Unta Tawgon Ko Nila sa Misyon?

Ni Loran Cook

Tingali nakadungog kamo sa kanta sa Primary nga “Unta Tawgon Ko Nila sa Misyon.” Gani adunay laing importante nga kanta sa mga bata mahitungod sa pagserbisyo og misyon. Nag-ingon kini: “Gusto ko karon mamisyonaryo. Bisan kon gamay pa ako.”¹ Si Elder M. Russell Ballard sa Korum sa Napulog Duha ka mga Apostoles miuyon. Miingon siya, “Ang mga kabatan-onan kinahanglang mopasalig sa ilang mga kaugalingon sayo pa sa ilang kinabuhi sa ideya sa usa ka misyon.”²

Hinoon, ang kasayuran nga kamo kinahanglan nga moserbisyo og misyon ug ang pagbati nga andam nga moserbisyo duha ka managlahi nga mga butang. Asa man kamo magsugod? Ang pagpalig-on sa inyong pagpamatuod ug ang kahibalo sa ebanghelyo mao ang duha ka labing mahinungdanong mga butang nga inyong mahimo. Sa ubos mao ang pipila ka mga paagi nga kamo makaandam sa pagserbisyo og misyon.

1. Hugot nga pagtuo

Kinahanglan nga atong palamboon ang atong hugot nga pagtuo matag adlaw. Si Jesukristo mitudlo, “Kon kamo adunay hugot nga pagtuo kanako kamo makabaton sa gahum sa pagbuhat sa bisan unsa nga butang nga maayo ngari kanako” (Moroni 7:33).

Pagtuon sa mga kasulatan. Kini nagtudlo ug nagpamatuod kang Jesukristo.
Paggamit sa hugot nga pagtuo sa pagsulbad sa personal nga mga problema. Ang pagbaton og hugot nga pagtuo kang Jesukristo makahupay kaninyo sa lisud nga mga panahon ug motabang kaninyo sa pagbuntog sa tanang mga babag.
Pagbaton og mas lig-on nga pagkontrolar sa inyong lawas ug sa hunahuna pinaagi sa pagkat-on sa kaimportante sa edukasyon, kalig-on, ug kahimsog.
Pagpadayon sa paghinulsol, pagsunod sa mga sugo, pagpuasa, ug pag-ampo aron sa paglimpyo sa inyong kinabuhi.
Alang sa batan-ong mga lalaki, pagpalambo og hugot nga pagtuo kang Jesukristo pinaagi sa pagkat-on ug pagtuman sa inyong mga katungdanan sa priesthood.

2. Espiritu

Si Elder Ballard mitudlo usab, “Ang mga misyonaryo kinahanglan nga mahimong limpyo sa moral nga paagi ug andam sa espirituhanong paagi.”³

Pagtuon ug pagsunod sa mga lagda diha sa Alang sa Kalig-on sa mga Kabatan-onan.
Pagtinguha sa giya sa Espiritu Santo pinaagi sa pagpuasa, pagtuon sa mga kasulatan, ug pag-ampo alang sa giya.
Pagbasa mahitungod sa mga gasa sa Espiritu diha sa Doktrina ug mga Pakigsaad 46:11–26. Mainampoon nga magtinguha sa pagdiskobre sa inyong espirituhanong mga gasa. Tinguhaa ang tambag sa inyong mga ginikanan ug mga lider aron sa pagtabang kaninyo sa pagpalambo og espirituhanong mga gasa.
Pangutan-a ang inyong kaugalingon, “Ang mga basahon ba nga akong gibasa ug ang mga programa sa telebisyon ug mga salida nga akong gitan-aw makapabayaw?” Kon dili, paghunahuna kon sa unsang paagi nga kamo makahimo og mas maayo nga mga pagpili alang sa kalingawan.
Pagkat-on sa pagpaminaw sa espirituhanon nga mga pag-aghat.

