Kini nga Basahon gikan ba Kanimo?
Cynthia Ann Lee, Nevada, USA
Bag-ohay lang ko nga nag-21 anyos ug nagtrabaho isip tigsilbi sa usa ka restawran sa lokal nga ski resort. Usa ka hapon sa dihang nahuman nako og limpyo sa dining room, lain nga tigsilbi ang midunol kanako og basahon ug mihatag niini kanako. Nagpasalamat ko kaniya ug midawat niini.
Gitan-aw nako ang hapin: ang Basahon ni Mormon. Nakuryuso ko, mao nga mihukom ko nga moadto sa kusina aron sa pagsuta niini. Sa sulod nakakita ko og mubo nga sulat nga gisulat niadtong tigsilbi alang kanako. Dinhi siya miingon nga ang Basahon ni Mormon tinuod nga basahon sa ebanghelyo ni Jesukristo ug nasayud nga kini makatandog sa akong kasingkasing. Mihukom ko sa pagbasa niini diha-diha dayon.
Samtang nagbasa ko, usa ka dili mahulagway, malinawon nga pagbati ang misanap kanako. Wala ko mabati kana nga pagbati kon magbasa og lain nga basahon gawas lang sa Biblia. Ang akong tinguha sa sinugdanan sa pagbasa og pipila ka mga pahina daling nahimo ngadto sa pipila ka mga kapitulo. Dili nako ganahan mohunong sa pagbasa. Dayon miabut ko sa 1 Nephi 15:11: “Wala ba kamo mahinumdom sa mga butang diin gisulti sa Ginoo?—Kon dili kamo mopatig-a sa inyong mga kasingkasing, ug mangayo kanako pinaagi sa hugot nga pagtuo, motuo nga kamo makadawat, uban sa kakugi sa paghupot sa akong mga sugo, sa pagkatinuod kini nga mga butang ipahibalo nganha kaninyo.”
Kinahanglan nakong masayran kon kining basahon tinuod. Dili ko kahibalo unsaon sa pagsangpit sa Ginoo pinaagi sa pag-ampo, busa yano kong mihangad sa kisame sa kusina ug nangutana, “Kini nga basahon gikan ba Kanimo?” Diha-diha dayon mibati ko og klarong tubag: “Oo.” Nakahinumdom ko, “Wow. Tingali humanon nako ang basahon!”
Tulo ka bulan ang milabay, nakahuman og basa sa Basahon ni Mormon, mibisita ko sa akong papa sa California. Dili layo sa iyang balay nakaagi ko og usa ka building nga may mosaic sa atubangan niini nga akong nailhan. Diha-diha dayon mipaingon ko sa parkinganan ug nakakita og usa ka tawo sa gawas.
“Nganong adunay panan-awon ni Lehi sa kahoy sa kinabuhi diha sa inyong building?” nangutana ko. Iya dayon kong gipaila-ila sa simbahan, Ang Simbahan ni Jesukristo sa mga Santos sa Ulahing mga Adlaw. Gikuha nako ang akong Basahon ni Mormon sa sakyanan ug nangutana kaniya kabahin sa tanang bersikulo nga akong gilinginan samtang nagbasa ko. Gipakalma ug gipasabut ko niya nga ang Simbahan adunay mga misyonaryo kinsa mipahinungod og duha ka tuig sa ilang kinabuhi sa pagtubag sa mga pangutana sama sa ako.
Gihatag nako niya ang address sa akong amahan, ug wala madugay duha ka elder ang mibisita kanako. Nadani ko nga sila matinguhaon sa pagtubag sa tanan nakong mga pangutana. Gani mas nadani ko nga ang bag-ong mga konsepto nga ilang gitudlo nako ingon og pamilyar nga mga butang nga akong nahinumduman pag-usab. Lima ka semana ang milabay nabunyagan ko sa Simbahan.
Trayntay dos ka tuig na ang milabay sukad niadto, ug nagbasa gihapon ko sa Basahon ni Mormon kada adlaw. Kini padayon nga tinubdan sa kahayag ug direksyon sa akong pamilya ug kanako. Mapasalamaton kaayo ko sa karaang mga propeta kinsa mikulit sa mga pulong sa Dios diha sa bulawan nga mga palid, kang Joseph Smith sa paglahutay sa mga pagpanggukod ug mga pagsulay sa paghubad ug pagmantala sa mga kamatuoran niini, ug sa usa ka tigsilbi kinsa adunay kaisug sa paghatag sa Basahon ni Mormon niadtong adlawa.