Ang Ginoo Tinuoray Gayud nga Nanalipod Kanamo
Niadtong Hunyo 7, 1994, namauli kami sa balay sakay sa barko kauban sa lima ka misyonaryo human sa usa ka zone conference sa Eastern Samar, Philippines. Kusog ang hangin sa kagabhion ug umugon. Human mapahimutang ang among mga bag pangbiyahe diha sa among higdaanan sa ikaduhang andana, ang upat kanamo miadto sa atubangan nga deck sa paglikay sa kaigang. Si Elder Dunford ug Bermudez, hinoon, nagpabilin ug nangatulog.
Nakig-istorya ako ni Elder Kern dihang nakadungog kami og kusog kaayong buto gikan sa kilid sa barko. Sa kalit lang ang kalayo, tungod sa gasolina nga gikan sa makina, misugod og silaob diha sa luyong bahin sa barko. Napuno sa aso ang mga agianan, gisundan sa pagkapawong sa mga suga nga nakapatarantar sa mga pasahero diha sa kangitngit.
Kaming upat didto sa deck nagpundok, nag-ampo aron makalma ug makahunahuna og maayo ug aron ang Espiritu mogiya kanamo. Pagkahuman dayon, si Elder Valentine paspas nga mibalik sa sulod sa barko nangita og mga life jacket. Didto sa cabin iyang nakit-an si Elder Dunford, kinsa mihatag kaniya og duha ka life jacket ug milakaw aron pangitaon si Elder Bermudez. Dayon si Elder Valentine nakakita og duha pa ka life jacket bisan sa kangitngit. Milagro kaayo, nga bisan sa kasamok, misubay siya sa agianan nga walay bisan usa nga nakababag kaniya, ug nakabalik siya sa deck sulod lang sa 20 ka segundos. Niining higayuna ang atubangang bahin sa barko puno na sa mga pasahero, ug ang kalayo nagkaanam og kaduol. Wala nay laing kapilian kondili ang pag-ambak. Gisul-ob namo ang among mga life jacket ug namulong og mubo nga pag-ampo sa wala pa kami mangambak. Si Elder Valentine natukmod sa nataranta nga pundok sa among luyo, apan nahagsa siya sa tubig nga wala maunsa 10 ka pye (3 ka metros) paubos.
Ang palibut sa barko hayag kaayo tungod sa siga sa kalayo, ug among madungog ang singgit sa mga tawo sa among palibut. Kaming upat nagkapundok pag-usab distansya og gamay gikan sa barko, taliwala sa daghang tawo nga nangambak usab, ug nanglangoy aron malayo sa nagdilaab nga ikatulong andana sa barko. Nag-ampo na usab kami, nagpasalamat sa atong Langitnong Amahan sa proteksyon nga among nadawat ug nangayo og tabang nga makit-an ang among mga kauban, nga sila si Elder Dunford ug Elder Bermudez. Nakit-an sila ni Elder Valentine nga naka-life jacket, apan kami wala makakita kanila didto sa deck.
Sa dihang wala na ang kalayo, hilabihan ang kangitngit sa kagabhion, ug ang mga balud padayon sa paghapak, naghatag kini kanamo og kalisud samtang naglutaw-lutaw bisan og kami nakasul-ob og mga life jacket. Nag-ampo na usab kami, niining higayuna nangayo og giya kon si kinsa ang among matabangan. Nakakita dayon kami og duha ka babaye nga adunay mga anak ug sa usa ka gulangon nga lalaki, ug nagbanos-banos kami sa pagpalutaw sa usag-usa. Amo kining nahimo hangtud nakakita kami og gamay nga sakayan ug didto among gipahimutang ang mga pasahero, apan among gibati nga ang uban nagkinahanglan niini, mao nga nagpabilin kami sa tubig.
Paglabay sa 30 minutos ang hangin mikusog, ang ulan misugod sa pagbundak, ug ang dagkong balud misamot pa og kadagko. Wala gihapon kami makasiguro kon unsay nahitabo sa duha ka elder ug nasayud nga ang bagyo mopugong sa bisan unsang mga paningkamot sa pagluwas. Si Elder Kern, nga nagsilbing tingog sa grupo, nag-ampo nga moundang ang bagyo ug unta ang ubang mga elder maprotektahan. Sulod sa pipila ka minuto, nawala na ang bagyo.
Naghulat kami, natingala sa among nasaksihan, dayon nakadungog kang Elder Dunford nga nagsinggit ngadto kang Elder Kern. Naninggit kami ug nanglangoy paingon kanila. Sila si Elder Dunford ug Bermudez nakalukso gikan sa barko pinaagi sa pagkatkat sa bintana, ug aduna silay kaubang duha ka babaye, walay mga life jacket, nagkapyot sa ilang isig ka buko-buko.
Nagpundok kami didto sa taas-taas nga panahon, dayon nakakita og suga gikan sa sakayan nga pangisda nga mibiya sa baybay sa Guiuan. Wala kadto magdugay hangtud nga kami nakit-an sa usa ka sakayan, apan hapit na kini mapuno, mao nga among gipasakay ang duha ka babaye ug kami naghulat.
Didto kami sa tubig sulod sa duha ka oras sa dihang adunay laing sakayan ang nakakita kanamo ug midala kanamo sa baybay. Nakauli gayud kami sa among apartment sa Guiuan sayo sa buntag niadtong Hunyo 8, nga maoy akong ika-21 nga birthday. Among giampo ang luwas nga pagtabang sa uban nga didto pa sa dagat ug nagpasalamat pag-usab sa Langitnong Amahan tungod sa proteksyon nga among nadawat.
Dili gayud nako makalimtan kini nga kasinatian, ug manghinaut ako nga dili gayud makalimot sa among pagbati sa kasiguroan sulod sa tibuok nga panghitabo. Ang Ginoo sa tinuoray nanalipod kanamo. Gikan niini nga kasinatian, nakaangkon ako og mas lig-on nga pagpamatuod nga ang Ginoo magauban sa Iyang mga anak kanunay ug ihatag kanato ang kalinaw ug tabang nga atong gikinahanglan panahon sa atong mga pagsulay.
Paghulagway pinaagi ni Michael T. Malm