Usa ka Panahon sa Kapanahunan
Ang Una nga Relief Society
Niadtong 1842 usa ka gamayng grupo sa kababayen-an sa Nauvoo, Illinois, nagpundok aron magporma og kapunongan sa mananahi sa pagsangkap og mga sinina alang sa mga trabahante sa templo. Hinoon, sumala sa tambag kanila ni Propeta Joseph Smith, ang ilang mga responsibilidad mao ang “dili lamang sa paghupay sa mga kabus, apan sa pagluwas og mga kalag.”1 Sa ingon niana ang Relief Society natukod.
Pormal nga giorganisar ni Joseph Smith ang Relief Society niadtong Marso 17, 1842. Ang Iyang asawa, si Emma, mao ang pinakauna nga presidente niini.
Ang mga sister milihok dayon aron pagtabang sa mga timawa. Ang bag-ong mga lumulupyo, lakip na ang mga imigrante, sa kasagaran nanginahanglan og pagkaon, kapuy-an, ug mga sinina dihang sila nangabut. Daghan usab ang nag-antus sa pisikal nga mga kalisud, mga sakit, ug pagkamatay sa mga sakop sa pamilya.
Sa ting-init niadtong 1842, ang organisasyon sa Relief Society dako na kaayo nga wala nay building sa Nauvoo nga kaigo sa gidaghanon niini. Ang mga sister mipili nga magpundok na lang didto sa kakahoyan duol sa gitukuran sa templo. Atol sa tingtugnaw niadtong 1842–43, giuswag nila ang ilang mga miting, apan ang mga sister sa “necessity committee,” ang tig-una sa visiting teaching, padayon gihapong mibisita sa usag-usa.