Gigutom alang sa Pulong diha sa Ecuador
“Bulahan silang tanan nga gigutom ug giuhaw sa pagkamatarung, kay sila pagatagbawon sa Espiritu Santo” (3 Nephi 12:6).
Si Ana Visbicut misandig sa tabla gawas sa iyang balay nga may pahiyum sa iyang panagway. Ang iyang mga anak mitupad kaniya sa lingkuranan, ang matag usa nagpahiyum sama kaniya. Kini init nga hapon sa Sabado. Si Ana nagpuyo sa Puerto Francisco de Orellana, usa ka gamay nga siyudad diha sa kalasangan sa silangang Ecuador. Ang mga sakop sa kapangulohan sa Orellana Branch midalikyat sa pagbisita, wala tuyoa nga makadisturbo sa pakig-istorya ni Ana ngadto sa mga sister missionary, apan wala ra na niya. Iyang giabi-abi ang mga kaubanan. Daghan siyang angay nga pasalamatan ug mapasalamaton gayud siya.
Dili man sa ingon nga si Ana walay iyang mga panlimbasug. Siya nagpuyo uban sa iyang lima ka gagmay nga mga anak. Lisud ang pagpangita og trabaho matag adlaw. Ug sa dihang nabunyagan siya niadtong Agosto 2009, usa lang sa iyang anak ang nagpabunyag uban kaniya.
Apan pagkasunod tuig, ang mga panalangin miabut sa dihang tulo sa iyang anak ang misunod sa iyang ehemplo ug nabunyagan ug nakumpirmahan (ang usa bata pa kaayo niadtong higayona).
Oo, ang mata ni Ana nagkislap sa pasalamat. Siya, sama sa uban nga mga miyembro sa Orellana Branch, nakadiskobre sa tinuoray nga kalipay gikan sa pagsunod sa ebanghelyo ni Jesukristo.
Ang Hingpit nga Kalipay Nagsugod uban sa Tinguha
Niadtong Disyembre 2008, walay pormal nga organisasyon sa Simbahan sa Puerto Francisco de Orellana. Niadtong higayona, daghang miyembro ang nagpuyo didto, pipila kanila wala na makasimba sulod sa daghang katuigan.
Apan usa ka butang ang nahitabo. Ang Espiritu mitandog sa mga kasingkasing ug miusab og mga kinabuhi, nagdasig sa upat ka pamilya sa pagsugod nga magpundok aron magtuon sa kasulatan ug magtudlo sa usag usa. Ug kini nga pagbati nagpabilin sa tibuok siyudad hangtud karon.
“Ang mga tawo dinhi gigutom ug giuhaw sa ebanghelyo,” miingon si Fanny Baren Garcia, usa ka miyembro sa branch.
Kini nga kagutom midasig sa mga miyembro sa Puerto Francisco de Orellana sa pagkontak sa Simbahan ug nangayo og pagtugot nga magsakrament. “Wala kami moadto kanila,” nahinumdom si Timothy Sloan, kanhi presidente sa Ecuador Quito Mission. “Sila ang mitawag kanako. Ang tinguha sa pagbuhat niadtong mga pagbati —sa pagsunod sa imbitasyon sa Manluluwas sa pagbaton og hugot nga pagtuo Kaniya ug sa paghinulsol nga anaa diha sa tibuok Basahon ni Mormon—anaa na didto. Kana usa ka mensahe alang kanatong tanan.”
Susama nga tinguha ang anaa sa mga kasingkasing niadtong mibalhin sa Puerto Francisco de Orellana. Sa sayong bahin sa Enero 2009, si Marco Villavicencio—ang presidente sa branch karon—ug ang iyang asawa, si Claudia Ramirez, nagkonsiderar og oportunidad sa trabaho nga makapabalhin nila sa Puerto Francisco de Orellana gikan sa ilang pinuy-anan sa Machala, sa pikas bahin sa Ecuador.
“Ang una nakong pangutana,” miingon si Presidente Villavicencio, “mao ni ‘Aduna bay Simbahan didto?’ Ang akong asawa ug ako naghisgut niini uban sa among pamilya, ug kami nag-ampo aron masayud kon kami mobalhin ba gyud. Sa dihang miabut ang tanyag, among nahibaloan nga ang Simbahan giestablisar sa Puerto Francisco de Orellana. Mibalhin mi dinhi niadtong Pebrero 2009, ug ang branch naorganisar pagkasunod Septyembre.”
