Ang Doktrina kabahin sa Amahan
Usa sa pinakatam-is ug pinaka-mahinungdanon nga mga kamatuoran nga napadayag lakip sa Pagpahiuli mao ang may kalabutan sa kinaiya sa atong Langitnong Amahan ug sa Iyang personal nga koneksyon sa matag tawo nga anaa sa yuta.
Usa sa unang mga baruganan nga nawala atol sa Apostasiya mao ang panabut kabahin sa Dios nga Amahan. Dili ikatingala, nga, ang usa sa unang mga baruganan nga gipadayag sa Pagpahiuli mao ang pagkasayud sa Dios nga Amahan. Nag-una sa kamahinungdanon, ang unang deklarasyon sa pagtuo sa mga Santos sa Ulahing mga Adlaw mao ang “Kami nagtuo sa Dios, ang Langitnong Amahan” (Mga Artikulo sa Hugot nga Pagtuo 1:1).
Ang mga miyembro sa Simbahan nakasabut nga ang Dios nga Amahan mao ang Labing Taas nga Magmamando sa universe, ang Gahum nga naghatag kanato sa pagkaespirituhanon, ang Tigpasiugda sa plano nga naghatag kanato og paglaum ug potensyal. Siya mao ang atong Langitnong Amahan, ug kita nagpuyo sa Iyang atubangan isip kabahin sa Iyang pamilya sa kinabuhi nga wala pa dinhi sa yuta. Didto nakakat-on kita og mga leksyon ug nag-andam alang sa pagka-mortal (tan-awa sa D&P 138:56). Kita gikan sa atong Langitnong Amahan, ug ang atong tumong mao ang pagbalik ngadto Kaniya.
Sa tanan nga mga doktrina, pagtuo, ug mga baruganan nga gipadayag ngadto sa Iyang mga anak, ang mga kamatuoran kabahin sa Iyang pagkaanaa ug kinaiya mao gayud ang pinaka-focus. Atong giila ang Iyang pagkaanaa ug tinuod nga kinaiya aron moduyog uban sa karaang mga tumutuo ug mga propeta sa tinuod nga pagsimba (tan-awa sa Mosiah 4:9). Ang katuyoan sa tanang gipadayag, gisugo, ug gipasiugdahan sa Amahan alang sa lumulupyo sa yuta mao ang pagtabang kanato nga kita masayud, mosunod, ug mahimong sama Kaniya aron kita makabalik sa Iyang balaang presensya. Ang kinabuhing dayon mao ang pagkasayud sa Amahan ug sa Iyang balaang Anak, si Jesukristo (tan-awa sa Juan 17:3; Jacob 4:5; Moises 5:8).
Ang Mahangturong Sumbanan sa Pamilya
Mahinungdanon sa pagkaila sa Amahan mao ang pagsabut sa gipadayag nga sumbanan sa pamilya. Ang pamilya mao ang pinakaimportante nga yunit sa panahon karon ug sa kahangturan ug gi-orden sa Dios.1 Ang pagpuyo uban sa mahigugmaon nga relasyon sa pamilya dili lamang makahatag og talagsaong kalipay, kini usab makatabang kanato nga makat-on sa saktong mga baruganan og makaandam kanato sa kinabuhing dayon.2 Dugang pa, ang relasyon sa pamilya makatabang kanato nga masayud, mohigugma, ug mosabut sa Amahan. Kini mao ang usa sa rason nga ang Santos sa Ulahing mga Adlaw kanunay naghatag og gibug-aton sa kaminyoon ug pamilya sa Simbahan ug sa katilingban. Ang plano sa Dios naghatag og paagi nga ang relasyon sa pamilya magpadayon human sa kamatayon. Kita makabalik sa presensya sa Dios, sa mahangturon kauban sa atong mga pamilya.3
Ang atong Langitnong Amahan mipili nga dili ipadayag ang daghang mga detalye sa atong kinabuhi nga wala pa dinhi sa yuta kauban Kaniya. Tingali aron kita makat-on og daghang mga butang sa yano nga pag-obserbar sa sumbanan sa matarung nga mga pamilya nga Iyang giestablisar dinhi sa yuta. Ang mabinantayon nga pag-obserbar ug pagpuyo sumala sa mga sumbanan sa matarung nga pamilya dinhi sa yuta mahinungdanon kaayo sa atong panaw nga makaila sa Amahan.
