Ang Panalangin sa Priesthood alang kang Lindsay
“Ug usab silang tanan kinsa modawat niini nga pagkapari modawat kanako, miingon ang Ginoo” (D&P 84:35).
Si Lindsay mibati og kahadlok samtang siya nag-aninaw sa kwarto sa ospital. Nasayud siya nga sa dili madugay adunay tawo nga mokuha kaniya aron dad-on ngadto sa kwarto nga operahanan alang sa operasyon. Si Mama ug si Papa nagbarug duol sa iyang higdaanan.
Pipila ka adlaw sa wala pa kini, ang pamilya ni Lindsay mihimo og espesyal nga family home evening. Si mama mihatag og leksyon kabahin sa panalangin sa priesthood. Dayon ang matag sakop sa pamilya misulti kabahin sa panahon dihang sila napanalanginan pinaagi sa gahum sa priesthood. Si Lindsay mibati og kalinaw ug kalipay samtang siya naminaw sa ilang mga pagpamatuod. Si mama mipasabut nga ang malinawon nga pagbati mao ang Espiritu Santo nga nagsulti kang Lindsay nga ang iyang nadungog tinuod.
Sa katapusan sa leksyon, ang magulang nga lalaki ni Lindsay, nga naghupot sa Melchizedek Priesthood, midihog og lana sa iyang ulo ug militok sa pag-ampo. Dayon si Papa mihatag kaniya og usa ka maanindot kaayo nga panalangin. Siya miingon nga ang Langitnong Amahan nakaila ug nahigugma kaniya. Siya miingon nga ang mga doktor mapanalanginan sa ilang buhaton ug ang pag-opera mamaayo ra. Misaad usab siya nga si Lindsay makabaton og espesyal nga pagbati sa kahupayan ug kalinaw nga mopuli sa iyang mga kahadlok.
Naghulat sulod sa ospital, si Lindsay naningkamot nga mahimong isug, apan ang mga luha hinay-hinay nga miagas gikan sa kilid sa iyang mga mata. Duha ka tawo nga nakauniporme og pang-ospital miabut sa iyang kwarto ug miingon nga panahon na alang sa operasyon. Mabination sila samtang naningkamot sa pagdasig kaniya, apan sa gihapon ang kahadlok ni Lindsay wala mawagtang.
Gigakos ni Lindsay gikan sa iyang higdaanan ang iyang Mama ug Papa. Dayon ang usa mibira sa mga ali sa iyang higdaanan aron luwas siya sa ilang pagdala kaniya sa agianan. Sa dihang milingi si Lindsay sa pagtan-aw unsay iyang gibuhat, nakakita siya og pamilyar nga singsing nga silver sa iyang tudlo. Ang init, malinawon nga pagbati mipuno sa iyang kasingkasing sa dihang nakita niya ang mga letra nga CTR diha sa singsing. Si Lindsay mipahiyum samtang ang iyang kahadlok nagkawala. Nasayud siya nga ang tanan mamaayo ra.
Mga paghulagway pinaagi ni Adam Koford