Blong ol yut
Niu Boe
Mi stap gat wan had taem blong filim se mi mi pat blong wan wod. Famle blong mi i jes muv nomo i kam long kantri. Wod we mifala i bin muv i kam long hem i gat wan bigfala grup blong ol yut, mo hemia bae i fas taem we bae mi mi kam wan “niu boe.” Mowas, mi mas go long wan niufala skul, mo wan tingting i kam kwik long maen blong mi, “Huia bae mi sidaon wetem long taem blong lanj?” Ating bae mi luk wan man long jos, be mi no wantem fosem miwan blong go sidaon long lanj tebol blong wan nara man, speseli from mi no save tu sapos oli wantem mi blong sidaon wetem olgeta longwe!
Fas dei long skul i olsem se bae i stap foreva. Long en, bel blong taem blong lanj i ring. Taem mi stap kamaot sloslo long rum blong lanj, mi bin prea long Papa long Heven blong i helpem mi blong faenem wan man we mi save. Mi lukluk raon blong luk sapos mi save luksave eniwan. Be i nogat wan nating. Mekem se, mi wokbaot i go long wan tebol long narasaed blong lanj rum ia mo kakae lanj blong mi.
Long sem dei, long taem blong klas blong matematik, mi luksave wan fes. Mi bin luk Deved long seminari long moning ia. Hem i bin askem blong luk taemtebol blong mi mo i faenemaot se mitufala i gat sem taem blong lanj. “He, tedei yu stap wea long taem blong lanj?” hem i talem.
“Mi kakae long narasaed blong rum we i stap longwe long ol man,” mi bin ansabak.
“Okei, tumoro yu kam mo sidaon wetem mi long lanj,” hem i talem.
Mi talem tangkyu from wan Papa long Heven we i lavem mi, we i save wanwan nid blong yumi mo i ansarem wanwan prea blong yumi. Mi talem tangkyu tu from wan man we i wantem blong givim wan han blong frensip. Wan samting we i simpol, semmak olsem wan invitesen i save mekem ol bigfala jenis.