayud kon unsay mahimo sa usa ka gamay nga pagkamabination. Usa ka adlaw sa Enero, samtang nangalagad sa Akure sa Nigeria Lagos Mission, ako adunay gamay nga regalo nga akong gusto nga ihatag ngadto sa usa ka tawo. Ako naghunahuna, “Kon si kinsa ang akong hatagan niini aron iya kining mapuslan?” Akong gidala ang regalo ngadto sa simbahan duha na ka Dominggo, apan ako wala pa makadesisyon.
Sa ikatulo nga Dominggo, ako miadto sa simbahan naghunahuna nga ihatag ko kini ngadto sa usa ka maayo nga higala. Siya wala mosimba nianang adlawa, apan ako adunay pagbati nga adunay laing tawo nga nagkinahanglan niini. Nagtan-aw sa palibut sa simbahan, ako nakakita og usa ka batang lalaki kinsang mga ginikanan dili mga miyembro sa Simbahan. Siya mora og magul-anon. Ako mibati nga ihatag kaniya ang regalo. Akong gihatag kini ngadto kaniya, gibati ang dakong kalipay sa kinahiladman.
Usa ka talagsaon nga butang ang nahitabo. Ang iyang inahan miadto sa simbahan pagkasunod Dominggo. Siya nagpasalamat kanako sa regalo. Siya miingon, “Ako kanunay nga nagsaad ngadto sa akong anak nga lalaki nga moabut ang adlaw nga ako mosimba. Karon ako mianhi aron sa pagpakita sa akong pasalamat alang sa regalo.” Niadto nga paagi ang akong kompanyon ug ako nakahimamat kaniya; sukad adto siya nagpamiyembro sa Simbahan. Pagkamalipayon sa batang lalaki nga iyang nakita nga ang iyang mama sa katapusan nabunyagan.
Ako nasayud nga pinaagi sa gagmay nga mga butang ang mga dagko nga butang ipahinabo.