180 ka Tuig ang Milabay, Ang Basahon ni Mormon Dul-an Na sa 150 ka Milyon nga Kopya
Samtang ang ika-180 nga anibersaryo sa pagmantala sa Basahon ni Mormon nagkaduol na karong Marso, ang sagrado nga volume sa kasulatan nagpaabut og lain nga dakong panghitabo: ang pag-imprinta sa ika-150 ka milyon nga kopya niini.
Ang unang mga kopya sa Basahon ni Mormon makita sa mga estante sa tindahan sa libro ni E. B. Grandin niadtong Marso 26, 1830. Ang unang pag-imprinta miabut sa gidaghanon nga 5,000 ka kopya. Tunga-tunga sa 1830 ug 1987, sobra sa 39 ka milyon ka kopya ang naimprinta.
Pagka 1988 si Presidente Ezra Taft Benson (1899–1994) miingon, “Ang panahon dugay nang milapas alang sa usa ka hilabihan nga paglukop sa yuta sa Basahon ni Mormon” (“Flooding the Earth with the Book of Mormon,” Ensign, Nob. 1988, 4).
Pagka 1990 ang ika-50 ka milyon nga kopya naimprinta alang sa pagpang-apud-apod pinaagi sa mga miyembro ug mga misyonaryo. Kana nga gidaghanon nadoble niadtong 2000, nga ang Simbahan nag-imprinta sa gidaghanon nga usa ka kopya kada pito ka segundos sulod sa dekada—gidaghanon nga gipadayon sa Simbahan aron makaabut sa gilauman nga 150 ka milyon sa tapus sa 2010. Ang kadaghanan sa pag-imprinta gihimo sa Siyudad sa Salt Lake, USA, apan mga imprentahanan sa Brazil, Germany, Japan, Korea, ug Taiwan gigamit usab.
Usa ka Gamhanang Impluwensya
Usa sa daghang mga rason nga gihatag ni Presidente Benson sa paglukop sa yuta sa Basahon ni Mormon mao ang impluwensya niini. Si Propeta Joseph Smith mitudlo sa unang mga lider sa Simbahan nga “ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon” (History of the Church, 4:461).
Sukad nianang panahona ang impluwensya sa basahon naila na sa kadaghanan. Pagka 2003 ang Libro nga magasin mihingalan sa Basahon ni Mormon nga usa sa “20 ka mga Basahon Nga Nakapausab sa Amerika,” kauban niini ang ingon nga mga ulohan sama sa kang Thomas Paine nga Common Sense ug kang John Steinbeck nga The Grapes of Wrath.
Pagka Agosto 2005 si Presidente Gordon B. Hinckley (1910–2008) misaad sa mga miyembro kinsa mobasa sa Basahon ni Mormon nga “adunay moabut sa inyong mga kinabuhi ug sa inyong mga panimalay nga dugang nga pagbu-bu sa Espiritu sa Ginoo, usa ka nalig-on nga tinguha nga maglakaw sa pagkamasulundon sa Iyang mga sugo, ug usa ka mas lig-on nga pagpamatuod mahitungod sa buhing kamatuoran kabahin sa Anak sa Dios” (“A Testimony Vibrant and True,” Liahona, Ago. 2005, 2).
Pagka Oktubre 2007 siya miingon mahitungod sa basahon: “Niining milabayng katuigan ang mga tigpanaway naningkamot sa pagpasabut niini. Namulong sila batok niini. Mibiay-biay sila niini. Apan kini milupig kanilang tanan, ug ang impluwensya niini karon mas midako pa kay sa bisan unsa nga panahon sa kasaysayan niini” (“Ang Bato nga Gipikas Gikan sa Bukid,” Liahona, Nob. 2007, 83).
Ang Buhat sa Paghubad
Kana nga impluwensya adunay kalabutan sa gidaghanon sa mga pinulongan diin ang basahon milukop sa yuta.
Ang Basahon ni Mormon namantala sa kinatibuk-an sa 82 ka mga pinulongan, nga adunay mga pinili sa basahon nga anaa sa dugang nga 25 ka mga pinulongan. Ang unang edisyon sa Basahon ni Mormon sunod sa English mao ang Danish pagka 1851, gisundan sa French, Italian, Welsh, ug German pagka 1852.
