Cov Hluas

Nws Qhia Kev rau Peb Taug Rov Qab Mus Tsev

“Tus Cawm Seej tau los nyob hauv ntiaj teb no los qhia peb seb peb yuav tsum ua neej nyob li cas raws li txoj hau kev uas tau npaj tseg saum ntuj ceeb tsheej—ib txoj hau kev, yog peb yuav ua raws, ces peb yuav muaj kev zoo siab. Nws tus yam ntxwv qhia peb seb peb yuav tsum ua li cas peb thiaj yuav rov qab mus rau peb Leej Txiv Saum Ntuj Ceeb Tsheej lub tsev. Tsis tau muaj dua lwm tus neeg uas tau ‘ua ruaj nrees thiab tsis txav li’ (Mauxiyas 5:15). Nws yeej tsis tau tig ntawm nws tej hauj lwm mus. Nws rau siab ntso ua raws li Leej Txiv lub siab nyiam, thiab Nws tau ua raws nraim li Nws txoj hauj lwm uas los saum ntuj ceeb tsheej los. …

“Nej sawv daws yog ib qho ntawm txoj hau kev uas tau npaj tseg ua ntej tsim ntuj tsim teb raug ntawd. Txij thaum sawv daws kam txais txoj hau kev no nej tau npaj siab los nyob hauv ntiaj teb thaum lub caij nyoog no. Tsis yog nej lam tau lam los nyob hauv ntiaj teb tam sim no. Nej ‘txoj kev ntseeg heev thiab tej hauj lwm zoo’ (Amas 13:3) twb pua lub hauv paus lawm xwv kom nej yuav ua tau txhua nrho yog tias nej yuaj rau siab ntseeg thiab mloog lus. … Nej muaj tej hauj lwm zoo heev uas nej yuav tsum ua. Yog nej yuav ua tau nej txoj hauj lwm uas los saum ntuj ceeb thseej los thiab ua neej nyob raws li txoj kev cawm seej ces, nej yuav tsum ua ruaj nrees thiab tsis txav li.”

Elaine S. Dalton, lub Koom Haum Ntxhais Hluas tus tuam thawj tswj hwm, “At All Times, in All Things, and in All Places,” Liahona, Tsib Hlis Ntuj 2008, 116.