Ang Kahayag sa Anak

Ni Jeff S. McIntosh

Ang kahayag makatabang kanatong makakita sa kamatuoran—ug makakita niini nga mas klaro.

Human sa pagtrabaho sa mga department store nga namaligya og sinina sa mga lalaki sulod sa daghang katuigan, ingon og nahanas na ako sa pagparis sa polo ug sa kurbata ngadto sa mga terno nga akong gibaligya. Makalipay kaayo ang pagpili sa tukma gayud nga kombinasyon, ug ang akong mga kustomer sa kasagaran malipay sa mga pagpili nga akong gipresentar kanila.

Bisan pa, sa usa ka partikular nga tindahan, ang mga terno anaa sa dapit nga gipadan-agan og mga suga nga fluorescent samtang ang mga polo ug kurbata gi-display sa laing dapit nga anaa sa silaw nga mga bombilya. Kini nga kalainan sa mga pagsuga naghatag og ingon nga hagit.

Sa kasagaran mahitabo nga human ang kustomer mohukom og usa ka polo o duha, moadto ko sa pagpili sa nakadisplay nga mga sinina ug kurbata nga sa akong hunahuna mas maayo. Apan sa higayon nga ang polo ug ang kurbata kuhaon na gani gikan sa usa ka seksyon ngadto sa pikas ug itapad sa mga terno, ang resulta makatingala—ang mga kolor “nausab” diha sa bag-o nga hayag ug dili na gayud magkauyon.

Ang pagdala sa terno diin ang mga polo ug kurbata gi-display mas bintaha. Apan bisan pa niining paagiha, ang mga kustomer sagad nga malibug, nakabantay nga ang terno nga among gigunitan mora og dili pareho sa usa nga ilang gipili. Ang terno nga tan-awon olive green ubos sa fluorescent nga suga karon nahimo nang gray, taupe, o brown kon tan-awon ubos sa silaw nga mga bombilya. Ang itom, charcoal, ug navy nga mga terno moagi og susama nga kausaban.

Sa kasagaran kay sa dili, akong sulbaron ang problema pinaagi sa pagdala sa kustomer ngadto sa gawas sa duol nga pultahan aron makatan-aw sa ilang mga pinili ubos sa hayag sa adlaw. Pinaagi sa pagtan-aw ubos sa hayag sa adlaw, dali namong mailhan ang tinuod nga mga kolor ug makahimo og angay nga mga pagpili.

Sa tinuod nga kalibutan sa gawas sa usa ka department store, nag-atubang kita og mga pagpili sa matag adlaw. Usahay mausab ang kolor niana nga mga pagpili pinaagi sa mga lagda sa katawhan. Ang uban natabunan sa mga tintasyon niini nga kalibutan. Ang mga opsyon nga anaa sa atong atubangan tingali dili kanunay husto, o tingali malibug kita kon asa ang tinuod o dili. Tingali maghunahuna kita kon unsaon sa pag-ila unsay tinuod.

Akong nahibaloan nga ang sulbad mao ang pagtan-aw niana nga mga opsyon diha sa kahayag, o ehemplo, sa Anak, kay Siya misaad, “Ako usab mao ang inyong kahayag diha sa kamingawan; ug Ako moandam og agianan alang kaninyo, kon kini mao nga kamo mohupot sa akong mga sugo; … ug kamo mahibalo nga pinaagi kanako kamo pagatultulan” (1 Nephi 17:13; empasis gidugang).

Ang pagpaningkamot nga makapili uban sa tinuod nga kahayag makatabang kanato sa paghimo og tukma nga mga pagpili alang sa atong pamilya ug kaugalingon. Ug sa pagtan-aw ngadto sa Dios pinaagi sa giya sa Espiritu Santo, dili kita malingla apan masayud sa maayo gikan sa dautan (tan-awa sa Moroni 7:16).

Samtang mohimo kita sa mga pagpili sa pagsunod Kaniya, ang atong mapinanggaon nga Manluluwas gani misaad nga mopaambit sa Iyang kahayag uban kanato: “Kana nga gikan sa Dios mao ang kahayag, ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” (D&P 50:24).

Paghulagway sa litrato pinaagi ni David Stoker