Wetea te Amburanti

Simon Heal, Queensland, Australia

N te ririki 1991 ngke I tamwarakea kaintamwaraken ara auti, I namakina te maraki ae karina nakon matau te angamaing. Te maraki, ae kanga ti tebo ma te kateketeke, e a butanako n atuu n te tai ae waekoa. I teimatoa ni mwakuri ni karokoa te mwebuaka e a kaumakai bwa n na nakon au kainiwene ni motirawa.

N te tai are I wene iai, ao te bwana ae uarereke e wirikirikinai. “Teirake,” e taku te Tamnei. “Tai matu.”

Ngke I uti n ira te kauring ao n iangoa te bwai ae n na riai ni karaoia, I iangoia bwa n na ana te bwatin are e nima tinau ibukin te maraki n atu ae korakora. I nakon aia ru au karo ao I noora te bwatin, ma n te tai are I kauka te bwatoro, ao e a manga roko riki te bwana: “Tai nima teuana man bwatin akanne.”

E aki maan imwiina, e a manga roko riki te bwana te katenua n tai: “Ko riai n tareboniia te amburanti—ngkai!”

I tuai man tatarebonia te tabo ni mwakuri ibukin aoraki aika karina imwaina, ma I a bon tareboon naba n te tai arei. E aki maan ao e roko te amburanti, ao uoman taan mwakuri a katokaai iaon te bao n toka. Te kabanea ni bwai ae I uringa bwa a titirakinai arau. Imwiina ao e mate te taura.

Imwiina ao I uti n te tabo ni kuakua teuana n te onaoraki. I teimatoa ni mamaara iaan ana kangaanga te maraki, ma I uringa namakinan baai iaon atu ngke anganai te kakabwaia tamau ao te bitiobi. I ongo taian taeka “Ko na kaokaki nakon marurungim, ae aron are akea te bwai ae riki.”

Imwiin teniua te bong iaan te tararua ae korakora ao aua riki te bong n taian uoote n te onaoraki, ao I a okira mweengau. Ai tibwa te tai anne are I ataia ae I a tia n aorakina aorakin te maraki ni kaburoro ae korakora. Te tia korokoro are e koreai e tuangai imwiina bwa “ai bon ti te kurina ao I a mate” ao n na kaman mate ngke I nima te bwatin arei.

N te bong aei I a rangin ni korakora man marurung, I kakaitau bwa e a tia te Uea ni kaira au iango n te bong arei. I a tia ni kabaeaki n te tembora ma buu ae tangiraki, ao iai natira niman aika rangin n tikiraoi.

I kaitaua Tamau are i Karawa ao au tia Kamaiu, Iesu Kristo, ibukin kakai n te maiu. I kekeiaki ni katoabong ni kabongana te tai. A tia n anganai, ao I kakaitau n uringan ana kakawakin bwanaan te Tamnei are e roko irou.

Te maraki ni matau te angamaing e butanako nakon atuu ni kabuta. N te tai are I wene iai, e kauringai ana kairoro te bwanaa ae maraara man bebete: “Teirake. Tai matu.”