Parau poro‘i na te mau Tuahine Hahaere, Fepuare 2010
Te faatereraa ma te paari i te mau faufaa e te faaearaa i rapae i te tarahu.
A haapii i teie mau papa‘iraa mo‘a e te mau faahitiraa parau e aore râ, mai te mea e hinaarohia, a haapii i te tahi atu parau tumu o te haamaitai i te mau tuahine o ta outou e hahaere ra. A faaite i to outou iteraa papû no te parau haapiiraa. A ani manihini i te feia o ta outou e haapii ra ia faaite atoa i te mea o ta ratou i farii e i haapii mai.
Faatereraa i te mau faufaa
« Te auraa no te ‘Oraraa mitomito’… o te [haaputuraa] ïa i ta tatou mau faufaa, te faanaho-tano-raa i te pae faufaa moni, te mau maa no te ea o te taata iho e te faaineineraa tano i te pae haapiiraa e te faananearaa i te toro‘a, te horo‘araa i te haapa‘o-maitai-raa i te faufaa i te fare e te haaputuraa e tae noa’tu i te faananearaa i te faaotiraa i te pae aehuehu. … Mai te mea e ora tatou ma te paari e ma te mito, e paruruhia ïa tatou i roto i te apu o To’na ra rima ».1
Peresideni Spencer W. Kimball (1895–1985).
« Eaha te mau aravihi o ta tatou e hinaaro no te tauturu ia tatou ia riro ei feia faarava‘i ia tatou iho ? … I te mau mahana matamua o te Ekalesia, ua taparu Brigham Young i te mau tuahine ia haapii e nahea ia paruru i te ma‘i i roto i te mau utuafare, ia faati‘a i te mau raveraa ohipa i te fare iho, ia tape‘a i te mau buka tuatapaparaa moni, e i te tahi atu â mau aravihi faufaa. Te vai noa nei â teie mau parau tumu i teie mahana. Te riro tamau noa nei â te haapiiraa ei mea faufaa. …
« Ua ani au e rave rahi mau episekopo eaha te mau aravihi i te pae faarava‘iraa ia’na iho e hinaaro-roa-hia e te mau tuahine i roto i ta ratou mau paroita e teie te pahonoraa, te tabularaa i te moni. E mea ti‘a ia ite te mau vahine i te mau fifi i te hoo-tarahu-raa e i te oraraa ma te imiraa moni ore. Te piti o te aravihi i tapurahia e te mau episekopo maoti râ ïa te tunuraa i te maa. Te mau maa e faaineinehia e e amuhia i te fare e mea iti ïa te pau, e e mea maitai a‘e i te pae no te ‘ea, e e haapuai ïa i te auhoaraa i roto i te utuafare ».2
Julie B. Beck, Peresideni rahi o te Sotaiete Tauturu.
Te aperaa i te tarahu
« E horo‘a’tu vau e pae tuhaa faufaa roa no te faati‘amâ i te pae faufaa moni. …
« Te matamua, a aufau i ta outou tuhaa ahuru. …
« Te piti, a haamau‘a i raro mai i ta outou e apî mai. …
« Te toru, a haapii i te haaputu. …
« Te maha, a faatura i ta outou mau titauraa i te pae faufaa moni. …
« Te pae, a haapii i ta outou mau tamarii ia pee i to outou hi‘oraa maitai.”3
Elder Joseph B. Wirthlin (1917–2008) no te Pŭpŭ no te Tino Ahuru Ma Piti Aposetolo.
« Ia tarahu ana‘e tatou, te faarue ra ïa tatou i te tahi o to tatou ti‘amâraa faufaa rahi e o te ore roa e noaa i te hoo e te tuu ra ïa tatou ia tatou iho i roto i te hoê faatîtîraa ta tatou iho i imi. Te faahepo nei ïa tatou i to tatou taime, to tatou itoito, e i ta tatou mau rave‘a no te faaho‘i i te mea ta tatou i tarahu—te mau rave‘a o te nehenehe ho‘i e faaohipahia no te tauturu ia tatou iho, i to tatou mau utuafare e ia vetahi ê.
« Te aufauraa i ta tatou mau tarahu e vai ra i teie nei e te aperaa ia tarahu faahou â e titauhia ia faaohipa tatou i te faaroo i te Faaora—eiaha noa ia maitai a‘e, ia riro râ ei taata maitai a‘e â. E titauhia te faaroo rahi no te faahiti i taua mau parau ohie ra, ‘ eita e nehenehe ta tatou .’ E titauhia te faaroo no te ti‘aturi e e maitai a‘e te oraraa ia faatusia ana‘e tatou i to tatou mau hiaai no te faatupu i to tatou iho mau hinaaro e te hinaaro o vetahi ê ».4
Elder Robert D. Hales no te Pŭpŭ no te Tino Ahuru Ma Piti Aposetolo.
© 2009 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/09. Parau faati‘a no te iritiraa : 6/09. Iritiraa no Visiting Teaching Message, February. 2010. Tahitian. 09362 895
Te mau tauturu no te mau orometua hahaere
A aparau e to outou hoa e nahea i te faatano maitai i teie parau poro‘i i roto i te oraraa o te mau tuahine tata‘itahi. Eaha te mau ite no te faarava‘iraa o te taata iho o ta outou e nehenehe e faaite atu ia’na ?
Faaineineraa i te taata iho
No te tahi atu mau haamaramaramaraa, a hi‘o All Is Safely Gathered In: Family Finances (item no. 04007).