Pasko alang sa Una nga mga Pioneer

Ang mga bulan sa grabe nga tingtugnaw nahimong lisud nga panahon alang sa kadaghanan sa mga pioneer, ug ang mga kapanguhaan alang sa mga regalo sa Pasko ug mga pagsaulog kanunay nga nihit. Bisan pa man wala kana makapugong sa una nga mga pioneer gikan sa paghimo og espesyal nga mga handumanan atol sa kapaskohan. Ania ang pipila ka mga rekord kon giunsa sa pagsaulog ang Pasko sa kapanahunan sa mga pioneer:

Ang Akong Pinakamalipayon nga Pasko

“Ang akong una nga Pasko sa Walog sa [Salt Lake] nahitabo pagka-Sabado. Among gisaulog ang adlaw atol sa Igpapahulay. Tanan kami nagliyok sa poste sa bandila sa tunga sa kuta. Didto nagmiting kami. Pagkaanindot niadto nga miting. Nanganta kami og mga pagdayeg sa Dios. Naghiusa kami sa pangbukas nga pag-ampo, ug ang mamumulong nianang adlawa kanunay gayud nakong mahinumduman. Adunay mga pulong sa pagpasalamat ug kamaya, walay nalitok nga negatibong mga pulong. Ang mga tawo malaumon ug malipayon, tungod sa ilang hugot nga pagtuo sa umaabut. Human sa miting adunay paglamanohay sa tanan. Ang uban nakahilak sa kalipay. Ang mga bata nanagdula sa maong dapit ug libut sa gisunog nga mga sagbut nianang gabhiona. Kami nagpundok ug nanganta og, ‘Dali, dali kamo mga Santos, maglipays paglakaw.’ Kami adunay linuto nga koneho ug gamay nga pan alang sa panihapon. Tanan kami adunay igo nga makaon ug diha ang pagbati sa hingpit nga kalinaw ug pagbinatiay. Wala pa akoy sama ka malipayon nga Pasko sa akong kinabuhi.”

Wala mailhi nga author, gikutlo ni Bryant S. Hinckley, sa Kate B. Carter, comp., Our Pioneer Heritage, 20 vols. (1958–77), 14:198.

Oy, Kadali sa Panahon

“Usa ka gabii sa dise-sais anyos pa ako, si Papa mihimo og Christmas party alang sa kaugalingon niyang mga anak ug sa ilang mga pamilya ug sa pinakaduol nga mga silingan. Nanayaw kami. Ang akong igsoong mga lalaki ang mga musikero. Nahibalo kami nga tumong ni Papa nga humanon ang party inig ka alas diyes, diin tukma niyang gihimo sa tunga-tunga gayud sa square-dance pinaagi sa pagpahunong sa mga musikero. Apan wala mahibalo si Papa nga gialsa ako sa akong mga igsoon ngadto sa orasan sa daghang higayon nianang gabhiona. Sa matag higayon isibug ko kini og balik sa traynta ka minutos. Tingali lapas na gayud kadto sa tungang gabii dihang nahuman ang party.”

Gikan sa rekord sa Christian Olsen family, sa Carter, Our Pioneer Heritage, 15:199.

Usa ka Malipayon nga Panahon

“Sa dihang nangmata na ang mga bata sa kabuntagon sa Pasko niadtong 1849, walay monyeka nga makita sa tibuok yuta, wala, bisan gani usa lang ka piraso nga kendi, o usa ka mansanas sulod sa mga payag. Apan ang mga bata ug ang ilang mga ginikanan malipayon ra nianang tanan. Malipayon sila nga sila aduna pay gamayng makaon, ug ang mga gilauman nga ilang gipaabut diha sa bag-o nilang mga panimalay nag-anam og kasanag sa matag adlaw. Apan, bisan wala may mga monyeka o mga dulaan alang sa mga bata, ang mga papa ug mga mama dili gayud makalimot sa Pasko, ug sa wala pa matapos ang adlaw tanan sila adunay usa ka malipayon nga panahon.

“Sa pagkagabii nag-abut sila sa payag ni John Rowberry. Kini ang balay diin ang unang mga miting gipahigayon. Didto nanayaw sila og kinaraan sa pagtapos sa adlaw, ug mao kadto ang pinakasadya nga pundok nga sukad natigom sa usa ka panagpundok sa Pasko. … Apan ang dakong problema mao ang tukar. Walay bisan usa nga matang sa instrumento ang anaa. Si Cyrus Call maayo kaayo nga managhoy ug nanaghoy siya og mga tukar samtang ang malipayon nga mga pioneer nanagsayaw.”

Sarah Tolman, sa Kate B. Carter, comp., Treasures of Pioneer Heritage, 6 vols. (1952–57), 4:197–98.