Karaoan te Mare n te Tembora te Moanibwai
A bungiaki Vitaly ao Ekaterina (Katya) Shmakov i Omsk, Russia, ao Yekaterinburg, Russia, ni karinanakiia anne. Ngaiia ni kauoman a kaaina Ana Ekaretia Iesu Kristo Ibukiia Aika Itiaki Ni Boong Aika Kaitira n ataeiia, ao a uaia n nako ni mitinare—Vitaly n te Czech Prague Mission ao Katya i Russia Novosibirsk Mission. A taku bwa rairakiia a kauki aia iango nakon iango ni kukurei, onimaki irouia n te maiu ae koro arona, ao aia mwakuri ni mitinare e kamatoai nanoia n tangiran katean mwenga-n tienta n euangkerio, ni moanaki ma te mare n te tembora. Aio aia karaki.
Vitaly: Ngke I a roko ni mwengau tabeua namwakaina man au mwakuri ni mitinare, I a tuangaki bwa N na kauntira n teuana te maungatabu n roronrikirake n ara tabo. Steven C. Smith, te beretitenti n te Russia Novosibirsk Mission, e weteai nako nanon ana aobiti. I kantaningaa anganakiu teuana nakoau ke te kakarabakau n taekan te bwai teuana. Irarikin anne, e tuangai Beretitenti Smith taekan temanna are e tangirai bwa N na kaaitibo—ma te ataeinaine are e a tibwa oki man ana mwakuri ni mitinare ao n okira mwengana n teuana mwakoron Russia ma e na mena n te taaun ibukin te maungatabu
I bon tuai man nora Katya mai mwaaina, ma n te tai are I roko iai n te maungatabu, I kabwarabwaraai, ao ti marooro tabeua ara miniti. Rimwi n te tairiki anne I a tuangnga bwa N na taenti ma ngaia. Te bong are I mwina I tuangnga bwa N na taenti riki ma ngaia.
Katya: N rikirakeu, I aki kinaaia mwaitiia kaain te nakoanibonga aika ataei ao n tuai iein, ma I aki toki ni kantaningaia bwa te Uea E na bon karekea te ataeinimwaane ae tau ibukiu are N na mare ma ngaia. Akea au iango bwa n ningai ke ti na kangaa ni kaaitibo, ma iai irou te onimaki iroun te Uea ao Ana berita.
I mwin au mwakuri ni mitinare, I a kaoaki bwa N na ibuobuoki n tararuaa teuana te maungatabu n te roronrikirake. Ngke I nora Vitaly n te maungatabu, boni ngkekei naba ngke I a tangiria ni kan ataia ao ni kinaa. Ti kabanea tenua te bong aika moan kakukurei ao n aki kona ni mwaninga ikotakira n te maungatabu anne.
I moantaai n namakina te bwai ae korakora are e tuangai bwa Vitaly bon te mwaane are N na mare ma ngaia. E koaua, tiaki ni kabane a na namakina te aekaki n namakin aio irouia ni moan aia kakareketangira. Ngaia are ti kangaa n ataia bwa ti toua te kawai ae eti? I ataia n au tai ni mitinare ni kinaa te Tamnei ao n tou mwin Ana kairiiri n akea au nanououa iai. Ngaia are ngke I namakin bwaai ake a tuangai ake I kainnanoi ni kinaa iai Vitaly, I motinnanoia bwa N na iriia.
I ataia bwa e na kairiira ni kabane te Tamnei ngkana ti ukoukora Ana iraorao. E kakawaki bwa ti na aki ti kabotaua oin kawaira nakoia tabeman—e na aki kona ni kairiira te Tamnei n arona ni koaua—ma ngkana ti ira te Tamnei, ao ti na koaua raoi iai bwa e bon koaua kawaira.
Tokanikai iaon Kangaanga
Vitaly: Ni boong akana tenibong akanne, I a ataia bwa I a tia ni kunea temanna ae okoro arona. I a rawa ngke e a toki bukin te maungatabu ao ti a riai ni maaenako Katya ao ngai. Te kabwaia tera, ngke ai manga iai naba te maungatabu teuana ngkanne ibukiia roronrikirake ake a tuai iein n te namwakaina are i mwina. E a bon roko irou naba ngkekei kakantaningaakina.
E boni koro naba aron te maungatabu arei n aron are I kantaningaia. Ti kabanea ngai ma Katya te tai ae maan ni kinaira bon iroura. Ngke e toki anne, ti karekei nambwan ara tarebon ao n oki rikaaki nakon oin ara kaawa.
Ni wiki ake i mwina ti a rereitaki ni mwaitin te tai n te tarebon ao ni kokoro rongorongo. (I taku bwa e aki reke te namwakaina ngke I a rabakau ni koro rongorongo n au tarebon ni waekoakoa riki nakoia aomata ake a kona n taibinna n aia kombiuta!)
