Walay Paglubad nga mga Istorya sa Ebanghelyo
Ang Konsepto sa Kaminyoon sa Santos sa Ulahing mga Adlaw
Si Hugh B. Brown natawo niadtong Oktubre 24, 1883, sa Granger, Utah. Siya naordinahan isip Apostol niadtong 1958. Siya mialagad isip magtatambag ni Presidente David O. McKay sulod sa walo ka tuig. Ang mosunod nga artikulo kinutlo sa iyang libro nga You and Your Marriage.
Ang kaminyoon usa o kinahanglang usa ka sakrament. Ang pulong nga sakrament gihatagan og lain-laing kahulugan, apan diha sa mga tawo nga Kristyanos kini nagpasabut og usa ka buhat sa relihiyon o seremonyas, gipahigayon sa usa ka tawo nga adunay katungod. Kini usa ka saad, o maligdong nga pakigsaad, usa ka espirituhanong timaan o kasabutan tali sa mga partido nga nagsabut ug tali kanila ug sa Dios. Kanang kaminyoon nga gipasiugdahan ug gibalaan sa Ginoo mismo sa Iyang Kaugalingon gipakita sa mosunod nga mga kinutlo:
“Ug miingon ang Ginoong Dios, dili maayo nga ang tawo mag-inusara; pagabuhatan ko siya ug katabang nga angay kaniya. …
“Tungod niini ang lalaki magabiya sa iyang amahan ug sa iyang inahan, ug moipon siya sa iyang asawa: ug sila mahimong usa ka unod” (Genesis 2:18, 24).
Sa dihang si Jesus mibiya gikan sa Galilea ug miabut ngadto sa mga baybayon sa Judea lapas sa Jordan, usa ka dakong pundok ang misunod Kaniya, ug ang mga Pariseo nangutana Kaniya kabahin sa diborsyo.
“Siya mitubag nga nag-ingon, Wala ba ninyo hibasahi, nga ang nagbuhat kanila sukad sa sinugdanan nagbuhat kanila nga lalaki ug babaye,
“Ug nag-ingon, Tungod niining maong hinungdan kinahanglan pagabiyaan sa lalaki ang iyang amahan ug ang iyang inahan ug makig-ipon siya sa iyang asawa: ug silang duha mahimong usa?
“Tungod niana dili na sila duruha, kondili usa. Busa ang sa Dios gihiusa, sa tawo dili pagabulagon sila” (Mateo 19:4–6).
Ang Kaminyoon Makatuman sa mga Katuyoan sa Dios
Yano lang kini nga ang Dios mitinguha nga ang lalaki ug babaye kinahanglang mahiusa. Pinaagi sa personal nga pagpahigayon niining unang kasal, Iyang gibalaan ang kaminyoon. Kini normal, makapahimsug, ug madanihong kahimtang ug gipasiugdahan aron sa pagtuman sa katuyoan sa Dios dinhi sa yuta.
Kini ang kinauyokan nga elemento sa pagtukod og panimalay. Kini labaw pa sa institusyon sa tawo nga gikontrolar lang pinaagi sa naandan ug sibil nga balaod. Kini labaw pa sa usa ka kontrata ubos sa pagtugot sa balaod sa moral. Kini usa o kinahanglang usa ka sakrament sa relihiyon nga pinaagi niini ang mga lalaki ug mga babaye solemne nga mobuhat aron sa pagkooperar uban sa Dios sa Iyang gideklarar nga katuyoan nga mahimong posible ang kinabuhi sa yuta ug mortalidad sa Iyang espiritu nga mga anak ug sa pagpahinabo sa pagka-imortal ug sa kinabuhi nga dayon sa tawo.
