Ang Dios Mamulong pinaagi sa mga Propeta

Nila ni Sandra Tanner ug Cristina Franco

Unsaon ninyo sa pagkahibalo unsa ang isulti sa Langitnong Amahan nganha kaninyo kon Siya ania dinhi? Ang Dios mamulong pinaagi sa usa ka propeta karon sama sa Iyang gibuhat sa kaniadto. Ang propeta nga si—Presidente Thomas S. Monson—nagtudlo kaninyo unsa ang gusto sa Langitnong Amahan nga inyong masayran, mabuhat ug mahimo. Kamo mapanalanginan kon kamo maminaw ug mosunod sa propeta. Ang mga panudlo ni Presidente Monson motabang kanato nga mahimong mas mahisama kang Jesukristo.

Ania ang pipila ka mga butang nga inyong masayran gikan sa gisulti ni Presidente Monson. Mahimo ninyong masayran nga ang Langitnong Amahan nahigugma kaninyo. Si Presidente Monson miingon: “Ako mopasalig kaninyo nga ang Langitnong Amahan naghunahuna sa mga hagit nga atong giatubang dinhi sa kalibutan karon. Siya nahigugma sa matag usa kanato ug mopanalangin kanato samtang kita naningkamot sa pagsunod sa Iyang mga sugo ug nagtinguha Kaniya pinaagi sa pag-ampo.¹

Mahimo ninyong masayran nga si Jesukristo mao ang atong Manluluwas. Si Presidente Monson miingon: “Ang Dios buhi. Si Jesus Iyang Anak. … Siya ang atong Manunubos. … Siya nahigugma kanato. … Siya mitugyan sa Iyang kinabuhi alang kanato.”²

Mahimo ninyong masayran unsaon sa pagtabang sa inyong pamilya. Si Presidente Monson miingon: “Kita usab unta … magpakita og kaayo ug gugma sulod sa atong kaugalingong mga pamilya.”³

Mahimo ninyong masayran unsaon sa pagtabang sa kalibutan nga inyong gipuy-an. Si Presidente Monson miingon: “Hinaut nga kita buotan nga mga lumulupyo sa mga nasud nga atong gipuy-an ug buotan nga mga silingan diha sa atong mga komunidad, makighigala niadtong anaa sa laing mga pagtuo, ingon man usab ngadto sa kauban sa atong pagtuo.”⁴

Marso 2010 Journal sa Kasulatan

Basaha ang Lucas 1:70 sa Bag-ong Tugon.

Pag-ampo aron sa pagpangayo og tabang sa Langitnong Amahan nga kamo makasabut niining kasulatan ug masayud nga kini tinuod. Pag-ampo aron masayud nga si Presidente Thomas S. Monson mao ang propeta karon.

Memoryaha kini nga kasulatan.

Buhata ang usa niining mga kalihokan, o paghimo sa imong kaugalingon:

Buhata ang kalihokan nga anaa sa pahina 69. Guntinga ang mga gilis diha sa giputol-putol nga mga linya; dayon guntinga ang mga gilis, ug ilala [weave] kini ubos sa litrato sa mga propeta aron ang mga kasulatan maglinya sa mga litrato. Tan-awa ang mga kasulatan aron sa pagpangita sa mga ngalan sa propeta. Isulat ang mga ngalan diha sa blangko nga mga linya.
Tan-awa ang litrato sa mga propeta diha sa pahina 69. Hisguti uban sa inyong pamilya ang mga pagtulun-an niini nga mga propeta.
Basaha ang mosunod nga mga kinutlo o lain kabahin sa gitudlo sa mga propeta ngari kanato:

“Pangita og usa ka tawo kinsa naglisud, … ug tabangi siya.”⁵ —Presidente Thomas S. Monson
“Ayaw gayud kalimot sa pag-ampo. Luhod matag gabii ug buntag.”⁶
—Presidente Gordon B. Hinckley (1910–2008)
“Hinaut nga kitang tanan mobasa sa Basahon ni Mormon sa mainampoong paagi, magtuon niini nga mabinantayon, ug makadawat og pagpamatuod sa kabalaan niini.”⁷ —Presidente Spencer W. Kimball (1895–1985)

Sa unsang paagi nga ang inyong gibuhat nakatabang kaninyo sa pagsabut sa Lucas 1:70?

Isulat sa inyong journal o pagdrowing og litrato mahitungod sa inyong nahimo.

Mga paghulagway pinaagi ni Beth M. Whittaker