E maeka Katya i Yekaterinburg, 11 te aoa raroan kaeana n te turein man au tabo ni maeka i Omsk, Siberia. E ngae n anne, ti bon rang kainnano ni manga kan norira riki. Ti a moanna ni kakaraoi mwamwanangara ni wiwikente nako. I nako ni kawaria n teuana te wikente, ao tabeua wiki i mwina, e a manga roko ni kawarai. Ngkana I kawara Katya, I maeka irouia raoraou aika I rang kinaiia n ana kaawa, ao ngkana e kawarai, e maeka ma raoraona ae e kinaiia aika maeka n au kaawa. Ti aki toki n ikoikotaki ma raoraora aikai n te taromauri n ara tai ni kakawari aio.
Katya: Tebwi ma teuana te aoa e taraa n ae te tai ae rangin ni maan, ma iroun Russia, anne bon ti te nakonako ae kimototo! Ibukin te raroa, ara kakarekenano e aki mwaiti taina n aron are ti tangiria ni kabatia riki. Ti kona n ikotaki ti tetaina ni katoa tabeua wiki ao ni kabanei uabong ke tenibong ikoikotakira i mwaain ae e a okira mweengana temanna mai iroura. Angiin te tai, e namakinaki iroura bwa ti kainnanoa mwaitin riki te tai nakon arei, ao e karekea nakoira te kaangaanga n taai nako te raurenako. Ma ibukina bwa ti riai ni karaoa te keiaki ae aron anne n noran temanna iroura, ti kakarabwarabwa n reken ao kabonganaan te miniti nako. N ririkiraken ara iraorao, ti a moanna n taraa te tai i mwaaira are ti nang aki manga taekina nakoira te kaboo.
Ara kakarekenano e rang kakukurei ao ni kakaokoro: ti bwabwatika ao n toka n aoti, ti kawari umwanibong, wareki koroboki aika tabu, ti kuka, nakonako n taabo ni kamaangang (teuana ma I buakona bon te taenti), ao ti kawara te tabo n ataei ni karaoi ara mwakuri n ibuobuoki ao n takaakaro ma ataei iai.
Ni katoa te tai are ti kaaitibo iai, ti karaoa te bwai teuana ae boou, ngaia are a mwaiti kukureira iai. I kakaaitau n rang kukunen Vitaly ni babairean tain ara kakarekenano. Mwakuri ni kakukurei ake e bairei a buokira ni koaua ni karekean kinaakira iroura i bon iroura.
Vitaly: Ibukina bwa ataein te reirei ngai, I aki kona ni karekei mwaitin bwaai ake a na kakukurei. Angiin au mwane I kabanea ni mwanangau n nonoran Katya ao ni kabooan au tatarebon. Ma engae ngke e aki tau te kataumwane tiaki nanona bwa e nang aki kakimwareirei ke n aki uaana ara karekenano. N te koaua, tabeua ara karekenano ae kabanea ni kakukurei bon akea naba teuana te tianti ni bane iai.
E taraa n tabaua, ma I tangiria n nora Katya bwa e na tera arona ni waki ma ataei nako ni katobibia, ai ngaia are ti a nako n te tabo n ataei. Anne aekan angiin ara kakarekenano; ti kataia ni kinai arora ni kabane ake ti kona ni karekei.
Maiuakina Ana Kawai te Uea
Vitaly: I Russia, n aron taabo aika mwaiti, ai te waki ngkai irouia aomata bwa te iein moa i mwaain te mare. I mwin are I a kainroua Katya, tabeman raoraou a kaekaai bwa e aera N nang kona naba ni kani mare ma te aine arei n akea ataakina mai moana bwa e boraoi maiuna ma maiu. A iango, n aron ake a iangoi naba ma Katya, bwa te kawai n ataakina raoi bwa e kakan ibukiu ti ngkana I kamanai riki ni maeka ma ngaia.
I tuangiia bwa akea kainnanoan maekanakin te aomata bwa ko na kinaa. I kataia naba ni kamataata nakoiia raoraou n te aro are a na kona n ota iai bwa I a tia n tataroakinna ao ni karekea boona bwa N na mare ma Katya. N tian tataroakinan au rinerine, akea irou makinan taekan te maiu n taanga. I a rang kimwareirei ao n namakina kaanga teuana te maiu ae boou ae bwanin ae taakinaki i matau. Akea temanna ae na kona n totokoa ke ni kabuakakaai ibukin au koaua aio. N te koaua, a katea bukin au rinerine.
Katya: N te tai are e a kan iein iai nakoiu Vitaly, a keiaki au karo n tuangai bwa N na aki iein. A taku bwa e rang rangin ni waekoa iroura bwa ti na kainrouaki ao bwa I tangiria n ataa raoi riki ni koaua Vitaly nakon are I a tia n atai. Au bwaoti n te mwakuri e tuangai naba aekan anne ao e reitia, “Ko na tangiria ni kaai ni maeka ma ngaia i mwaain karaoan am rinerine n aekan anne.”
