Pagserbisyo diha sa Simbahan
Ang Madawat nga Serbisyo
Siya misulod sa usa ka gamay nga lawak-klasehanan sa Pilipinas, aron mainterbyu isip pagpangandam aron sa pagdawat sa Melchizedek Priesthood. Wala ko masayud kon pila ang iyang edad, apan bisan ang mas tigulang nga mga miyembro sa branch tawagon siya og Tatay (father).
Sa dihang nangutana ako kon siya makasabut sa akong Iningles, siya mainitong mipahiyum ug mitubag nga may mabinantayong diksyon, “Oo, makasabut ko.”
Human sa among interbyu ako nangutana kaniya kon aduna bay bisan unsang rason nga siya dili maordinahan sa priesthood. Human sa makadiyot siya miingon, “Tingali dili ko angay nga modawat sa priesthood.”
Naglibog ko, ako siyang gipangutana, “Unsa ang buot nimong ipasabut?”
“Aduna ako’y usa lang ka ngipon,” siya mitubag. “Nasayud ko nga ako dili kaayo nindot tan-awon sa pagdawat sa priesthood. Wala ra’y kaso nako kon sultihan ko nimo nga dili ko makadawat sa priesthood.”
Nanglingkod kami sa makadiyot samtang namalandong ko sa iyang gisulti, ang mga luha nanglugmaw sa akong mga mata. Dayon siya akong gigunitan sa iyang kamot ug giingnan siya nga nakakita ko og daghang buotan nga mga naghupot sa priesthood nga opaw, apan siya adunay nindot, baga, itom nga buhok. Miingon usab ako kaniya nga adunay mga naghupot sa priesthood nga usa ra’y dunggan o usa ra’y mata, apan anaa siya’y duha ka mata ug dunggan.
Siya akong gisultihan kabahin sa akong usa ka higala kinsa naputlan og bukton tungod sa kanser. Sa dihang kadto nga brother nag-ampo sa among panimalay ug nangayo sa Langitnong Amahan sa pagpanalangin sa akong asawa ug sa among mga anak, nasayud ako nga siya usa ka maayong sulugoon sa Ginoo. Giingnan nako si Tatay giunsa niini nga higala sa pagpandong sa iyang usa lamang ka kamot sa ulo sa batang babaye sa pagpanalangin kaniya tungod kay siya hapit na mamatay ug ako mibati sa gahum sa priesthood nianang adlawa.
Kining tigulang nga Pilipino mipahiyum ug miingon, “Manghinaut ko nga ang akong pagserbisyo sa Dios madawat usab.”
Kitang tanan adunay mga depekto sa pipila ka mahinungdanong paagi, ug kitang tanan nasayud sa mga pagbati sa kakulang nga moabut uban sa usa ka bag-o nga calling. Apan ang Dios modawat sa labing mapainubsanong halad sa labing mapainubsanong Santos, ug ang matag usa kanato makahimo og kalainan. Kita kinahanglan nga dili maulawan o maulaw; kinahanglan lang nga atong ihatag ang atong labing maayong paningkamot ngadto sa Ginoo. Sa ingon Siya mopanalangin kanato ug mopalambo kanato ug, sa katingalahang paagi, kita mahingpit.