Ang Langitnong Amahan ug pamilya dili gayud mabulag. Kon kita makasabut sa daghang mga dimensyon niini nga koneksyon, kita mas hingpit nga makasabut kon unsa ka personal ug indibidwal ang gugma ug relasyon sa Langitnong Amahan ngari kanato. Ang pagsabut kon unsa ang Iyang gibati kabahin nato makahatag kanato og gahum sa paghigugma Kaniya sa mas lunsay ug hingpit nga paagi. Ang personal nga pagbati sa katinuod, gugma, ug gahum niana nga relasyon mao ang tinubdan sa pinakalalum ug pinakatam-is sa mga emosyon ug tinguha nga mabati sa usa ka lalaki o babaye dinhi sa pagka-mortal. Kining lalum nga mga emosyon sa gugma makapadasig kanato ug makahatag kanato og gahum atol sa mga kalisud ug pagsulay aron mas mapaduol sa atong Amahan.
Mahigugmaong Pagpili ug Gihunahuna Pag-ayo nga Lihok
Ang tanan gipakatawo nga espiritung anak nga lalaki o babaye sa atong Langitnong Amahan.4 Gipakatawo usa ka adjectival form sa verb nga natawo ug nagpasabut nga “gimugna.” Ang natawo mao ang ekspresyon nga gigamit sa kasulatan nga naghulagway sa proseso sa paghatag og kinabuhi (tan-awa sa Mateo 1:1–16; Ether 10:31).
Sa pinadayag nga sumbanan sa Dios sa matarung nga mga pamilya, ang pagkatawo sa bata mao ang resulta sa usa ka gihunahuna pag-ayo ug mahigugmaong pagpili. Kini mao ang milagrosong resulta sa pag-amuma ug gihunahuna pag-ayo nga mga lihok sa mga ginikanan nga moapil uban sa Langitnong Amahan sa sagradong proseso sa paglalang og mortal nga lawas alang sa usa sa Iyang mga anak nga espiritu. Ang pagkasayud nga ang atong kinabuhi mao ang resulta sa usa ka mahigugmaong pagpili ug gihunahuna pag-ayo nga lihok makahatag kanato og pagsabut sa atong talagsaong personal nga bili dinhi sa pagka-mortal. Kanang pagsabut sa bili makapasiguro kanato sa atong potensyal ug makaprotekta kanato sa mga tintasyon.
Si Satanas nahimuot sa paggamit sa ubos sa sundanan nga mga sirkumstansya sa pipila ka mortal nga pagkatawo aron kita makapangutana sa atong personal nga bili ug potensyal. Bisan unsa pa ang mga sirkumstansya sa atong mortal nga pagkatawo, kitang tanan mga espiritu nga anak nga mga lalaki ug mga babaye sa langitnong mga ginikanan. Ang Dios usa ka matarung ug mahigugmaong amahan. Ang atong mga espiritu namugna tungod sa gugma ug gihunahuna pag-ayo nga pagpili nga naghatag kanato og kinabuhi ug oportunidad.
Matag Usa
Ang matarung nga mga ginikanan wala lamang maghunahuna pag-ayo ug mahigugmaong nagpili sa paglalang og mga bata dinhi sa kalibutan, sila usab nangandam, nag-ampo, ug maandamon nga naghulat atol sa pagsabak, nagpaabut sa pagkatawo sa ilang anak. Inigkahimugso sila ganahan kaayo nga mokupot, makig-istorya, moamuma, ug moprotekta sa ilang anak. Ilang nakat-unan ang indibidwal nga mga sumbanan ug panginahanglan sa bata. Sila mas nakaila sa bata kaysa ang bata nakaila sa iyang kaugalingon. Bisan pila pa ka buok anak, ang matag usa kanila talagsaon alang sa ginikanan.
Ang pagkasayud niining sumbanan makatabang nato sa pagsabut nga isip espiritu nga mga anak ang Langitnong Amahan nakaila kanato sa tagsa-tagsa. Siya nakaila kanato sukad nga kita gipakatawo nga mga espiritu. Kita Iyang bililhon nga mga anak nga lalaki ug babaye, kinsa Iyang gihigugma tagsa-tagsa.