Dugang nga mga pinulongan ang kasamtangang gihimo pa. Ang mga paghubad nga nakompleto sa bag-ohay nga mga katuigan naglakip sa Guarani, usa ka pinulongan nga gilitok sa Paraguay; Sinhala, nga gilitok sa Sri Lanka; Yoruba, usa ka West African nga pinulongan; ug Serbian, gilitok sa tibuok southeastern Europe.
Si Mojca Zeleznikar mipasakop sa Simbahan sa wala pay magamit nga Basahon ni Mormon sa iyang lumad nga pinulongan nga Slovenian. Ang iyang pagpamatuod mahitungod sa kamatuoran sa ebanghelyo miabut pinaagi sa pagpaminaw sa mga misyonaryo ug sa pagtuon sa Basahon ni Mormon sa Croatian ug English.
Pipila ka tuig human mabunyagi si Sister Zeleznikar, ang Basahon ni Mormon gihubad sa Slovenian. Sa dihang iyang nabasa ang nahubad nga teksto, iyang gibati ang tibuok gahum sa mga pulong. “Akong gibati ang kamatuoran nga mikanap kanako sa tataw nga kayano ug tulukibon nga kalunsay,” siya nahinumdom. “Ang tingog sa akong Tiglalang [namulong] ngari kanako sa akong kaugalingong pinulongan—ang pinulongan nga gilitok sa akong inahan ngari kanako.”
Paglukop sa Yuta
Agig dugang sa nagkadaghan nga mga paghubad nga anaa na, ang Simbahan migamit usab sa nag-una nga mga teknolohiya aron sa paglukop sa yuta sa Basahon ni Mormon sa nagkalain-laing mga paagi.
Si Presidente Benson miingon, “Niining panahon sa elektronik nga media ug dinaghan nga pagpang-apud-apod sa giimprinta nga pulong, kita adunay tulubagon sa Dios kon dili nato karon malihok ang Basahon ni Mormon sa talagsaon nga paagi” (“Flooding the Earth,” 4).
Ang mga audio nga pagrekord sa Basahon ni Mormon sa English, Portuguese, ug Spanish anaa sa www.audio.lds.org, uban sa laing mga pinulongan nga moabut pagka 2010. Ang elektronik nga teksto sa Basahon ni Mormon sa kasamtangan anaa na sa 16 ka mga pinulongan sa www.scriptures.lds.org (i-klik ang English alang sa lista sa mga pinulongan); sobra sa 600,000 ka mga tawo ang naggamit sa online nga edisyon sa mga kasulatan matag bulan.
Ang tibuok sumbanan nga mga kasulatan ug mga tabang sa pagtuon makita usab sa nagkalain-lain nga mga pinulongan diha sa CD-ROM The Scriptures: Electronic Study Edition, nga anaa sa sentro sa lokal nga pagpang-apud-apod. Usa ka bag-o nga DVD-ROM nga edisyon uban sa laing 20 ka mga pinulongan ang ipagawas sa tapus niining tuiga.
Ang Simbahan naghimo usab og opisyal nga mga magamit nga mga kasulatan alang sa mga mabalhin-balhin nga mga himan nga maanaa inig ka 2010 sa English, uban sa laing mga pinulongan nga mosunod.
Ang mga resulta sa pagpakigbahin sa Basahon ni Mormon wala masayop. Kining sukaranang bato ug dugang nga tugon mahitungod kang Jesukristo nagtabang og gatusan sa linibo nga bag-ong mga kinabig matag tuig nga masayud ug modawat sa gipahiuli nga ebanghelyo ni Jesukristo. Uban sa dugang nga mga kopya sa Basahon ni Mormon nga anaa na sa dugang nga mga pinulongan ug dugang nga mga format ug dugang nga mga misyonaryo ug mga miyembro nga mopaud-apod niini, ang Basahon ni Mormon ug ang impluwensya niini padayon sa pagkaylap.
Hinoon, sa binilyon ka mga tawo nga kinahanglan pang maadto, ang kadinalian nga gibati ni Presidente Benson sa pagmantala ug pag-apud-apod sa basahon pagka 1988 nagpabilin gihapon karon.
“Kita adunay Basahon ni Mormon,” siya miingon. “Kita adunay mga miyembro, kita adunay mga misyonaryo, ug ang kalibutan adunay panginahanglan. Ang panahon mao karon!” (“Flooding the Earth,” 4).
Agig dugang sa giimprinta nga edisyon, ang Basahon ni Mormon anaa sa nagkalain-laing mga digital format.
Ang Basahon ni Mormon naimprinta sa kinatibuk-an sa 82 ka mga pinulongan.