Ang Hingpit nga Kalipay sa Pagserbisyo
Ang tinguha nga moduol ngadto kang Kristo sa natural nga paagi mosangput sa tinguha sa pagserbisyo. Ang ebanghelyo ni Jesukristo mousab niadtong naghatag ug sa gihatagan. Kining binayloay [reciprocal] nga proseso mahitabo kon ang mga kasingkasing mapainubsanon, bukas ang mga hunahuna, ug nagserbisyo. Ang serbisyo adunay mahinungdanon nga bahin sa kalamboan sa Simbahan sa Puerto Francisco de Orellana ug nakapalig-on niadtong miserbisyo.
“Unsa ang akong gibati kabahin sa akong calling?” pangutana ni Clara Luz Farfán, kinsa gitawag niadtong Septyembre 2010 sa pagserbisyo sa kapangulohan sa Relief Society. “Malipayon, tungod kay nasayud ko nga makatabang ko sa ubang mga sister nga makasimba ug makapalig-on sa bag-ong kinabig nga mga sister.”
Susama nga pagbati ang nagtandog sa kasingkasing sa mga miyembro sa branch. Si Lourdes Chenche, ang presidente sa Relief Society, miingon nga ang paglig-on sa mga sister nagkinahanglan og paningkamot, apan kini nga paningkamot malipayon niyang gihatag: “Isip kapangulohan ug mga miyembro sa Relief Society, kami mobisita sa mga sister. Mas mosuod kami kanila kon sila adunay mga problema. Mohatag kami kanila og pagkaon kon gikinahanglan. Gipabati namo kanila nga wala sila mag-inusara, nga aduna kitay tabang ni Jesukristo ug sa branch. Ug gitudloan namo sila nga kinahanglan nilang buhaton ang ilang bahin —pag-ampo, pagtuon sa mga kasulatan, ug pag-andam sa ilang kaugalingon. Kami moampo uban kanila, mohupay kanila, ug mohigugma gayud kanila.”
Dili lang mga sister ang nagtrabaho. “Kami nakighisgut sa presidente sa branch kon unsa ang angay nga buhaton,” midugang si Lourdes. “Among gipakigbahin kaniya ug sa konseho sa branch ang mga panginahanglan nila aron kami makahukom kon unsa ang angay namong buhaton.”
Ang pasalig sa mga sister sa pagbuhat sa ilang bahin usa ka komon nga sentimento sa tibuok branch. Sa usa ka proyekto sa pagtabang sa pamilya diha sa branch, “kaming tanan miapil,” miingon si Lourdes. “Ang mga bata, mga batan-on, mga hamtong, ang Relief Society, ang mga misyonaryo. Ang kasinatian makapalig-on gayud. Nasayud ko nga kon kita ‘anaa sa pag-alagad sa [atong] isigkatawo [kita] anaa lamang sa pag-alagad sa [atong] Dios’ [Mosiah 2:17]. Kon moserbisyo ko, kini sama nga gibuhat ko kini kang Jesukristo. Mao kana ang kahulugan sa gingharian.”
Ang Hingpit nga Kalipay sa Pag-fellowship
Adunay usa ka butang nga dili malimud nga nakapalig-on sa panaghiusa, ang diwa nga maapil sa komunidad sa mga Santos. Ang mga panalangin moresulta kon kita mahimong “katagilungsod sa mga balaan ug mga sakop sa panimalay sa Dios” (Mga Taga-Efeso 2:19) ug kita mopuyo sama sa sakop sa usa ka pamilya kinsa “andam sa pagtambayayong sa usag usa nga mga alantuson, nga sila mahimo nga magaan; oo, ug mga andam sa pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan” (Mosiah 18:8–9).