Nailhan sa Pangalan
Laing sumbanan sa yutan-ong mga pamilya makatabang kanato nga makasabut sa gugma sa Amahan alang sa matag usa kanato. Usa sa mga una nga lakang sa pagmugma og indibidwal nga pagkatawo, human nga matawo ang bata, mao ang pagpangalan sa bata. Ang pagpangalan usa ka importante nga bahin sa matag kultura ug sa kanunay giubanan sa sagrado nga mga ritwal tungod kay ang pangalan mahinungdanon kaayo sa personal nga pagkatawo sa nagdala niini. Ang mga anak wala mopili sa ilang mga ngalan; ang ilang mga ginikanan mao ang nagpangalan kanila.
Kasagaran sa mga kultura ang bata hatagan og una (ug sa pipila adunay ikaduha, o tunga-tunga) nga ngalan. Komon usab sa tibuok kalibutan nga ang bata adunay apelyido o pangalan nga may kalabutan sa ilang mga ginikanan, pamilya, ug katigulangan. Pipila sa mga kultura naggamit og laing ilhanan sama sa ikaduhang apelyido (pananglitan, apelyido sa inahan pagkadalaga) aron mas mailhan ang relasyon sa pagkatawo sa bata ngadto sa pamilya ug katilingban.
Nianang sama nga sumbanan, kita nasayud nga ang atong Langitnong Amahan nakaila kanato sa personal ug indibidwal nga paagi. Nakaila Siya sa atong pangalan. Diha sa pipila ka mga kasulatan nga naghisgot og mga indibidwal sa kinabuhi sa wala pa dinhi sa yuta, sila giila pinaagi sa pangalan sa samang sumbanan nga kita gipanganlan dinhi sa pagka-mortal. Sa narekord nga mga pagbisita sa Amahan ngadto sa mga indibidwal dinhi sa yuta, Siya naggamit og mga pangalan sa pagpakita nga Siya nakaila ug nag-ila kanato sa personal ug indibidwal nga paagi. Sama sa gisulti ni Propeta Joseph Smith nga nagpasabut sa pagpakita sa Amahan diha sa Unang Panan-awon, “Usa kanila misulti ngari kanako, nagtawag kanako sa akong ngalan” (Joseph Smith—Kasaysayan 1:17; tan-awa usab sa Moises 1:6; 6:27).
Ang Amahan nakaila kanato tungod kay Iyang gilalang ang matag bililhong espiritu nga anak nga lalaki ug babaye, naghatag kanato og indibidwal nga pagkatawo. Sama sa Iyang gisulti kang Jeremias, “Sa wala pa ikaw buhata nako diha sa tiyan naila ko na ikaw” (Jeremias 1:5).
Sa Iyang Panagway ug uban sa Iyang mga Kinaiya
Ang Biblia nagtudlo kanato nga ang lalaki ug babaye gilalang sa panagway sa Amahan (tan-awa sa Genesis 1:26–27). Ang siyensa sa genetics ug personal nga obserbasyon nagpamatuod sa baruganan nga ang mga anak maliwat sa porma, dagway, ug kinaiya sa mga ginikanan. Ang pipila nagbase sa ilang personal nga bili pinaagi sa pagkompara sa ilang kaugalingon ngadto sa uban. Kana nga paagi makahatag og mga pagbati sa kakulang o kamapahitas-on. Mas maayo nga mosalig sa atong Amahan para sa bili sa atong kaugalingon.
