Usa ka Tingog alang sa Taas nga mga Sumbanan
Sanag nga mga suga. Naghugyaw nga katawhan. Liboan nga mga fans sa Facebook. Sa dihang ang 17 anyos nga si Gerson Santos nahimong top-10 finalist sa gipasundayag sa telebisyon nga kompetisyon sa talento sa musika didto sa Portuguese nga Ídolos, kinahanglan siyang mag-adjust sa pagkasikat ug atensyon tungod sa iyang kalampusan. Nakahukom si Gerson nga pahimuslan kining talagsaon nga oportunidad sa pagsangyaw sa ebanghelyo ug dali kaayong nailhan sa tibuok media sa Portuguese isip “competitor nga Mormon” andam nga motubag og mga pangutana mahitungod sa iyang pagtuo.
Giunsa nimo sa paghukom nga moapil sa Ídolos? Giunsa man nimo sa pagpangandam?
Ang Idolos usa ka pasundayag sa telebisyon nga ganahan kaayo nakong tan-awon. Kaniadto pa kong ganahan nga mopasundayag ug nanghinaot nga sa umaabut makaapil ko sa kompetisyon sa musika. Niining tuiga wala ko magduhaduha; akong gipresentar ang akong kaugalingon alang sa pasundayag ug miadto sa awdisyon kauban sa akong papa. Sa akong pagtuo makaingon mo nga gipangandaman na nako ang Ídolos sa tibuok nakong kinabuhi. Ang matag kasinatian nako sa Ídolos makapatingala kaayo, ang tanan gayud. Akong gipaningkamutan ang pagpahimulos sa matag oportunidad nga miabut sa akong agianan.
Unsa nga mga oportunidad nga pangmisyonaryo ang naabut kanimo panahon sa kompetisyon?
Kausa panahon sa usa ka panihapon kauban sa ubang mga contestant, mag-istoryahay mi og gamay mahitungod sa relihiyon, ug misulti ako mahitungod sa akong gituohan ug sa mga sumbanan sa Simbahan. Sa wala madugay akong gihatagan ang matag finalists og kopya sa pamphlet nga Alang sa Kalig-on sa Kabatan-onan aron mas makasabut sila kon unsay akong gituohan. Ang uban miingon nga ang mga sumbanan sa Simbahan kinaraan ra kaayo, apan ang uban midayeg kanako tungod sa pag-angkon og ingon ka taas nga mga sumbanan niining mga panahona.
Ang Idolos siguro mikuha og daghan sa imong panahon. Giunsa pa man nimo sa pagkahigayon alang sa responsibilidad sa Simbahan?
Nagpadayon ako sa akong mga pag-ampo, pagbasa sa mga kasulatan, pag-apil sa seminary, ug pag-ambit sa sakrament matag Dominggo. Kasamtangan akong nangandam alang sa akong pagserbisyo og misyon, nga maoy butang nga akong ganahang buhaton sukad sa gamay pa ko. Nagserbisyo ako sa akong ward isip ward pianist, ward missionary, ug assistant sa bishop sa korum sa mga priests. Kinahanglan nakong ipahinungod ang hapit tanan nakong panahon alang sa kompetisyon, apan akong gisiguro ang pagpahinungod og una sa akong panahon ngadto sa Ginoo.
Litrato sa maayong kabubut-on ni Gerson Santos