3. Gugma

Nagkinahanglan kamo og gugmang putli, ang tiunay nga gugma ni Kristo, aron sa pagserbisyo og maayo isip usa ka misyonaryo. Ang paghigugma sa uban dili sayon kanunay. Nagkinahanglan kini og serbisyo, hugot nga pagtuo, sa Espiritu Santo, ug kaisug. Si Mormon miingon nga kinahanglan kamo nga mag-ampo sa tibuok ninyong kusog aron mapuno sa tiunay nga gugma ni Kristo (tan-awa sa Moroni 7:48).

Pag-ampo sa mapainubsanon ug sinsero nga paagi alang sa abilidad sa paghigugma sa uban sama sa paghigugma ni Kristo.
Ipakita ang gugma alang sa inyong pamilya pinaagi sa pagbuhat og mabination nga buhat alang sa matag sakop sa pamilya. Pagpili og usa ka sakop sa pamilya nga nagkinahanglan og dugang nga paghigugma o pagtagad ug paggahin og gamayng panahon uban kaniya.
Ipakita ang inyong gugma alang sa usa ka tawo nga nanginahanglan pinaagi sa pagbuhat og butang nga mabination alang kaniya.

4. Serbisyo

Si Haring Benjamin mitudlo sa iyang katawhan mahitungod sa kaimportante sa pagserbisyo. Miingon siya nga kon kita nagserbisyo sa uban, kita nagserbisyo sa Dios (tan-awa sa Mosiah 2:17).

Paghimo sa serbisyo nga usa ka naandan nga kinaiya. Makatanyag kamo sa paglimpyo sa mga hugasan human sa panihapon, pagtabang sa igsoon sa homework, pakigsulti sa usa ka tawo kinsa nagkinahanglan og higala, o pagtabang sa pagpabiling limpyo sa inyong kasilinganan.
Pag-ampo alang sa kalig-on ug direksyon sa pagsunod sa ehemplo sa Manluluwas mahitungod sa pagserbisyo.
Pagtabang sa inyong grupo sa Young Men o Young Women sa pagplano og usa ka kalihokan sa pagserbisyo.

5. Pagdapit

Si Alma, usa sa bantugan nga mga misyonaryo sa Basahon ni Mormon, midapit niadtong kinsa dili mga miyembro sa Simbahan sa “pagduol ug pagpabunyag ngadto sa paghinulsol” (Alma 5:62). Makasunod kamo sa iyang ehemplo.

Magmahimong usa ka maayong higala ug ehemplo ngadto sa mga higala ug mga sakop sa pamilya kinsa dili mga miyembro sa Simbahan.
Magtinguha og mga oportunidad sa pagtudlo sa inyong mga higala ug mga silingan mahitungod sa ebanghelyo.
Magkat-on sa ebanghelyo ug magpraktis sa pagtudlo niini karon. Pangutana sa inyong ward o branch mission leader alang sa giya kon unsaon sa pagtudlo sa ebanghelyo. Kon mahimo, tambong sa mga leksyon sa higayon nga ang mga misyonaryo magtudlo sa mga investigator.
Magtuon sa Isangyaw ang Akong Ebanghelyo uban sa inyong mga ginikanan alang sa family home evening. Makapuli-puli kamo sa paghisgut mahitungod sa mga leksyon, pagtudlo og tipik niini, ug pagdapit sa matag usa sa paghatag og pagpamatuod sa unsay inyong nakat-unan.

Ang pagserbisyo og misyon usa ka importante nga tumong nga pagahimoon karon, ug ang pagpangandam karon makahatag og kaayohan sa inyong kinabuhi matag adlaw nga mopaingon ngadto sa usa ka misyon. Dili gayud kamo bata pa kaayo aron mosugod sa pagpangandam—dili kamo kinahanglan nga maghulat nga modako.

Mga paghulagway pinaagi ni Sal Velluto ug travis watson