Pagdala sa Primary ngadto sa Panimalay
Kon Kita Mopili sa Matarung, Kita Panalanginan
Inyong magamit kini nga leksyon ug kalihokan sa pagkat-on og dugang mahitungod sa tema sa Primary karong bulana.
Si Daniel nagdula og football uban sa iyang mga higala sa dihang iyang nakita si Joseph nga nag-inusarang naglingkod, nagtan-aw. Si Joseph dili kaayo maayong modula og football. Apan si Daniel mihukom nga mas gusto niyang maapil si Joseph kaysa makadaug sa dula. Siya midagan paingon kang Joseph ug nangutana, “Ganahan kang makigdula namo?”
Si Daniel mipili sa matarung.
Ang Langitnong Amahan ug si Jesukristo nagsaad kanato nga kon kita mopili sa matarung, kita mapanalanginan. Kita adunay matarung nga mga ehemplo nga masunod diha sa mga kasulatan. Ania ang duha:
-
Sa dihang misunod si Noe sa sugo sa Ginoo sa paghimo og arka, siya miluwas sa pipila ka mga miyembro sa iyang pamilya sa Lunop. (Tan-awa sa Genesis 6–8.)
-
Sa dihang nabali ang gapasan ni Nephi, siya mihimo og bag-ong gapasan imbis nga mohunong. Ang iyang papa, si Lehi, nag-ampo og tabang, ug ang Ginoo migiya kang Nephi sa pagpangita og pagkaon. (Tan-awa sa 1 Nephi 16:18–32.)
Usahay lisud ang pagpili sa matarung, apan ang Langitnong Amahan mopanalangin kanato kon ato kining buhaton. Samtang kita mohimo og maayong mga desisyon, kita makabati og kalinaw ug kalipay.
Mga paghulagway pinaagi ni Apryl Stott