2011
Lub Ntsiab ntawm lub Koom Haum Niam Tsev
April 2011

Cov Mus Saib Xyuas tom Tsev tsab Xov, Plaub Hlis Ntuj 2011

Lub Ntsiab ntawm lub Koom Haum Niam Tsev

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.

Daim Duab

Kev Ntseeg • Tsev Neeg • Kev Pab

Thaum nyuam qhuav hu peb los ua ib pawg thawj tswj hwm, peb tau txais me ntsis ntaub ntawv uas qhia txog lub Koom Haum Niam Tsev zaj keeb kwm. Peb tau thov Vajtswv thiab kawm tej ntawv ntawd, vim xav paub seb lub Koom Haum Niam Tsev muaj tej lub ntsiab dab tsi thiab seb tus Tswv xav kom peb ua li cas. Peb kawm hais tias lub ntsiab rau lub Koom Haum Niam Tsev raws li tus Tswv teem tseg yog kom txhim tsa, qhia, thiab txhawb nqa Nws cov ntxhais kom lawv yuav npaj los txais yuav tej koob hmoov ntawm lub neej uas nyob mus ib txhis.

Kom thiaj ua tau lub Koom Haum Niam Tsev lub ntsiab no kom tiav, tus Tswv tau txhib txhua tus viv ncaus thiab tag nrho lub koom haum no kom ua li no:

  1. Haj yam muaj kev ntseeg thiab ua neeg ncaj ncees.

  2. Ntxiv dag zog rau tsev neeg thiab lub vaj lub tsev.

  3. Muab kev pab thaum ua hauj lwm pab tus Tswv thiab Nws cov me nyuam.

Peb tsuas muaj peev xwm ua li no thaum peb ua raws li tus Tswv txoj hau kev thaum peb nrhiav, txais, thiab ua raws li tej kev tshwm sim uas peb tau. Yog tias peb tsis tau kev tshwm sim rau peb tus kheej, peb yuav ua tsis tau li. Yog tias peb ua raws li tej kev tshwm sim uas peb txais, peb yuav poob qab tsis tau. Tus yaj saub Nifais qhia peb tias tus Vaj Ntsuj Plig Dawb Huv yuav qhia peb “txhua yam uas peb yuav tsum ua” (2 Nifais 32:5). Peb yuav tsum nyob ntsiag to kom peb thiaj yuav hnov tau tus Ntsuj Plig lub suab.

Cov viv ncaus es, peb muaj ntiag tug hauj lwm tseem ceeb heev uas yuav pab ua Vajtswv lub nceeg vaj thiab npaj kev rau tus Tswv rov qab los. Tiag tiag mas, yuav ua tsis tau tus Tswv txoj hauj lwm no yog tias Nws cov ntxhais tsis los pab ua thiab. Yog li ntawd, tus Tswv thiaj xav kom peb yuav haj yam sib zog pab. Nws xav kom peb yuav pab ua kom lub Koom Haum Niam Tsev ua raws li nws lub ntsiab ntau tshaj yav tas los lawm.

Julie B. Beck, Koom Haum Niam Tsev tuam thawj tswj hwm.

Los ntawm cov Vaj Lug Kub

Kev Cai 6:5–7; Lukas 10:30–37; Yakanpaus 1:27; 2 Nifais 25:26; Mauxiyas 3:12–13

Los ntawm Peb zaj Keeb Kwm

Nyob hauv lub Koom Haum Niam Tsev ib txoj kev sib ntsib thaum lub Rau Hli Ntuj hnub tim 9, 1842, tus Yaj Saub Yauxej Xamiv qhia cov muam hais tias lawv lub koom haum no “tsis yog los pab cov neeg pluag xwb, tiam sis kuj yog los pab cov ntsuj plig tau kev cawm dim thiab.”1 Txoj kab lus uas hais txog sab ntsuj plig thiab sab cev nqaij daim tawv tib si twb yog qhov uas ua lub hauv paus rau tag nrho lub Koom Haum Niam Tsev zaj keeb kwm. Hauv xyoo 1906 Thawj Tswj Hwm Joseph F. Smith (1838–1918) qhia hais tias: “[Lub Koom Haum Niam Tsev] tsis yog los pab cov neeg pluag, cov neeg uas muaj mob thiab cov neeg txom yem xwb, tiam sis ib qho ntawm lawv txoj hauj lwm—thiab yog qhov tseem ceeb tshaj plaws, yog—kom saib xyuas Xi-oos cov ntxhais thiab cov niam sab ntsuj plig thiab pab txhiv lawv dim; xyuas kom tsis txhob xyeej ib tug neeg pov tseg, tiam sis pov hwm txhua tus ntawm kev txom nyem, kev nyuaj siab, kev tsaus ntuj nti, thiab tej kev phem uas tawm tsam lawv hauv ntiaj teb no.”2 Hauv xyoo 2001 Txwj Laug M. Russell Ballard ntawm Pawg Kaum Ob tug Thwj Tim rov qab hais tias, “Txhua tus muam hauv lub Koom Txoos no uas tau nrog tus Tswv sib khi lus tseg yeej raug txib saum ntuj ceeb tsheej los pab cawm tej ntsuj plig dim, coj cov poj niam hauv ntiaj teb no txoj hau kev, ntxiv dag zog rau tej yim neeg hauv Xi-oos, thiab pab txhim tsa Vajtswv lub nceeg vaj.”3

Lus Cim

  1. Joseph Smith, History of the Church, 5:25.

  2. Teachings of Presidents of the Church: Joseph F. Smith (1998), 185.

  3. M. Russell Ballard, “Women of Righteousness,” Liahona, Kaum Ob Hlis Ntuj 2002, 39.

© 2011 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/10. Pub txhais ua lus Hmoob: 6/10. Kev txhais Visiting Teaching Message, April 2011. Hmong. 09764 295

Kuv Yuav Pab Li Cas?

  1. Kuv tau txais kev tshwm sim zoo li cas uas yuav pab kuv cov viv ncaus ntxiv rau lawv txoj kev ntseeg thiab kev ua neeg ncaj ncees thiab ntxiv dag zog rau lawv tsev neeg thiab lawv vaj lawv tsev? Kuv muab tau kev pab li cas?

  2. Kuv yuav siv tsab xov xwm no li cas kom thiaj ntxiv tau zog rau kuv txoj kev ntseeg thiab pab kuv haj yam rau siab ntso ua neeg ncaj ncees?

Luam