Ang atong mga pedigree chart sa mortal nagpakita og daghang mga henerasyon balik sa dugay na nga mga panahon. Ang atong indibidwal nga pedigree chart sa espiritwal, hinoon, adunay duha lang ka henerasyon—sa atong Amahan ug sa atoa. Ang atong porma mao ang Iyang porma, wala lang ang kahimayaan. “Kita karon mga anak [nga lalaki ug babaye] sa Dios, ug … kita nasayud nga sa igapadayag na siya, kita mahisama kaniya” (1 Juan 3:2; tan-awa usab sa D&P 130:1). Sa matag usa kanato adunay tinagoang liso sa pagkadiosnon nga makapamulak ug makapamunga pinaagi sa Iyang panalangin ug sa pagsunod sa dalan sa hingpit nga pagkamasulundon nga gipakita ni Jesus ngari kanato. Adunay gahum sa pagsulti o sa pagkanta sa mga pulong “Ako anak sa Dios.”5
Ang Gugma sa Amahan
Usa sa grabeng pagtuis sa Apostasiya mao ang pagpakita nga ang plano sa Dios nga Amahan alang sa kaluwasan hilabihan kapintas. Si Frederic Farrar, ang lider sa simbahan nga Anglican, classical nga eskolar, tumutuo, ug tinahud nga tigsulat sa Life of Christ, nasubo nga kasagaran sa mga simbahan nga Kristiyano sayop ang pagsabut sa impyerno ug kalaglagan isip resulta sa mga sayop nga paghubad gikan sa Hebreohanon ug Griyego ngadto sa Iningles nga King James Version sa Biblia.6
Sama sa gipadayag ngadto kang Propeta Joseph Smith, ang plano sa kaluwasan sa mahigugmaon nga Amahan magamit sa tanang katawhan, lakip niadtong wala makadungog ni Jesukristo niining kinabuhi, mga bata nga namatay sa wala pa ang edad sa pagkamaytulubagon, ug kadtong dili makasabut (tan-awa sa D&P 29:46–50; 137:7–10).
Gani alang niadtong—dili sama ni Satanas ug sa iyang mga anghel (tan-awa sa Isaias 14:12–15; Lucas 10:18; Pinadayag 12:7–9; D&P 76:32–37)—kinsa dili matarung ang pagpuyo apan wala morebelde sa Dios, ang mahigugmaong Amahan nag-andam og gingharian sa himaya nga mas nindot kaysa sa atong gipuy-an dinhi sa yuta (tan-awa sa D&P 76:89–92). Dili maduha-duhaan ang gugma sa Amahan ngadto sa Iyang espiritu nga mga anak.
Kon kita magtinguha nga makaila sa Amahan pinaagi sa mga sumbanan sa matarung nga kinabuhi sa pamilya, kita makasugod sa pagsabut sa kaladmon sa Iyang gugma alang kanato ug mobati og mas lalum nga gugma alang Kaniya. Mga paningkamot sa pagguba ug pagbungkag sa pamilya giplano aron mapalayo ang mga anak sa Amahan nga mabati ang Iyang gugma nga nagdasig kanila sa pagbalik ngadto Kaniya.
Abusado nga mga lalaki nga anaa sa katungdanan, mga pagpanganak nga gawas sa kaminyoon, wala planoha nga pagbaton og anak, ug uban pang mga hagit sa sosyal sa atong panahon mas nakapalisud niadtong nag-antus sa pagsabut, sa paglaum, ug sa pagbaton og pagtuo sa usa ka matarung, mahigugmaon, ug maamumahon nga Amahan. Sa ingon nga ang Amahan nagtinguha nga makatabang aron makaila Kaniya, ang kaaway naggamit sa tanang posible nga pamaagi aron mobabag kanato ug sa Amahan. Maayo gani, nga walay gahum, sala, o kondisyon ang makababag kanato gikan sa gugma sa Amahan (tan-awa sa Mga Taga-Roma 8:38–39). Tungod kay ang Dios nahigugma kanato og una, kita makaila ug mohigugma Kaniya (tan-awa sa 1 Juan 4:16, 19).
Tungod gayud nga ang mga kadautan sa katilingban maoy nagpasulabi karon nga kita kinahanglang motudlo sa doktrina sa Amahan ug sa pamilya aron motabang kanato sa pag-ayo, pagkorihir, ug pagbuntog sa sayop nga mga ideya ug binuhatan nga naglukop sa kalibutan. Sama sa madagayaong gipahayag ni Eliza R. Snow (1804–87), adunay daghan sa kalibutan nga nagtawag sa Dios isip “Amahan” apan “wala [masayud] kon ngano.”
Salamat gayud, “ang yawe sa kahibalo” gipahiuli7 ug ang doktrina sa Amahan anaa na usab sa yuta!
Ang Unang Panan-awon, ni Del Parson
Paghulagway sa litrato pinaagi ni Christina Smith