Atong Luna

Ang Akong Paborito nga Kasulatan

2 Nephi 2:11

Kini nga bersikulo nahimong giya nako kanunay ug inspirasyon sa panahon nga magduha-duha ako, mawad-an sa paglaum, o sa malisud nga sitwasyon. Nahimo na kini nakong paborito nga tudling sa kasulatan sukad nakapangutana ko kon nganong adunay panginahanglan og katugbang. Ngano nga kinahanglan man nga adunay mga pagsupak? Ngano nga dili man mahimo ang kinabuhi nga positibo, malipayon, sayon, ug maayo lamang? Nganong kinahanglan man nga maanaa ang dautan?

Kini nga bersikulo nakatabang kanako nga makasabut sa kinabuhi ug sa mga pagkakuti niini. Nakatabang kini nako nga nahimong mas mapasalamaton sa kahulugan sa kinabuhi. Nakapaamgo kini nako sa katuyoan sa katugbang ug kinahanglan nga mapasalamaton ako alang niini. Kay kon wala kini, dili gayud kita masayud sa tinuod nga kahulugan ug katahum sa kinabuhi. Kon wala ang katugbang, dili gayud kita masayud kon unsaon sa paghigugma, unsaon sa pagmalipayon, o unsaon sa paglampos. Nakat-on ako sa paghigugma sa kinabuhi ug sa pagdawat niini nga sama sa ingon ug sa pagsalig sa Ginoo tungod kay ang Iyang kaalam dili mapangutana.

Sheena P., Philippines

“Ang akong tambag alang natong tanan mao ang pagtan-aw sa parola sa Ginoo. Walay gabon nga ingon ka baga, walay gabii nga ingon ka ngitngit, walay unos nga ingon ka kusog, walay marinero nga nawala nga dili maluwas sa nagdan-ag nga kahayag. Kini nagtawag diha sa mga unos sa kinabuhi. Ang parola sa Ginoo nagpadala og signal nga dali mailhan ug dili gayud mapakyas.”

Presidente Thomas S. Monson, “Usa ka Pulong sa Pagtapos,” Liahona, Mayo 2010, 113.

Unsaon sa Pagbaton og Limpyo nga mga Hunahuna

Bisan tuod kon ang dautang mga hunahuna moabut kanato, dili gayud nato kini tugutan nga mosulod ug makapahimutang ngari kanato. Ang pinakamaayong panahon sa pagpanalipud sa atong mga kaugalingon batok sa tintasyon mao ang panahon nga ang panghunahuna nagsugod sa paghulma; dugmoka ang liso, ug ang tanom dili gayud motubo. Kon makita nako ang akong kaugalingon nga anaa niini nga sitwasyon, akong kantahon ang akong paborito nga himno ug maningkamot sa paghunahuna sa panagway ni Jesus diha sa akong kasingkasing hangtud nga ako makahimo sa pagbatok. Kon determinado kita nga mobatok sa dautan nga mga hunahuna, mobiya kini.

Jorge G., Venezuela

Gikuha ko kini nga litrato didto sa Thessaloníki, Greece. Nagpahinumdom kini nako sa gabon sa kangitngit sa damgo ni Lehi (tan-awa sa 1 Nephi 8:22–24).

Kevin K., Germany

Ipadala ang inyong istorya, litrato, o unsay inyong ikasulti sa [e-mail]. Ilakip ang inyong tibuok pangalan, ward o branch, stake o district, ug pagtugot sa ginikanan (ang e-mail madawat). Ang mga gisumiter mahimo nga i-edit alang sa gitas-on o sa pagklaro.

Paghulagway sa libro pinaagi ni Gene Christiansen; paghulagway sa parola pinaagi ni Scott Greer