Adunay miingon nga ang labing taas, labing mahalaron, ug labing nindot nga kinabuhi mahimong maangkon gawas sa pakigsaad sa kaminyoon. Sa lain nga pagkasulti, ilang gidid-an ang kadtong nagtinguha sa labing taas nga kahimayaan nga “mahugawan pinaagi sa pisikal ug susama sa hayop nga mga panag-uban.” Walay kapasikaran diha sa kasulatan ang ingon nga doktrina. Sa basahon sa Mga Proverbio atong mabasa, “Bisan kinsa nga makakaplag og usa ka asawa nakakaplag sa kaayohan, ug makabaton sa kalooy sa Ginoo” (Mga Proverbio 18:22). …
Ug diha sa Doktrina ug mga Pakigsaad atong mabasa, “Ug usab, sa pagkatinuod Ako moingon nganha kaninyo, nga kinsa kadto nga nagdili sa pagminyo wala itugot sa Dios, kay ang kaminyoon gi-orden sa Dios ngadto sa tawo” (D&P 49:15).
Ang Kaminyoon sa Templo Makahatag og Tinuod nga Kalipay
Ang mga Santos sa Ulahing mga Adlaw nagtuo nga aron maangkon ang labing nindot sa kinabuhi ug tumang kalipay niining kalibutan ug sa sunod, ang mga lalaki ug mga babaye kinahanglang magminyo sa templo alang sa panahon karon ug hangtud sa kahangturan. Kon wala ang mga ordinansa sa sealing sa kaminyoon sa templo, ang tawo dili makaabut sa kahimtang sama sa dios o makadawat og hingpit nga kalipay. …
Alang sa usa ka Santos sa Ulahing mga Adlaw, adunay usa lamang ka klase sa kaminyoon nga madawat gayud: sa templo o celestial nga kaminyoon, nga ipahigayon lamang diha sa mga templo sa Simbahan. Ang mga templo gitukod ug gipahinungod sa kabalaan ngadto sa Ginoo aron adunay usa ka dapit diin ang espiritwal ug mahangturong mga seremonyas ug mga ordinansa mahimong ipahigayon. Samtang atong giila ang mga kasal nga sibil nga gipahigayon pinaagi sa mga ministro sa ubang mga simbahan ug mga kasal sa sibil nga gipahigayon sa mga opisyal sa balaod o ubang may legal nga pagtugot sa pagpahigayon niini, kita nagtuo nga pinaagi lamang diha sa templo sa Dios mapahigayon ang kaminyoon alang sa karon ug hangtud sa kahangturan ug pinaagi lamang sa tawo nga adunay katungod nga gihatag ni Kristo ngadto kang Pedro sa dihang Siya miingon, “Bisan unsay imong pagabugkoson dinhi sa yuta, didto sa langit pagailhon kini nga binugkos” (Mateo 16:19).
Kini nga katungod gipasabut diha sa kasulatan isip “mga yawe sa gingharian sa langit” (Mateo 16:19), ug sa celestial nga kaminyoon kadtong mga yawe moabli sa pultahan niana nga gingharian.
Ang mga Panginahanglan Hingpit nga Natuman
Ang tawo adunay pihong nag-una nga mga panginahanglan—moral, sosyal, biological, ug espiritwal—ug kini hingpit nga natuman lamang diha sa giorden nga institusyon sa Ginoo sa mahangturong kaminyoon.
Aron makapuyo og mabungahong kinabuhi dinhi ug sa kinabuhing dayon sa sunod nga kinabuhi, ang tawo kinahanglang mohigugma ug higugmaon, moserbisyo ug mosakripisyo, adunay responsibilidad ug mobansay sa iyang gahum sa pagpasanay nga hinatag sa Dios. “Ako mianhi aron sila makabaton og kinabuhi, ug sa pagkabaton niini sa madagayaon gayud” (Juan 10:10).
