Ug ang Inyong Ilhanan Mao Kini
“Tanan nga mga propeta kinsa nakapanagna sukad ang kalibutan nagsugod—sila wala ba makapamulong og kapin o kulang mahitungod niini nga mga butang?” (Mosiah 13:33).
Ang Pasko usa ka panahon nga puno sa pagpaabut—pagpaabut sa mga gasa, maayong pagkaon, ug mga selebrasyon. Usahay maingon og ang unang 24 ka adlaw sa Disyembre dugay kaayo nga paabuton. Hunahunaa kuno nga maghulat ka og 1,000 ka tuig!
Ang una nga Pasko—ang pagkatawo sa Manluluwas—gipanagna na sulod sa gatusan ka katuigan, gikan sa Isaias sa Daang Tugon hangtud kang Samuel nga Lamanite diha sa Basahon ni Mormon. Ang mga propeta sa karaan nahibalo ug nagpaabut sa mga timailhan sa pag-anhi ni Jesukristo, ug mapailubon silang naghulat alang niini nga mga timailhan. Gipanagna nila ang Iyang pag-anhi aron ang uban makaila sa mga timailhan ug makigbahin sa hingpit nga kalipay sa pagkahibalo nga Siya miabut na! Ang katumanan niadto nga mga panagna mao ang pagpamatuod sa Iyang balaan nga tawag isip Manluluwas ug Manunubos.
Basaha ang nagsunod nga mga panagna sa pagkatawo ni Jesukristo ug ang milagruso nga mga kahimtang nga naglibut niini ug kat-uni kon sa unsang paagi kini nga mga panagna natuman.
Natawo kang Maria, usa ka Birhen
Mga panagna: Pito ka gatus ka tuig sa wala pa si Maria matawo, si Maria gipanagna na nga mahimong inahan ni Kristo. Si Isaias misulat, “Ang Ginoo gayud maoy mohatag ninyo og usa ka timaan; Ania karon, ang usa ka ulay manamkon, ug magaanak og usa ka anak nga lalaki, ug pagtawgon ang iyang ngalan Emmanuel” (Isaias 7:14).
Si Alma nga Batan-on miila usab kang Maria nga inahan sa Manluluwas mga 80 ka tuig sa wala pa ang pagkatawo ni Jesus tadlas katunga sa kalibutan gikan ni Isaias: “Ug tan-awa, siya matawo kang Maria, … siya ingon nga usa ka birhen, usa ka bililhon ug pinili nga tawo, kinsa gilandongan ug gipanamkon pinaagi sa gahum sa Espiritu Santo, ug manganak og usa ka bata nga lalaki, oo, gani ang Anak sa Dios” (Alma 7:10).
Katumanan: Walo ka dekada human niadto, ang anghel nga si Gabriel mipakita “ngadto sa usa ka dalagang birhen nga pangasaw-unon sa usa ka lalaki nga ginganlan si Jose, … ug ang ngalan sa dalagang birhen mao si Maria” (Lucas 1:27). Si Maria mao ang inahan ni Jesus, nga mao ang Anak sa Dios.
Alang Kanato ang Usa ka Bata Natawo
Panagna: Si Isaias nanagna sa pagkatawo sa Mesiyas: “Kay alang kanato ang usa ka bata matawo, alang kanato ang usa ka anak nga lalaki gihatag: ug ang kagamhanan igatungtong sa iyang abaga: ug ang iyang ngalan pagatawgon nga Kahibulongan, Magtatambag, Dios nga Makagagahum, Amahan nga walay Katapusan, Prinsipe sa Pakigdait” (Isaias 9:6).
Katumanan: Ang pangalagad sa Manluluwas mituman sa tanan nga panagna ni Isaias, gani si Kristo natawo sa ubos nga mga kahimtang: “Kay alang kaninyo natawo karon sa lungsod ni David ang Manluluwas nga mao ang Kristo nga Ginoo. … Inyong makaplagan ang usa ka gamayng bata nga naputos sa mga bakbak, ug magahigda sa pasungan” (Lucas 2:11–12).
