Ayaw Pagpadala
Usa ka Tongan nga tin-edyer naghisgut sa maayong mga rason sa guardrails.
Ang maanindot ug gamhanang mga blowhole sa Mapu ‘a Vaea sa Tonga talagsaon. Sa paghampas sa balod niining tulo ka milya (4.8 km) nga gitas-on nga baybayon sa isla sa Tongatapu, kini mosulod sa gatusang mga lungag sa bato nga bolkan nga mopasidlit sa tubig pataas hangtud 60 ka pye (18 m) ngadto sa hangin.
Saane F., 16 anyos, ganahan kaayo sa kanindot sa lugar—sa paagi ang adlaw ug ang sidlit magkadungan sa matag balod.
Apan ang gahum sa kinaiyahan mahimong makuyaw ingon man usab nindot. Ang mga mibisita nga moduol pag-ayo, tungod ba sa kakuryuso o sa kakulbahinam, madala sa kakusog sa balod ug, dili na makaeskapo sa sulog, mabira ngadto sa dagat.
Ang delikado nga bahin sa Mapu ‘a Vaea naghatag og espiritwal nga pasidaan kabahin sa gahum sa tintasyon—partikular sa sekswal nga kaputli. Ang gahum sa paglalang og kinabuhi nindot kaayo kon ang saktong mga limitasyon gisunod, apan kon atong tugutan ang tintasyon nga modani kanato gikan sa luwas nga lugar, mahimong madala kita.
Pagsabut Nganong Importante ang Kaputli
Sa adlaw nga ang iyang igsoong babaye naminyo sa Templo sa Nuku‘alofa Tonga, si Saane nakakita sa iyang kalipay. “Kini nakadasig kanako nga mahimong takus nga maminyo didto sa umaabot,” miingon si Saane.
Apan, si Satanas maningkamot nga dili kana mahitabo kanato. Daghan na siya og nakombinser nga ang sekswal nga kasuod nga gawas sa kaminyoon gidawat na ug walay mga sangputanan. Apan ang sayop nga paggamit sa gahum sa Dios sa paglalang og kinabuhi seryoso nga sala nga makapadaut sa espiritwal, emosyonal, ug pisikal.1
“Si Satanas naningkamot pag-ayo sa pagpugong kanato nga makabalik ngadto sa atong Langitnong Amahan,” miingon si Saane. “Kon ako dili magbinantayon kabahin sa balaod sa kaputli, mawala kanako ang oportunidad nga maminyo sa templo.”
Pagpasidungog sa mga Guardrail sa Dios
Aron makatabang sa mga bisita nga matagamtam ang kanindot sa Mapu ‘a Vaea sa luwas nga paagi, ang gobyerno sa Tonga nagbutang og mga guardrail sa pihong mga dapit.
Si Saane nagtuo nga ang Langitnong Amahan naghatag og mga guardrails—o mga sumbanan—aron dili kita matintal. Mga lider sa Simbahan, mga kasulatan, ug Alang sa Kalig-on sa mga Kabatan-onan naghatag og klaro nga mga limitasyon nga, kon sundon, makatabang kanato nga luwas. Labaw sa tanan, ang pagsunod sa mga aghat sa Espiritu Santo makapahimutang kanato sa luwas nga lugar.
“Daghang mga tawo ang mobaliwala sa mga guardrail sa Ginoo,” siya miingon. “Wala nila masabti ang mga sangputanan, o naghunahuna nga sila makalikay niini. Ang pag-ambak gikan sa pang-pang mora og maglupad, apan mobalik ra gihapon sa yuta.”
Paghimo og Atong Kaugalingong mga Guardrail
Kalabut sa sekswal nga kaputli, ang pagsuta kon asa gyud kutob kita pwedeng motambo sa guardrail mao gyud ang sigurado nga paagi nga matagak. Kon mas tugutan nato ang atong kaugalingon sa sayop nga sekswal nga pagkasuod, mas lisud buntugon ang pagpangdani niini.
Tungod kay ang Simbahan dili makadetalye unsaon sa paglihok sa matag sitwasyon, si Saane naghimo og iyang kaugalingong mga guardrail pinaagi sa pagdesisyon nang daan kon unsaon sa paggamit sa mga sumbanan sa ebanghelyo ngadto sa mga sirkumstansya nga mahimo niyang atubangon.
Siya nagbuhat og poster nga nakalista ang siyam ka mga saad sa iyang kaugalingon ug sa Langitnong Amahan nga nagsilbing personal nga mga guardrail, naglakip sa matang sa mga tawo nga iyang i-date, sinina nga iyang sul-ubon, ug pinulongan nga iyang gamiton. Ang uban pang mga guardrail maglakip sa unsaon sa paglikay sa pagtan-aw, pagbasa, o pagpaminaw sa bisan unsa nga makapagana sa sekswal nga mga pagbati.2
“Ang paghimo og taas nga mga sumbanan makapaluwas kanako,” miingon si Saane.
Pagbalik ngadto sa Luwas nga Lugar
Sama niadtong nadala sa sulog sa tubig sa Mapu ‘a Vaea, kadtong nadala sa tintasyon anaa sa delikado nga dapit. Ang pagkagapos sa sekswal nga sala mahimong lisud nga makalingkawas—apan kini posible uban sa tabang sa Manluluwas ug sa Iyang mga sulugoon.
Sa katapusan, kon ang usa ka tawo dili mobiya sa luwas nga dapit o nakahimo sa malisud nga pagbalik dinhi, ang tumong mao ang pagpabilin dinhi. Ang pagsunod sa mga guardrail sa Ginoo ug sa pagsabut kon unsaon kini paggamit sa atong personal nga mga sirkumstansya makaandam kanato sa pagtagamtam sa maanindot nga gahum sa Dios nga gihatag kanato—sa saktong panahon ug paagi.
“Labaw sa tanan, naglantaw ko sa unahan nga maminyo sa templo,” miingon si Saane. “Nasayud ko nga kon ako mosunod sa mga sugo, lakip ang balaod sa kaputli, ako mahimong takus sa pagdawat sa mga panalangin nga akong gitinguha.”
Si Saane (sa tuo) ug si Amelia (sa tunga) nagsaulog uban sa iyang igsoong babaye nga si Manatu sa adlaw sa iyang kaminyoon sa templo.
Mga litrato pinaagi ni Adam C. Olson