Apan tingali ang labing dako nga bili sa kaminyoon dili kanang benepisyo nga makuha sa indibidwal nga lalaki ug babaye gikan niini. Ang katuyoan sa ilang panaghiusa sa sinugdanan gipakita pinaagi sa sugo sa Ginoo: “Sumanay ug dumaghan kamo, ug pun-on ninyo ang yuta, ug magagahum kamo niini” (Genesis 1:28). Sa hustong kaminyoon, adunay oportunidad sa tawo nga motuman sa iyang natural nga kadasig nga mosanay ug mabungahon. Kini hingpit nga matuman ug hustong matagamtam diha lamang sa relasyon sa kaminyoon, sa pagpanganak ug pag-matuto sa bata. Ang mga ginikanan kinahanglang mohinumdom nga ang mga anak nga natawo ngadto kanila—ilang mga anak—mga anak usab sa Dios. Siya mao ang Amahan sa ilang espiritu, ug sa kinabuhi sa wala pa dinhi sa yuta Siya maalamong mihimo og kondisyon nga ang mahangturong elemento ug mahangturong espiritu dili na gayud magkabulag ug makadawat og hingpit nga kalipay. Busa ang mga Santos sa Ulahing mga Adlaw nagtuo nga ang Dios sa tinuoray mao ang ikatulo nga kauban niining relasyon ug nga ang pagpanganak dinhi sa kalibutan ubos sa balaanong tinugutan nga institusyon sa kaminyoon usa ka bahin sa Iyang plano sa pagpahinabo sa pagka-imortal ug sa kinabuhi nga dayon sa tawo.
Ang Mahangturong Kinaiyahan sa Kaminyoon
Sa dihang ang Ginoong Jesus mitudlo nga ang paghigugma sa Dios ug ang paghigugma sa katawhan isip ang duha ka dako nga mga sugo, Siya mihimaya sa gugma. Sa pagkatinuod, kita giingnan nga ang Dios mao ang gugma. Busa, sa ingon ang Dios mahangturon, busa ang gugma kinahanglang magmahangturon, ug ang mga bunga ug mga panalangin niini gituyo nga mopadayon hangtud sa kahangturan. Apan ang pagtagamtam sa mga pribelihiyo ug mga kaayohan sa mahangturong gugma nga may kalabutan ngadto sa mga bana ug mga asawa, mga ginikanan ug mga anak, ang ordinansa nga nagtugot ug nagbalaan niining labing nindot sa tanang relasyon dili madawat kon kini adunay kinutuban “hangtud sa kamatayon kamo magbulag.” Aron ang mga relasyon sa pamilya ug ang panag-uban sa kaminyoon mahimong mahangturon, ang kontrata sa kaminyoon kinahanglang may awtorisadong nakasulat, “alang sa karon ug hangtud sa kahangturan.”
Ang tanang tawo kinahanglang makasabut sa ilang responsibilidad ngadto sa ilang mga anak ug sa mga pakigsaad nga ilang gihimo nga may kalabutan niini. Sa dihang ang Ginoo miingon, “Kita kon wala sila dili mahimo nga hingpit” (D&P 128:18), Siya nagpasabut sa usa ka kadena nga nagsumpay sa umaabot og ingon man sa nangagi. Sa pagkatinuod, kita mahimong adunay direkta nga responsibilidad niadtong gisalig kanato niining kinabuhi kaysa atong mga katigulangan. Kita mahimong walay tulubagon sa mga sala, sala nga tinuyo [commission] o sala nga pagkapakyas sa pagbuhat [omission], sa atong mga katigulangan, apan Siya nagpasidaan nga enkaso nga ang napakyas anaa sa atong mga kaliwatan, kon kini may kalabutan sa atong pagkapakyas sa atong katungdanan ngadto kanila, ang mga sala maanaa sa atong mga ulo.
Usa sa mga panalangin niadtong makadawat sa labing taas nga kahimtang sa celestial nga gingharian mao ang panalangin sa mahangturong paglambo, diin, diha sa ubang mga butang, nagpasabut nga bisan human sa kamatayon ang tawo mahimong mopadayon sa pagtabang sa Dios sa pagpahinabo sa pagka-imortal ug sa kinabuhi nga dayon sa tawo.
