Unsa ang Atong Gituohan

Ang Espiritu Santo Mopamatuod sa Kamatuoran

Ang Espiritu Santo mao ang ikatulo nga sakop sa Dios nga Kapangulohan. Siya usa ka personahe sa espiritu, walay lawas nga unod ug mga bukog (tan-awa sa D&P 130:22). Siya ang kasagarang gipasabut nga ang Espiritu, ang Espiritu Santo, ang Espiritu sa Dios, ang Espiritu sa Ginoo, o ang Maghuhupay. Siya naglihok sa hingpit nga panaghiusa uban sa Langitnong Amahan ug ni Jesukristo.¹

Isip usa ka personahe nga espiritu, ang Espiritu Santo maanaa lamang sa usa ka dapit sa usa ka panahon, apan ang Iyang impluwensya maanaa bisan asa sa usa ka higayon.²

Si Presidente Joseph Fielding Smith (1876–1972) mitudlo nga, “Pinaagi sa Espiritu Santo ang kamatuoran gisapid ngadto sa kinahiladman ug sa ugat sa lawas aron kini dili gayud hikalimtan.”³

Pinaagi ra usab sa pagdawat sa Espiritu Santo kon kita maghinulsol ug magpabunyag kita mabalaan. Ang pagkabalaan mao ang proseso sa pagkahimong gawasnon sa sala —putli, limpyo, ug balaan —pinaagi sa Pag-ula ni Jesukristo (tan-awa sa Moises 6:59–60). Kita mabalaan kon kita motugyan sa atong kasingkasing ngadto sa Dios (tan-awa sa Helaman 3:35).

1. Ang Espiritu Santo “mosaksi sa Amahan ug sa Anak” (2 Nephi 31:18). Pinaagi lamang sa gahum sa Espiritu Santo nga kita makadawat og usa ka sigurado nga pagpamatuod sa Dios nga Amahan ug sa Iyang Anak, si Jesukristo.⁴

2. Ang Espiritu Santo mopamatuod sa kamatuoran, ug kini pinaagi sa Iyang gahum nga kita “mahimo nga masayud sa kamatuoran sa tanan nga mga butang” (Moroni 10:5).

3. Ang Espiritu Santo ang magatudlo kanato sa tanang butang ug magapahinumdom kanato sa tanan nga atong nakat-unan kabahin sa Ginoo ug sa Iyang ebanghelyo (tan-awa sa Juan 14:26).

4. Ang Espiritu Santo “mopakita [kanato] sa tanan nga mga butang nga kinahanglan [natong] buhaton” (2 Nephi 32:5). Siya makagiya kanato sa atong mga desisyon ug manalipod kanato gikan sa pisikal ug sa espirituhanon nga peligro.

5. Kon kita gusto kaayo nga masayud sa mga pulong sa kinabuhing dayon ug motugot nga kining mga pulong mosulod sa kinahiladman sa atong kasingkasing, ang Espiritu Santo moabli sa atong hunahuna ug kasingkasing ngadto sa mas dako nga kahayag ug panabut.⁵

6. Gipanalanginan kita og mga gasa sa Espiritu pinaagi sa Espiritu Santo. Kini nga mga gasa mopanalangin sa atong kinabuhi ug sa kinabuhi sa atong mga gimahal ug giserbisyuhan. (Tan-awa sa 1 Mga Taga-Corinto 12:1–12; Moroni 10:8–18; D&P 46:11–33.)

7. Ang Espiritu Santo nailhan nga Maghuhupay tungod kay Siya mopuno kanato og “paglaum ug hingpit nga gugma” (Moroni 8:26).

8. Si Adan ang una dinhi sa yuta nga nabunyagan ug nakadawat sa Espiritu Santo (tan-awa sa Moises 6:64–66).

9. Pinaagi sa gahum sa Espiritu Santo, kita mahimong balaan kon kita maghinulsol, ug mabunyagan ug makumpirmahan, ug maningkamot sa pagtuman sa mga sugo sa Dios (tan-awa sa Mosiah 4:1–3; 5:1–6).

Mubo nga mga sulat

1. Tan-awa sa Matinud-anon sa Tinuhoan (2004), 31–32; Isangyaw ang Akong Ebanghelyo (2004), 107–108.

2. Tan-awa sa Mga Baruganan sa Ebanghelyo (2009), 37.

3. Joseph Fielding Smith, Doctrines of Salvation, ed. Bruce R. McConkie, 3 vols. (1954–56), 1:48.

4. Tan-awa sa 1 Mga Taga-Corinto 12:3; Matinud-anon sa Tinuhoan, 32.

5. Tan-awa sa Enos 1:3; Isangyaw ang Akong Ebanghelyo, 20–21.

“Ug nahinabo human ako, si Nephi, makadungog sa tanan nga mga pulong sa akong amahan, … diin siya namulong pinaagi sa gahum sa Espiritu Santo, diin nga gahum siya midawat pinaagi sa hugot nga pagtuo diha sa Anak sa Dios— … ako, si Nephi, matinguhaon usab nga ako unta makakita, ug makadungog, ug masayud niini nga mga butang, pinaagi sa gahum sa Espiritu Santo, diin mao ang gasa sa Dios ngadto sa tanan kinsa sa makugihon nga paagi mangita kaniya” (1 Nephi 10:17).

“Ang Espiritu Santo mao ang inyong kauban sa kanunay, ug ang inyong pagmando usa ka dili mausabon nga pagmando sa pagkamatarung ug kamatuoran; ug ang inyong kamandoan mao ang usa ka walay katapusan nga kamandoan, ug walay pagpugos nga paagi kini mokanap nganha kanimo hangtud sa kahangturan.” (D&P 121:45–46).

Paghulagway sa litrato pinaagi ni Craig Dimond, David Stoker, Welden C. Andersen, Derek Israelsen, Matthew Reier, ug Christina Smith; paghulagway kang Nephi pinaagi ni Jerry Thompson; Si Adan ug si Eva, pinaagi ni Lonni Clarke