Cov Mus Xyuas tom Tsev tsab Xov, Kaum Hli Ntuj 2011

Yog Tias Peb Tsis Txhob Ua Xyem Xyav

Julie B. Beck, Koom Haum Niam Tsev tus tuam thawj tswj hwm

Cia li kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.

Kev Ntseeg • Tsev Neeg • Kev Pab

Nyob hauv Phau Ntawv Maumoos peb nyeem txog cov tub hluas uas muaj peev xwm, muaj siab loj thiab, muaj zog heev li. “Muaj tseeb tiag, lawv yog neeg ntawm txoj kev tseeb thiab txoj kev rau siab, vim lawv tau raug qhia kom coj Vajtswv tej lus txib thiab kom mus ncaj ncaj rau ntawm nws.” (Amas 53:21). Cov tub hluas uas muaj kev ntseeg heev no yeej hais tias yog vim lawv niam txawj qhuab qhia—Lawv niam tej yam ntxwv thiab yog cov nai khu.

Cov niam tsev uas ua neej nyob rau thaum Hilamas cov tub rog ua neej nyob rau ib lub sij hawm uas tsis zoo li peb cov neej tam sim no. Lawv lub neej nyuaj heev thiab muaj kev ntshai loj heev, thiab cov hluas yeej raug hu los mus tiv thaiv kom thiaj li muaj kev ywj pheej ntawm sab cev nqaij daim tawv thiab ntawm sab ntsuj pliag. Niaj hnub nim no peb ua neej nyob rau hauv ib lub ntiaj teb uas peb, “tsis yog tawm tsam neeg, tiam sis yog peb tawm tsam tej dab uas nyob saum nruab ntug, tsis hais cov thawj, tej uas muaj hwj chim loj thiab tej uas muaj hwj chim kav tiam tsaus ntuj.” (Efexaus 6:12).

Tej lub sij hawm uas nyuab heev no yuav xav tau tej niam txiv uas muaj siab loj thiab ua tau yam ntxwv kom los qhia tej kev tseeb uas Hilamas cov tub rog yeej paub txog lawm. “Yog lawv tsis txhob ua xyem xyav, Vajtswv yuav cawm lawv dim” (Amas 56:47). Kev qhia thiab ua tau ib tug yam ntxwv rau qhov tseeb no yuav tsum yog ua tib zoo saib xyuas zoo zoo. Txawm li ntawd, los peb tsis tas ntshai. Peb paub hais tias peb yog leej twg thiab tias Vajtswv yog leej twg thiab peb twb tau nrog Nws sib lhi lus tseg lawm, ces peb—zoo ib yam li co niam ntawm cov tub rog—uas peb yuav pab tau kom zoo mus li.

Feem ntau mas, txhua tus ntawm Hilamas 2,060 tus tub rog no yeej yog muaj ib leej niam zoo pab lawv ntag. Tab sis tsis yog cov niam no pab xwb. Cov niam no muab lawv tej kev ntseeg thiab tej yam ntxwv los sib koom ua ke nrog rau lwm tus poj niam thiab txiv neej uas coj ncaj ncees kom thiaj li los qhia tau lub hwj chim ntawm tej kev khi lus. Cov hluas thaum lub sij hawm ntawd yeej to taub zoo txog lawv niam thiab txiv tej kev khi lus tseg tias tsis txhob sib ntaus sib tua lawm. Txawm hais tias zoo li yog ib yam uas yuav ua tsis tau kiag li, los ib Leej Txiv Saum Ntuj Ceeb Tsheej uas hlub lawv heev thiaj li pab kom tau ib txoj kev rau cov niam thiab cov txiv no ua kom tau raws li lawv tej lus khi tseg—thiab txuag tau lawv tej kev ywj siab li (saib Amas 56:5–9). Peb yuav tsum ua raws li peb tej lus khi tseg thiab kom cov me nyuam thiab cov hluas—peb tej me nyuam thiab cov me nyuam hauv peb pawg ntseeg, ceg ntseeg, cov me nyuam nyob ntawd peb ib ncig, thiab peb tej zej zog—thiaj li to taub thiab txhawb nqa tej kev khi lus tseg.

Thaum peb ua raws li peb tej lus khi tseg, ces Leej Txiv Saum Ntuj Ceeb Tsheej thiaj li yuav npaj ib txog kev rau peb. Peb yuav tsum ua raws nraim li peb tej lus khi tseg. Piv txwv hais tias, peb yuav tsum ua raws nraim li peb hais thaum peb thov Vajtswv, kawm vaj lug kub, kom muaj ib daim ntawv tso cai nkag hauv lub tuam tsev, hnav ris tsho uas npog lub cev zoo, saib Hnub Caiv rau nqi. Thaum peb ua tau li no, ces peb cov me nyuam thiaj li yuav paub thiab hais tau hais tias, “Peb yeej tsis ua xyem xyav peb niam yeej paub lawm” (Amas 56:48).

Cov poj niam hauv Hnub Nyoog Kawg uas paub hais tias lawv tej dag zog yog los ntawm tus Tswv txoj kev Theej Txhoj los no yeej tsis cia tso tseg thaum uas muaj teeb meem los sis muaj kev nyuaj siab li. Thaum peb ua neeg uas ceev tej lus khi tseg, ces peb yuav txawj sawv ntseg, saib xyuas, thiab tiv thaiv cov me nyuam thiab cov hluas kom muaj ib hnub twg peb thiaj li yuav hais tau txog tiam neeg no hais tias, “kuv yeej tsis tau pom ib zaug dua li uas muaj siab loj tag npaud, yeej tsis tau pom li” (Amas 56:45).

Los ntawm cov Vaj Lug Kub

Amas 53; 56–58

© 2011 by Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/10. Pub txhais ua lus Hmoob: 6/10 Kev txhais Visiting Teaching Message, October 2011. Hmong. 09770 295

Kuv Yuav Pab Li Cas?

Kuv yuav ua li cas thiaj li pab kom kuv cov viv ncaus paub thiab siv tau lub hwj chim uas lawv muaj kom thiaj li pab tau tiam neeg no?
Kuv yuav nrhiav tau kev tshoov siab dab tsi hauv Phau Ntawv Maumoos kom thiaj li daws tau tej kev cov nyom uas kuv muaj niaj hnub nim no?