Natawo sa Bethlehem
Panagna: Ang propeta nga si Miqueas nagpuyo sa susama nga panahon kang Isaias. Gipanagna niya ang Ginoo nga matawo sa balangay sa Betlehem: “Apan ikaw, Beth-lehem Ephrata, ikaw nga maoy diyutay nga lungsod diha sa taliwala sa mga linibo nga banay sa Juda, gikan kanimo dunay usa nga mogula nganhi kanako nga mahimong magmamando sa Israel; kang kansang kaagi sa kagikanan gikan pa sa kanhing panahon, gikan sa walay katapusan” (Miqueas 5:2).
Katumanan: Pito ka gatus ka tuig human niadto, si Herod mimando nga ang iyang mga eskriba mosulti kaniya kon asa makit-an ang bag-o nga magmamando: “Siya nangutana kanila kon asa igaanak ang Kristo. Ug sila miingon kaniya, sa Betlehem sa Judea” (Mateo 2:4–5).
Sa Kaliwatan ni David
Panagna: Ang Ginoo miingon kang Jeremias unom ka siglo na sa wala pa ang pagkatawo ni Kristo nga Siya moabut gikan sa kaliwatan ni David: “Niadtong mga adlawa, ug niadtong panahona, pagapatindugon ko kang David; ang usa ka Sanga sa pagkamatarung ug siya magapakanaug sa hustisya ug sa pagkamatarung dinhi sa yuta” (Jeremias 33:15).
Katumanan: Si Mateo mihatag sa lista sa kaliwatan ni Kristo, nagpakita kon sa unsang paagi ang Ginoo naggikan niana nga pagkahari sa dugay nang panahon: “Ang basahon sa kagikanan ni Jesukristo, nga anak ni David, nga anak ni Abraham. … Busa ang tanang kaliwatan sukad kang Abraham hangtud kang David, napulog-upat ka kaliwatan; ug sukad kang David hangtud sa paglalin kanila ngadto sa Babelonia hangtud kang Kristo napulog upat ka kaliwatan” (Mateo 1:1, 17).
Gibisitahan og mga Hari
Mga Panagna: Bisan sa ubos nga mga kahimtang sa Iyang pagkatawo, ang mga propeta namahayag nga ang mga hari moadto aron sa pagtan-aw kang Kristo: “Ug ang mga nasud moduol sa imong kahayag, ug ang mga hari moduol sa kasulaw sa imong pagsubang” (Isaias 60:3).
Si Samuel nga Lamanite misulti sa mga Nephite lima ka tuig sa wala pa ang pagkatawo ni Kristo mahitungod sa mga timailhan nga magtimaan sa Iyang pag-anhi. Usa niini nga mga timailhan mao ang bitoon nga gisunod sa mga Mago: “Adunay bag-o nga bitoon nga mosubang, nga sa sukad wala pa ninyo masud-ong; ug kini usab usa ka timailhan nganha kaninyo” (Helaman 14:5).
Katumanan: Ang mga Mago nahibalo unsa nga timailhan ang tan-awon tungod kay nagtan-aw sila sa katumanan sa mga panagna. Sila miingon, “Hain ba ang gianak nga hari sa mga Judeo? kay nakita namo ang iyang bitoon didto sa sidlakan, ug nanganhi kami aron sa pagsimba kaniya” (Mateo 2:2).
Sa Bag-ong Kalibutan, ang mga Nephite usab nakamatikod sa mga timailhan ug nasayud nga ang mga panagna natumam: “Ug nahinabo, oo, tanan nga mga butang, matag tipik, sumala sa mga pulong sa mga propeta. Ug nahinabo usab nga usa ka bag-o nga bitoon mipakita, sumala sa pulong” (3 Nephi 1:20–21).
Hunahunaa kuno unsa ang inyong kalipay dihang sa katapusan inyo nang maablihan ang inyong mga regalo sa Pasko. Sa unsang paagi ninyo kini makumpara kon kamo naghulat sa mga timailhan sa pagkatawo ni Kristo ug sa katapusan nakita ninyo kining natuman? Ang atong Langitnong Amahan miandam daan niini nga mga timailhan dili lamang aron maglipay ang mga matinud-anon sa tibuok kalibutan sa pagkatawo sa Iyang Anak apan sa pagpamatuod sa balaan nga tawag ni Kristo.
Ang Pagkatawo, pinaagi ni Gustave Doré
Ang mga Mago Gigiyahan sa Bitoon, ni Gustave Doré