I nanokawaki bwa aomata a nora anne n taekan te iein ao te utu. I taku bwa a aki ota bwa e na kanga aron kukureia taanga ngkana a mare ao ni kabaeaki n te tembora. Te tangira ae korakora ao te kukurei iroun Vitaly ao ngai are ti namakinna n tain ara mare a riki ni korakora riki n ataakina are ti a kabaeaki n akea tokina.
Vitaly: Katya ao ngai ti mareaki i Omsk ni Beberuare 25, 2006. (N tuan Russia e baireia bwa te mare moa n te tautaeka i mwaain te kabaeaki n te tembora, n aron mwaitiia aba ake a karaoa aio.) Te ingabong are i mwina ti a mwananga nakon te Stockholm Sweden Tembora. Ti toka n te wanikiba i Omsk ao ti kiba teniua te aoa nako Moscow, ike ti kabanea iai nikiran te bong anne. Ngkanne ti tokara te turein ni kangainaa nako Saint Petersburg. N te tai are ti roko ikekei iai ti a manga toka n te bwati ma tabeman Aomata Aika Itiaki Ni Boong Aika Kaitira waniua te aoa nako Helsinki, Finland. Kabanean kawain mwanangara bon te kaibuke 11 te aoa nako Stockholm.
N tokina, ti a tia n roko n te tembora.
Irouia tabeman, te mwananga n aron ae abwabwaki anne e taraa n aekan te kakaewenako, ma n iangoana aika bati, mwanangara ri aon Eurobe e karika te kakukurei.
Bongin kabaeara, Maati 1, 2006, bon te bong ae kakukurei—te bong teuana n rau ao ni karaunano. I ataia bwa te aomata are I tatautaua baina boni ngaia are N na karekea ma ngaia te maiu are akea tokina. Te iango aei n ti ngaia e kaonai n te kimwareirei ae korakora ma te kakaaitau nakon Tamara are i Karawa ibukin onimakinau iroun natina te aine bwa kaainabau. I namakina kaaniu riki Nakoina nakon are mai mwaaina.
Kakaaean Aekan Katein Kristo
Katya: Ngkai Vitaly ao ngai e a reke natira te ataeinaine. E tikiraoi. I tangira neienne bwa e na mare n te tembora n te tai teuana, ao te kabanea n tikiraoi ni boutoka are ti kona n anganna bwa a na reke bwa raao ao kaaro aika itangitangiri.
I kantaningaia bwa e kona ni kakaaea temanna kaain te nakoanibonga ae tau ae iai irouna mwaitin anuan Kristo. Bon noran aekan anua akanne iroun Vitaly ake a buokai n ataia bwa I kona ni mare ma ngaia.
Tera are I bwaka iai iroun Vitaly? N te koaua, e botonimwaane ao ni timwaati, ao e ataa arona ni kareketangira ma te aine. Ma aika tiaki oi ni kainibaire. Iai irouna tera ae N na tangiria n taekinna iai “maata n ana reirei temanna Kristo.” I namakina te ota i nanona. Ngaia bon temanna kaain te nakonibonga ae itiaki.
Vitaly: Eng, e kakukurei te mareaki nakon temanna are ko bwaka irouna. Ma ngkana ara taratara e ti baraaki i aon tein te rabwata, a aikoa reke ngkanne bwaai ake a kantaningaaki bwa moan kakawaki naba—te anua, te aroaro n tamnei, ao anua riki tabeua ake a riai n teimatoan te mare.
I noria bwa e na reke bwa te bwai ni kaun nakoiia tabeman ikawain te roronrikirake ni kakaaean te kaainaba n te Ekaretia bon ti ibukina bwa a aki mwaiti Aomata Aika Itiaki ni Boong Aika Kaitira ike a maeka iai. I nanoangaiia. E ngae n anne, I ataia bwa baikara waki ake ti mena iai, ngkana ti karaoa tabera ao ni katauraoira ni kabaeaki n te tembora, E kona Tamara are i Karawai ni karekea te kawai.
Maing: Taangaia Shmakovs n aia bong ni kabaeaki n 2006; mwanangaia nakon te Stockholm Sweden Tembora e kabanea tao 30 te aoa.
Atai: N te bong aio, taangaia Shmakovs e a reke natiia temanna te ataeinaine. E taku Katya, “I tangira natiu te aine ni mare n te tembora n te tai teuana, ao te kabanea n tikiraoi ni boutoka ae ti kona n anganna bon te riki n raao ao kaaro ngaiia aika itangitangiri.”
Tamnein te Utu ni kukurein taangaia Shmakovs