Paglambo isip Mahangturong mga Kapikas
Ang konsepto sa Santos sa Ulahing mga Adlaw sa mahangturong pag-uswag naglakip sa mahangturong paglambo, mahangturong pagdugang sa kahibalo, gahum, salabutan, kasayuran, ug tanang mga kinaiya ug mga kapasidad sa pagka-dios. Apan sa plano sa Dios, ang tawo dili makakab-ut niining kahimtang sa pagpadayong kahingpitan sa iyang wala mahuman o dili minyo nga kahimtang. Kinahanglang adunay paglambo ug pagtubo sa tibuok tawo—sa laing pagkasulti, ang tawo kinsa nakakaplag ug nahiusa sa iyang kapikas.
Kining konsepto sa kaminyoon, uban sa balaanong panglantaw, makahatag og bag-ong kahulugan ug makadugang sa kaimportante, dignidad, ug himaya sa ideya sa kaminyoon. Uban niini nga konsepto ang manggihunahunaon nga tawo mahimong mas mabinantayon ug magpili og maayo sa iyang mahangturong kapikas. Siyempre sa dili pa mosulod niining mahangturong kontrata, ang lalaki ug babaye kinahanglang magmapainubsanon ug manggihunahunaon ug kinahanglang mainampuon nga magtinguha sa balaanong paggiya.
Ang kabalaan sa relihiyusong paagi ug kabalaan sa relasyon sa kaminyoon [kay] mapalambo gayud ug mapanindot kon ang magtiayon, sa dili pa magminyo—ug sila kinahanglan gayud, pareha og tinuohan—magsugod sa paghunahuna sa susama nga tumong. Sila kinahanglang mangandam ug takus nga modawat sa sagrado nga ordinansa diha sa mga edipisyo diin ang takus lamang ang mahimong mosulod. Dinhi sila modawat og mga instruksyon, mohimo og mga pakigsaad, ug dayon diha sa altar mosaad sa mahangturong gugma ug pagkamaunungon, ngadto sa usag usa, diha sa presensya sa Dios ug sa mga anghel. Sigurado ang ingon nga konsepto ug praktis, lakip ang mga nag-ubang obligasyon niini, makapalig-on sa panimalay, makapahimaya sa institusyon sa kaminyoon, ug makaluwas sa mga kalag sa tawo.
Usa ka Buhat sa Hugot nga Pagtuo
Ang ingon nga kaminyoon importante nga usa ka buhat sa hugot nga pagtuo, gisolemne diha sa presensya sa balaanong kapikas. Kinahanglang adunay hugot nga pagtuo ug kaisug aron makita kini, sa paglahutay ngadto sa katapusan, bisan pa sa mga kalisdanan, mga pagsulay, mga kasagmuyo, ug panagsa nga pagkamatay nga mahimong mahitabo.
Kon ang tawo modawat sa mga kondisyon ug mga obligasyon niining mahangturong panag-uban, kinahanglang iyang masabtan nga ang kapakyasan dinhi mao ang hapit gayud mapakyas sa hingpit. Bisan unsa man siya kamalampuson sa ubang mga natad sa kalihokan, kon ang usa ka tawo mapakyas sa pagtuman sa mga obligasyon nga gipahamtang sa mahangturong pakigsaad, ang makalilisang nga silot mao ang pagkawala sa celestial nga himaya, inubanan sa responsibilidad sa mga kadaut nga nahiaguman niadtong iyang kakontrata ug kang kinsa siya responsable.
“Ang kaminyoon gi-orden sa Dios ngadto sa tawo.
“Busa, kini subay sa balaod nga siya kinahanglan adunay usa ka asawa, ug silang duha, mahimo nga magkahiusa, ug tanan niini aron nga ang yuta makatuman sa katuyoan sa iyang pagkalalang;
“Ug nga kini unta mapuno uban sa gidaghanon sa mga tawo, sumala sa iyang paglalang sa wala pa mabuhat ang kalibutan” (D&P 49:15–17).
Paghulagway sa litrato pinaagi ni Jerry Garns
Sa ibabaw: paghulagway sa litrato pinaagi ni Jerry Garns; sa ubos: paghulagway sa litrato pinaagi ni April Newman