Si Fanny mipasabut, “Nagtuo ko nga ang among kalig-on naggikan sa katinuod nga kami isip mga miyembro sa Ang Simbahan ni Jesukristo sa mga Santos sa Ulahing mga Adlaw mobati sama nga usa ka pamilya. Ug sa akong hunahuna ang pagserbisyo sa usag usa nakahimo og dakong kaayohan. Kami mohatag unsa ang gikinahanglan, ug kini nakamugma og diwa sa panaghiusa. Bukas ang among mga bukton sa matag bag-ong tawo nga moabut sa simbahan. Kami moabi-abi kanila. Nagtuo ko nga ang gakos nagpasabut og sobra pa sa liboan ka mga pulong.”
Ang kasinatian ni Ana makapanghimatuod niana. Isip inahan nga walay bana sa lima ka anak, siya nag-atubang sa kanunay og hagit sa pagpaningkamot sa pagsangkap sa iyang pamilya sa panahon nga lisud ang pagpangita og trabaho, ug kana nga pagpaningkamot makapaluya sa emosyonal ug espiritwal nga paagi. Ang pag-fellowhip sa mga miyembro nakahimo og importanting bahin sa iyang pamilya atol sa lisud nga mga panahon. “Ang mga miyembro moabut ug mobasa sa kasulatan uban kanako,” miingon si Ana. “Sila nag-amuma kanako. Kon kami maglisud, anaa sila. Kana importante kaayo alang sa bag-ong miyembro.”
Kining diwa sa pag-fellowship usa sa rason nga ang branch paspas nga mitubo. Gikan sa 28 ka miyembro sa unang Dominggo, ang branch miabut ngadto sa 83 ka miyembro sulod lang sa usa ka tuig, lakip ang usa ka dosena nga mga bisita nga dili miyembro.
Ang mga lider sa Branch mogahin sa Sabado sa dili pa ang komperensya sa branch sa pagbisita sa mga miyembro ug sa gipangtudloan sa mga misyonaryo. Sila mopakigbahin sa mga kasulatan ngadto kanila, moawhag kanila nga molambo.
Usa ka bag-ong nabunyagan nga brother nakabig pinaagi sa pagtuon sa mga kasulatan—nagbasa nga siya mismo ug uban sa mga miyembro ug mga misyonaryo. “Ang Basahon ni Mormon mao ang yawe,” siya miingon. “Kini mao ang yawe alang kanako.” Siya nakakaplag sa hingpit nga kalipay dinhi sa Simbahan. Ang impluwensiya sa ebanghelyo kusog kaayo nga misugod siya sa pagbayad sa ikapulo sa wala pa siya mabunyagi.
Apan ang panaghigalaay molapas pa sa pagpakigbahin sa ebanghelyo ngadto sa uban. Kini makapausab sa kinabuhi.
“Sa wala pa ko mamiyembro sa Simbahan,” miingon si Bernabé Pardo, laing bag-o nga kinabig, “ang mga higala nako sa una mao ra gyud kadtong mga palainom. Apan karon nga miyembro na ko, ako adunay daghang mga higala—tinuod nga mga higala. Ila kong dapiton sa pagbasa sa Basahon ni Mormon uban kanila. Ila kong dapiton sa family home evening. Sila moserbisyo sa usag usa. Nakauban ko kanila sa mga proyekto sa pagserbisyo. Ang akong kinabuhi karon lahi na gayud. Nakadawat ko og daghan kaayong mga panalangin. Nagbayad ko sa akong ikapulo, ug ang Ginoo mipanalangin kanako.”
Kini usa ka pamaagi sa kinabuhi nga dili lang limitado ngadto sa mga hamtong. “Kanunay namong gitudlo sa mga batan-ong babaye kabahin sa gahum sa pag-fellowship, sa pagsulti og hello ug pagpaapil sa uban,” miingon si Claudia Ramirez. “Kon ang mga tawo mosimba sa unang higayon, ang nakahatag og impresyon kanila mao ang paagi sa pagdawat kanila. Mao nga among gitudloan ang batan-ong mga babaye kon unsa ka importante ang matag kalag ngadto sa Ginoo. Kini dako og natabang. Ug kami naghimo og mga tumong kauban ang mga batan-ong babaye alang sa Personal nga Kauswagan. Kini nagdasig kanila aron makighigala sila ngadto sa uban.”
