Gidoble Namo ang Among Halad sa Puasa

Brooke Mackay, California, USA

Samtang nanglingkod kami panahon sa miting sa sakrament usa ka Dominggo sa buntag, ang among bishop mihangyo sa mga miyembro sa among ward sa paghatag og ubay-ubay nga halad sa puasa. Ako ug ang akong bana bag-o lang naminyo og naningkamot gayud sa pagkab-ot sa among mga panginahanglan samtang nagpadayon pa siyang makahuman og eskwela. Dili ba ang kwartahang mga miyembro ang angay ra untang modugang sa ilang halad sa puasa?

Ang bishop misaad sa mga miyembro nga ilang masinati ang mga milagro sa ilang kinabuhi kon ilang doblehon ang ilang halad sa puasa. Bisan sa akong mga kabalaka, ang Espiritu mimatuod kanako nga ang iyang saad tinuod.

Nagkurog ko samtang nagsulat sa akong tseke sa halad sa puasa sa pagkasunod nga semana, akong gidoble ang kantidad. “Magutman gayud kami,” nakaingon ako sa kaugalingon samtang gisilyo nako ang sobre.

Paglabay sa pipila ka adlaw samtang nagpadagan ako sa akong sakyanan padulong sa trabaho, misiga ang pula nga suga nga nagpasidaan sa pagdugang og asyite. Gipun-an nako og asyite, apan midiretso lang kini og agas gikan sa makina samtang gibuboan ko kini. Dihang gitawagan nako ang among mekaniko, miingon siya nako nga modiretso na lang sa iyang shop. Nagpugong sa akong mga luha, mipadagan ako og pipila ka milya padulong sa iyang shop ug hilum nga mihimo og usa ka pag-ampo.

Mipasidaan ang mekaniko nga ang pag-ayo dako og gasto apan gikinahanglan nga buhaton. Iya usab nga gipasabut nga angayan na usab ilisan ang timing belt sa sakyanan—lain na usab nga galastuhan nga dili namo maabut. Gibilin nako ang sakyanan didto sa shop ug mitrabaho nga nahugno kaayo.

Sa wala madugay, sa dihang nanawag ang mekaniko, siya may kadasig ug mahinamon. “Siyempre malipay gyud siya,” sa akong hunahuna, “tungod kay makakwarta siya og daghan gikan kanamo.”

Sa pagkatinuod, nanawag siya aron mopaambit og usa ka makapatingala nga istorya. Samtang siya nagtrabaho sa among sakyanan, usa ka higala milabay sa iyang shop. Kini nga higala, nagtrabaho nga usa ka dealer nga moserbisyo sa mga sakyanan nga sama og klase sa akong sakyanan, nangutana kon unsay iyang gitrabaho. Dihang gipasabut sa among mekaniko ang problema, ang iyang higala miingon, “Mao ba, kahibalo ka ang kompanya nga nahibalo sa problema mitanyag nga moayo sa tanan. Tubagon sa tighimo niana nga sakyanan ang tanang galastuhan.”

Dili ako makatuo niini! Dayon gisultihan sa among mekaniko nga ang asyite nahurot og agas gikan sa makina, mao nga ang tighimo sa sakyanan mao ra usab ang moabaga sa pag-ilis sa timing belt ug sa uban pang mga belt!

Mga luha sa pasalamat milugmaw gikan sa akong mga mata samtang akong namatikdan ang panalangin nga among nadawat gikan sa Ginoo. Labihan ang akong gibati sa Iyang paghigugma ug naulaw ko tungod sa kakulang sa akong pagtuo.

Wala kanako ang ingon ka hugot nga pagtuo sukad niadto nga hitabo pipila ka tuig ang milabay, apan ako nasayud nga ang Ginoo sigurado kaayong nasayud sa atong mga panginahanglan ug mga paningkamot. Nasayud ako nga Siya nahigugma kanato ug gusto nga motabang kanato. Nasayud usab ako nga ang Langitnong Amahan mosulay kanato ug dili sa kanunay motubag sa atong mga pag-ampo diha-diha dayon sama sa Iyang gibuhat niini nga panghitabo.

Ang labing importante, ako adunay pagpamatuod sa mga panalangin nga among madawat pinaagi sa pagkahimo natong labaw ka manggihatagon sa halad sa puasa ug sa mga panalangin nga nadawat sa uban isip sangputanan sa atong kamanggihatagon.

Gipun-an nako og asyite, apan midiretso lang kini og agas gikan sa makina samtang gibuboan ko kini. Nagpugong sa akong mga luha, mipadagan ako padulong sa repair shop.