Pag-ila sa Kahayag sa Ebanghelyo

Ni Yulia Phares

Dili ako makaingon nga ako walay mga tumong sa wala pa ako nabunyagi sa Ang Simbahan ni Jesukristo sa mga Santos sa Ulahing mga Adlaw. Apan makasulti ako nga ang akong kinabuhi walay klaro nga direksyon. Usahay ako mibati nga daw ako naglakaw sa kangitngit, wala gayud masayud asa paingon.

Sama sa kadaghanan sa mga nag-edad og 19 sa Saint Petersburg, Russia, ako naglaum nga usa ka adlaw ako magminyo, makabaton og mga anak, ug magpuyo nga malipayon hangtud sa kahangturan. Sa gihapon, ako dili makaingon nga ako nasayud gayud unsaon sa pagkab-ut niining tumong—ilabi na sa bahin nga magpuyo nga malipayon hangtud sa kahangturan.

Apan ang Langitnong Amahan nasayud. Siya nasayud nga sa dili pa nako makab-ot ang tinuod nga kalipay, kinahanglan nakong ibutang Siya ug ang Iyang Anak diha sa sentro sa akong kinabuhi. Misugod ako sa pagkat-on unsaon sa pagbuhat niini sa wala pa ang akong ika-20 nga adlawng natawhan sa dihang ang mga misyonaryo misugod sa pagtudlo sa akong pamilya kabahin sa kon unsaon sa pagpangita og kalipay pinaagi sa pagsunod sa mga sugo.

Human namo nahimamat ang mga misyonaryo, wala magdugay nga akong nasayran unsa ang angay nga buhaton. Nag-ampo ug nasayud ako nga kon gusto nakong makab-ot ang akong mga tumong sa kinabuhi, gikinahanglan nako nga mabunyagan isip usa ka miyembro sa Simbahan ni Jesukristo

Human sa akong bunyag, gisalikway ako sa pipila ka mga higala ug mga sakop sa pamilya kinsa wala makasabut ngano nga ang pagpili sa pagsunod sa plano sa Langitnong Amahan importante kaayo alang kanako. Bisan pa niini, ako malipayon. Nasayud ako nga Siya naghupay kanako pinaagi sa pagtugot nga ako mosinati niining mga pagsulay uban sa kalinaw.

Sa dihang nag-edad na ako og 21, aduna ako’y lig-ong tinguha nga mopamatuod sa kamatuoran sa ebanghelyo ug mopakigbahin ngadto sa uban kon sa unsang paagi nga ang pagsunod sa mga sugo nakapausab sa akong kinabuhi, busa ako nahimong usa ka misyonaryo. Nindot kaayo ang pagbati sa pagpakigbahin sa mga tawo unsa ang nahitabo sa akong kinabuhi gikan sa higayon nga ako mihukom nga unahon ang ebanghelyo.

Ang akong kinabuhi napuno sa mga panalangin sukad nianang higayona. Walo ka tuig ang milabay ako nakasulod sa templo ug nakab-ot ang akong tumong nga maminyo. Gani, wala lamang ako naminyo, ako nabugkos ngadto sa akong bana hangtud sa kahangturan.

Sulod sa daghang mga tuig, ang akong tumong nga mahimong usa ka inahan natuman. Napanalanginan ako og tulo ka maanindot nga anak nga mga lalaki.

Dili pa lang dugay ang akong pamilya adunay oportunidad sa pagbisita sa open house sa usa ka templo. Samtang kami nanglakaw sulod sa templo, ang among upat ka tuig nga anak nga lalaki mitan-aw kanako ug miingon, “Ma, tungod kay ikaw ug si Papa naminyo sulod sa templo, ang atong pamilya mag-uban hangtud sa kahangturan.”

Gibati nako nga napanalanginan ug napaubos nga naghunahuna sa katapusang dekada sa akong kinabuhi. Nagpadulong na ako sa pagkab-ot sa akong tumong nga “magmalipayon hangtud sa kahangturan,” salamat sa kamatuoran nga akong gitugyan ang akong kinabuhi ngadto sa akong Langitnong Amahan ug kang Jesukristo. Sa higayon nga Sila akong ibutang sa sentro sa akong kinabuhi, ako nasayud nga akong makab-ot ang akong mga tumong. Nasayud ako nga ang Langitnong Amahan ug ang Manluluwas nahigugma kanato ug gustong motabang.