Si Presidente Villavicencio mipasabut nga “among gipaningkamutan sa pagbuhat ang tambag ni Presidente Gordon B. Hinckley nga ang bag-ong kinabig nagkinahanglan nga amumahon pinaagi sa maayong pulong sa Dios, adunay higala ug responsibilidad.”1
Si Ana nagserbisyo isip ikaduhang magtatambag sa kapangulohan sa Primary. Ang iyang anak nga si Jorge nagserbisyo isip unang magtatambag sa teachers quorum.
“Hatagan namo sila og responsibilidad,” miingon si Presidente Villavicencio, “kahigayunan sa pagkat-on diha sa mga posisyon sa pagpangulo, nga adunay usa ka tawo nga motabang kanila.”
Ang Hingpit nga Kalipay sa Pagkausab
Alang kang Claudia, ang pagserbisyo sa ebanghelyo miresulta sa hinayhinay nga paglambo sa pagsalig sa iyang kasingkasing. “Nabunyagan ko sa dihang otso anyos ko,” miingon si Claudia. “Kami kanunay mosimba. Apan samtang nagtubo ko, nakakita ko og daghang mga kaminyoon nga nangapakyas. Naghunahuna ko og kadaghan kabahin niini, ug nabalaka ko nga dili magminyo tungod kay dili ni magmalampuson. Nahadlok ko nga isalig ang akong kinabuhi sa ubang tawo, nga kini lisud kaayo. Apan sa akong pag-uli sa akong misyon, nausab ang akong hunahuna. Ang pagtudlo sa doktrina makapausab kanimo.”
Sila si Claudia ug Marco Villavicencio managhigala sa wala pa mag-misyon si Claudia. Wala madugay human sa iyang pag-uli, sila uban sa pipila ka mga higala miadto sa templo. Usa ka butang nga espesyal ang gibati. “Mibati ko nga ingon og ang Ginoo nagtubag sa akong mga pag-ampo, nga kining lalakiha mao ang akong minyoan,” mipasabut si Claudia. “Naangkon nako ang pinakadako nga panalangin nga makabaton og buotan nga bana.”
Ang Hiingpit nga Kalipay sa Pagsunod sa Ebanghelyo
“Ang atong kalipay wala magdepende sa materyal nga mga butang,” miingon si Oscar Reyes, 15 anyos, “apan sa paagi nga kita nagkinabuhi. Mao nga gibalaan nako ang adlaw nga Igpapahulay, kay kini makapahimuot sa Dios. Ug mao nga magmisyon ko ug ganahan kong moserbisyo sa uban.”
Pinaagi sa pagsunod sa ebanghelyo, ang miyembro sa Orellana Branch nakakaplag sa tinuod nga kalipay. “Malipayon kaayo ko,” mipakigbahin si Lourdes. “Bisan tuod layo ko kaayo sa akong pamilya, aduna usab akoy pamilya dinhi, usa ka espiritwal nga pamilya. Aduna koy lig-on nga pagpamatuod niining buhat. Nasayud ko nga si Jesukristo buhi ug nga, kon kita magmasulundon, Siya mopanalangin kanato.”
Kini ang hingpit nga kalipay nga nagpuno sa ilang kinabuhi bisan unsa pa nga mga hagit sa kinabuhi ang moabut kanila. Kini ang hingpit nga kalipay nga moabut gumikan sa matarung nga pagpuyo.
Sa wala: Si Ana Visbicut ug ang iyang mga anak nagmaya sa ebanghelyo. Sa ibabaw: Ang mga miyembro sa Orellana Branch nagpundok alang sa komperensya sa branch niadtong 2010.
Ubos, sa wala: Ang presidente sa branch nga si Marco Villavicencio uban sa iyang asawa, si Claudia, ug ang ilang anak nga lalaki. Ubos, sa tuo: Si Clara Luz Farfán nagtambong og fireside kauban ang ubang mga miyembro sa branch.
Si Presidente Villavicencio ug ang ubang mga miyembro nagbisita uban ni Lourdes Chenche, ang presidente sa Relief Society ug magtutudlo sa seminary sa branch.
Gikan sa wala: Si Presidente Villavicencio uban ni Bernabé Pardo, bag-o nga kinabig; miting sa Relief Society; Fanny Baren Garcia uban sa iyang bana, si Ricardo, ug ilang mga anak; klase sa Doktrina sa Ebanghelyo.
Gilitratohan ni Joshua J. Perkey