Nganong Mobayad og Halad sa Puasa?

Si Rebecca Alison Titz, usa ka young adult gikan sa Germany kinsa karon nagtambong sa Winterthur Ward sa Switzerland, adunay pagpamatuod sa pagpuasa ug sa mga panalangin nga nagagikan sa pagbayad og ubay-ubay nga halad sa puasa. Si Rebecca nagdako nga nakakita sa iyang mga ginikanan nga nagbayad og halad sa puasa, ug sa dihang siya misugod sa pagdawat sa iyang kaugalingong sweldo, siya misugod sa paghatag sa iyang kaugalingong halad sa puasa.

Siya miingon, “Adunay mga higayon diin makahimo ako sa pagbayad og ubay-ubay nga halad sa puasa.” Ug niadtong mga higayona siya miingon, “Wala gayud ako gigutom sa lawas o sa espiritu.” Siya nagpasabut nga ang mga pagbati sa kagutom gikan sa pagpuasa kadali lamang, apan ang mga panalangin sa espiritwal nga pag-amuma nga nagagikan sa pagtabang sa uban molungtad—gani mahangturon.

Si Rebecca kanunay nga naningkamot sa paghatag sa halad sa puasa nga kinasingkasing. “Wala gyud ko’y problema sa paghatag niini,” siya miingon. “Wala ako naghunahuna nga, ‘akong gamiton kining kwarta para sa uban.’ Kanunay akong naghunahuna nga, ‘Kini mao ang pagtabang sa mga tawo kinsa nanginahanglan niini.’”

Usa sa mga higala ni Rebecca, nga si Jessica Schwabe sa Halberstadt Branch sa Hannover, Germany, midugang: “Ang pagbayad og halad sa puasa makapahimo sa pagpuasa nga mas makahuluganon; kini makapahiusa niini. Ang halad sa puasa usa ka bahin sa pagpuasa dili alang sa atong kaugalingon apan alang sa uban, alang sa mga tawo nga nanginahanglan.”